Saray Gawgawa 5:31 - Maung A Balita Biblia

³¹ Intanduroy Dios ed nikawanan to tan ginawa ton Pangulo tan Manangilaban a mangiter ed saray totood Israel na pankanawnawa ran mampatauli tan mangibeneg ed saray kasalanan da, pian napirdona ra.

Maung a Balita Biblia

³¹ Intanduroy Dios ed nikawanan to tan ginawa ton Pangulo tan Manangilaban a mangiter ed saray totood Israel na pankanawnawa ran mampatauli tan mangibeneg ed saray kasalanan da, pian napirdona ra.

Saray Gawgawa 5:31 Iomraidhean Croise

Saray Salmo 89:19

Diad sakey a payawar nen saman, imbagam ed saray matoor a managlingkur mo, “Tinulongan koy sakey a bantug a sondalo; inter koy trono ed pinilik ed saray totoo.

Saray Salmo 89:24

Magmaliw ak a maaro tan matoor ed sikato; panaloen ko lawas.

Isaias 43:11

“Bukbukor ko so Katawan, siak labat so makapangilaban ed sikayo.

Isaias 43:3

Ta siak so Katawan a Dios mo, say masanton Dios na Israel, a mangilalaban ed sika. Ipatalok so Egipto, Etiopia tan Seba pian narondon ka.

Isaias 45:21

Dago kayo tan iparontal yod korti so dalem yo; mampapanonan komun iray nidalem. Siopay abayag lan angipasakbay ed agawa? Aliwa tan siak, say Katawan, say Dios so mangilalaban ed saray totoo to? Anggapo lay arum a Dios likud ed siak.

Isaias 49:26

Pagmaliwen kon mampapateyan iray mamapairap ed sikayo; nabuek irad pampatey na too. Diad satan naamtaan na amin a katoowan a siak so Katawan, say Mananondon tan Manangilaban yo. Naamtaan da a siak so makapanyarin Dios na Israel.”

Isaias 9:6

Dadi sikatayo nianak so sakey ya ogaw! Niiter ed sikatayo so sakey ya anak a laki! Sikatoy magmaliw a manoley tayo. Natawag a “Makapakelaw a Mananimbawa,” “Makapanyarin Dios,” “Andi-anggaan ya Ama,” “Prinsipi na Kareenan.”

Ezekiel 17:24

Amin a kiew ed dalin naamtaan da a siak so Katawan. Babatangen ko ray atagey a kakiewan, tan pababalegen ko ray melag kiew. Lelenesen ko ray malambut a kiew tan palalambuten ko ray amagan kiew. Siak a Katawan so nansalita. Gawaen ko so sinalitak.”

Ezekiel 34:24

Siak a Katawan so magmaliw a Dios da, tan say manoley ed sikara et sakey ya arin singa si aripen kon David. Siak a Katawan so nansalita.

Ezekiel 37:25

Manayam irad dalin ya inter kod aripen kon Jacob, diad dalin a nanayaman na saray lalaki ra. Manayam irad man ya anggad angga, pati saray anak da tan amin a kabyangay boleg da. Anggad anggan manoley ed sikara so sakey ya arin singa si aripen kon David.

Daniel 9:25

Amtaen tan talusan mo ya: Manlapud kipaakseb na ganggan a nipawil ed gendat a kipapasen so Jerusalem ya anggad isabi na pangulon pinili na Dios, mamimpiton pitoran taon so napalabas. Nipaalagey lamet so Jerusalem; nipawil iray dalan tan saray mabiskeg a tirinsira to, tan mansiansia ra ya a mamimpiton anemaplo tan duan taon, balet panaon ya na saray gunigon.

Zacarias 12:10

“Panoen ko na ispiritu na panangasi tan ispiritu na pikakasi iray kabyangay boleg nen David tan saray arum a totoo ed Jerusalem. Onnengeng irad sakey a dinoyuk da, tan ermenan da a singa ra saray maneermen ed saksakey ya anak. Mapalaloy panermen da a singa ra saray maneermen ed impatey na panguloan ya anak a laki.

Mateo 1:21

Mananak na laki. Jesus so ingaran mod sikato, ta sikatoy mangilaban ed saray totoo tod saray kasalanan da.”

Mateo 28:18

Inmasingger si Jesus tan inkuantod sikara, “Niiter lad siak so amin a pakayari dimad tawen tan diad dalin.

Marcos 2:10

Paneknekan kod sikayo sirin a say Anak na Too et walay pakayari tod tapew na dalin a mamirdonay kasalanan.” Inkuantod satan ed samay paralitiko,

Marcos 4:12

Kanyan, ‘Nengneng la ra man a nengneng, ag da met lamlamang nanengneng; dengel la ra man a dengel, ag da met lamlamang natalusan; ta ompan lagi ompawil irad Dios, et pirdonaen to ra.’”

Lucas 2:11

Ta diad sayan agew, nianak ed baley nen David so Manangilaban, say Criston Katawan!

Lucas 24:47

tan diad ngaran to, say pagbabawi tan say kapirdona na saray kasalanan et nepeg a nipulong ed amin a bansa, manlapud Jerusalem.

Juan 4:42

Kanyan imbaga rad samay bii, “Manisia kami la natan, aliwan lapud samay imbagam, no ag lapud nadngel min dili; tan amta mi a sikaton tuay Manangilaban na sankamundoan.”

Saray Gawgawa 11:18

Nen nadngel da ya, intonda ray pantetetel da tan indayew day Dios. “No ontan sirin,” inkuanda, “initday Dios met iray Hintil na pankanawnawan magbabawi ed saray kasalanan da, pian nagamuran day bilay!”

Saray Gawgawa 13:23

Say Dios, onung ed insipan to, inter ton Manangilaban na saray totood Israel si Jesus a kabyangay boleg nen David.

