Saray Huis 7:2 - Maung A Balita Biblia

² Say Katawan kuantod kinen Gedeon, “Dakerakel lan tuloy iray totoom a panaloen kod saray Madianita. Ompan abaloan da naani ya analo ra lapud pakayari ran dili, et ibaga ran anggapoy pibibiang ko.

Maung a Balita Biblia

² Say Katawan kuantod kinen Gedeon, Dakerakel lan tuloy iray totoom a panaloen kod saray Madianita. Ompan abaloan da naani ya analo ra lapud pakayari ran dili, et ibaga ran anggapoy pibibiang ko.

Saray Huis 7:2 Iomraidhean Croise

Genesis 46:2

Akisalitay Dios ed sikato diad panamegley na sakey a pasingayew ed labi tan inkuanto, “Jacob, Jacob!” “Wadya ak! Anto man?” ebat to.

2 Saray Awaran 14:11

Nampikasid Katawan a Dios to si Asa, “O Katawan, anggapoy miparad sika; nayarian mon tulongan iray makapoy tan saray makapanyari. Tulongan mo kami pa natan, O Katawan a Dios mi, lapud manmamatalek kamid sika tan, diad ngaran mo, pinmaway kamin mibakal ed sarayan amayamay a sondalo. Katawan, sika so Dios mi; anggapoy makapanilalon manalod sika.”

Isaias 10:13

Ta say impirador na Asiria kuanto, “Siak a diliy nanggawad saraya. Mabiskeg ak, makabat ak, tan masilib ak. Inekal ko ray ketegan na saray bansa tan inaalak iray abaston insesempen da. Singa ak bakan kalakyan a nanggagatin ed saray totoon manaayam diman.

Isaias 2:11

Onsabiy agew a mansamput so panagpaatagey na too tan naderal so panagpasirayew na amin a katoowan. Insan say Katawan labat so nitanduro ed satan.

Isaias 2:17

Mansamput so panagpaatagey na too tan naderal so panagpasirayew na amin a katoowan. Naandipat a sigput iray talintaoy diriyos, tan nitanduro so Katawan labat diad satan ya agew.

Jeremias 9:23

Say Katawan kuanto, “Ag nepeg ya ipasirayew na saray makabat a totoo so kakabatan da, odino saray mabiskeg a totoo so biskeg da, odino saray mayaman a totoo so kayamanan da.

Ezekiel 28:17

Mapaatagey ka lapud inkaguapom, tan lapud inkabantug mo nagmaliw kan singa makulang-kulang. Lapud saya imbantak ta kad dalin tan tinaynan ta kad man a sakey a pasakbay ed saray arum ya arari.

Ezekiel 28:2

Inkuanto, “Sika a toon ompatey, ibagam so ibabagak ed manoley na Tiro, siak a Katawan a Dios: Diad panagpaatagey mo, ibabagam a sakey kan dios. Ibabagam a singa ka sakey a dios a manyodyorung ed trono, ya aliber na saray dayat. Nayarin ipasen moy sikan dili a sakey a dios, balet aliwan tua, ta sakey kan too labat ya ompatey; aliwa kan Dios.

Daniel 4:30

inkuanto, “Nengneng yo so ontan lan inkatalonggaring na Babilonia! Lapud biskeg tan pakayarik impaalagey kon manonan siudad na nanarian ko a pakapatnagay kagalangan ko tan say katageyan ko.”

Habacuc 1:16

Igagalang da ni ingen iray iket da tan mangibabagat irad sikara, lapud saray iket da so panlalapwan na saray sankaabigan a nakaukolan dad bilay.

Zacarias 12:7

“Siak a Katawan panaloen kon onona iray sondalo na Juda, pian say kagalangan ya awaten da ray kabyangay boleg nen David tan saray totood Jerusalem et baleg ni nen say awaten na saray arum a parti na Juda.

Zacarias 4:6

Samay anghil imbaga tod kinen Zorobabel ira yan salita na Katawan: “Mampalabo ka, aliwan lapud pakapanyari na saray sondalo odino lapud dilin biskeg mo, no ag ingen lapud ispirituk.

Saray Bilang 31:4

Mangibaki na sanlibon lalakin mibakal so kapag tribu na Israel.”

Saray Taga Roma 11:18

Kanyan ag mo nepeg a balbalawen ira may apoter a sangasanga; ta nepeg mon nunoten a sanga ka labat tan ag mo tataganoey lamut, no ag ingen say lamut so manataganod sika.

Saray Taga Roma 3:27

Anto sirin natay nipasirayew tayo? Anggapo! Akin ey? Lapu oonuren tayoy Ganggan? Andi, no ag ingen lapud mananisia tid Cristo.

2 CORINTO 4:7

Balet sikamin walay maispiritun kayamanan et singa kami saray bangan lopuk, pian nipanengneng a say Dios, aliwan sikami, so kawalaay sankatageyan a pakayari.

TAGA-EFESO 2:9

Kanyan anggapoy nipasirayew na anggan siopad sikayo, ta ag nanlapud gawgawa yo.

Deuteronomio 32:27

Balet ag ko nayarin iyabuloy a mampasirayew iray kalaban da diad pangibaga ran tinalo da ray totook, anta siak a dili so amatalod sikara.’

Deuteronomio 8:17

Kanyan sirin, ag yon balut iisipen a minmayaman kayo lapud biskeg tan pakayari yon dili.

Deuteronomio 8:18

Nunot yo a say Katawan a Dios yo so angiter ed sikayo na pakayari a mampayaman. Onyay gagawaen to lapud niy matoor ya anggad natan ed samay impisipanan tod saray lalaki yo.

Santiago 4:6

Balet lalon matalonggaring so tulong ya inter na Dios. Onung na ibabagay Masanton Sulat, “Say Dios susumpaen to ray mapaatagey, balet tutulongan to ray mapaabeba.”

1 Samuel 14:6

Inkuanen Jonatan ed samay balolaki, “Onla tad kampo da ray paganon Filisteo. Tulongan ita angangko na Katawan; no tulongan to ta, anggapoy antokaman a makasbel ed sikato diad pangiter tod sikatay pananalo, anggaman a dagdaiset ita.”