Saray Gawgawa 2:33

Niatagey ed nikawanay Dios, tan inawat toy Ispiritu Santo ya insipan na Ama to. Inter nen Jesus yan Ispiritu Santo ed sikami, onung na nanenengneng tan narerengel yo natan.

Saray Gawgawa 2:36

“Kanyan nepeg a naamtaan tan ag panduaruwaan na amin a totood Israel a sayan Jesus ya impasak yod krus so ginaway Dios a Katawan tan Cristo!”

Saray Gawgawa 2:38

Inmebat si Pedro ed sikara, “Magbabawi kayod saray kasalanan yo, tan mampabinyag kayod ngaran nen Jesu-Cristo, et diad ontan, napirdona ray kasalanan yo. Awaten yo met ed satan so Ispiritu Santo a panangaroy Dios.

Saray Gawgawa 3:15

Kanyan pinatey yoy Manamalsay bilay, balet say Dios pinaoli tod bilay; sikami ray tasi ed sayan agawa.

Saray Gawgawa 3:19

Kanyan magbabawi kayo la tan pawil kayo lad Dios, pian naponas iray kasalanan yo,

Saray Gawgawa 3:26

Kanyan piniliy Dios so Aripen to tan onaan kayo ya angibakian to, pian nabindisionan to kayo, diad panamegley na panulong tod sikayon mangibeneg ed maoges a panagbilay yo.”

Saray Gawgawa 4:11

Si Jesus so labay ya ibaga na Masanton Sulat nen inkuanto, ‘Say baton impasen yon andikakanaan, sikayo ran karpintiro, nagmaliw lamlamang a sankakanaan a bato.’

2 CORINTO 2:10

Siopamay toon pinirdona yo, pinirdonak met la. Say pinirdonak, no wala bilang, pinirdonak makasengeg ed sikayo, diad arap nen Cristo,

TAGA-EFESO 1:7

Arondon itayo la diad panamegley na dala nen Cristo tan diad ontan, apirdona la ray kasalanan tayo. Agaylay kabaleg na panangaroy Dios,

FILIPOS 3:20

Sikatayo balet, say tawen so tuan bansa tayo tan dimay panlapway Katawan a Jesu-Cristo, say Manangilaban tayo a pampilpilalekan tayon alagden.

COLOSAS 1:14

Arondon itayo la tan apirdona la ray kasalanan tayo diad panamegley na Anak.

Tito 1:4

Diad sika Tito a tuan anak kod pananisian pankakasakeyan ta: Itdan kayo komun na Dios ya Ama tan si Cristo Jesus a Manangilaban tayo na bindision tan kareenan.

Tito 2:10

Ibagam ed sikaran ag da tatakeway amo ra no ag ingen ipanengneng da lawas so kamaungan tan inkatoor da, pian diad amin a gawaen da, nipanengneng day dakep na bangat na Dios a Manangilaban tayo.

Tito 2:13

legan tin aalagden so iilaloan tayo—say maliket ya Agew a nipanengneng so kagalangay matalonggaring tayon Dios tan Manangilaban a Jesu-Cristo.

Saray Hebreo 12:2

Ag tayo nepeg ya alisay mata si Jesus a sikatoy nanlapwan tan pansumpalay pananisia tayo. Lapud liket a manaalagar ed sikato, ag to imbaing so ompatey ed krus, tan akayorung natan ed nikawanay trono na Dios.

Saray Hebreo 2:10

Manepeg ed Dios—say amalsa tan manaasikasod amin a bengatla—a ginawa toy Jesus a nagnap diad panamegley na kairapan, pian pinabangen tod kagalangan to ray amayamay ya anak. Ta si Jesus so mangipapanguloy kilalaban da.

1 Pedro 3:22

a linmad tawen tan manyodyorung ed nikawanay Dios. Manooley diman ed saray anghil, tan saray mangatatawen a pakayari tan pakaoley.

2 Pedro 1:1

Sayan sulat nanlapud kinen Simon Pedro, ya aripen tan apostol nen Jesu-Cristo— Diad saray kapara min angawat na mablin pananisia diad panamegley na inkatonung na Dios tan Manangilaban tayo a Jesu-Cristo:

2 Pedro 1:11

Diad ontan, nawalaan kayoy nagnap a kanepegan ya onloob ed andi-anggaan a Panarian na Katawan tan Manangilaban tayon Jesu-Cristo.

2 Pedro 2:20

Saray totoon makapikabat ed Katawan tan Manangilaban tayon Jesu-Cristo et akapaliis la rad marotak a kagagawa diad mundo. Balet no ompawil ira lamet a naaripey kaogsan, lalon maoges so kipapasen da nen say gendat.

2 Pedro 3:18

Ituloy yo ingen so ombaleg ed panangaro tan pakapikabat ed Katawan tan Manangilaban tayon Jesu-Cristo. Kayaryan to komuy kagalangan, natan tan ando lan ando! Amen.

1 Juan 4:14

Anengneng mi tan papaneknekan mid saray arum a say Ama imbaki toy Anak to a Manangilaban na sankamundoan.

Judas 1:25

diad saksakey a Dios a Manangilaban tayo diad panamegley nen Jesu-Cristo a Katawan tayo, so kawalaan komuy kagalangan, katageyan, pakayari, tan pakaoley, manlapud gapoy gapo, natan, tan anggad angga! Amen.

Puyan 1:5

tan manlapu met ed Jesu-Cristo, say matoor a tasi, say pangulowan ya Anak ya inmolid bilay, tan sikato so manoley ed saray arari diad tapew na dalin. Inaro itayo nen Jesu-Cristo tan diad panamegley na dala to, imbolus to itayod saray kasalanan tayo.