Saray Gawgawa 26:24 - Maung A Balita Biblia

²⁴ Nen mansasalita niy Pablo a pangyagel tod laman ton dili, maksil ya inkuanen Festo, “Ambagel ka, Pablo! Aambagelen kay alabas ya aral mo!”

Maung a Balita Biblia

²⁴ Nen mansasalita niy Pablo a pangyagel tod laman ton dili, maksil ya inkuanen Festo, Ambagel ka, Pablo! Aambagelen kay alabas ya aral mo!

Saray Gawgawa 26:24 Iomraidhean Croise

2 Saray Arari 9:11

Pinmawil si Jehu ed saramay kapara ton opisyal, tan tinepet dad sikato, “Kamaungan ya amin so agawa? Antoy nilaan tod sika may ambagel a too?” “Amta yo no antoy nilaan to,” ebat nen Jehu.

Jeremias 29:26

‘Say Katawan ginawa to kan pari a sinmalat ed kinen Joiada tan sika natan so manonan opisyal na Timplo. Kanepegan mon pabalur na golunggolung tan pasolungay kuilyon balatyang so beklew na balang sakey a manluko-lukowan a mampropisiya.

Oseas 9:7

Sinmabi lay panaon na dusa, say panaon ya awaten na saray totood Israel so kanepegan dan dusa. No nagawa la ya, naamtaan na Israel! “Sayan propita,” kuanyo, “et makulang-kulang. Ambagel yan toon apuyanan na ispiritu.” Mapalaloy pambobosul yod siak lapud ambelat lan tuloy so kasalanan yo.

Marcos 3:21

Nen nadngelan ya na saray kakanayon to, labay da lan iyarawi lapud saray totoo et ibabaga ran nanaambagel.

Juan 7:15

Mankelaw iray Judio tan kuanda, “Akin et amayamay so amta to yan too, anta ag balut nanaral?”

Juan 8:48

Inmebat iray Judio ed kinen Jesus, “Ag kasi tuay ibabaga min Samaritano ka, tan inaponan kay dimonyo?”

Juan 8:52

Inkuan da ray Judio ed sikato, “Ag kami la manduaruwa natan ya inaponan kay dimonyo! Inatey si ama min Abraham tan saray propita, balet ibabagam, ‘Say mangonur na salitak ag balut ompatey.’

Saray Gawgawa 17:32

Nen nadngel day Pablo ya angibagay nipaakar ed kiolid bilay, niludlurey na pigarad sikara. Balet inkuay arum, “Labay mi ka lamet a dengelen nipaakar ed saya.”

Saray Gawgawa 22:1

“Atateng tan agagi, dengel yo pay ibagak a pangyagel koy laman kon dili!”

Saray Gawgawa 24:25

Balet nen ituloy nen Pablo so mampaliwaway nipaakar ed kamaungan, panagadyad dilin laman, tan say okum ya onsabi, ataktakot si Felix tan inkuanto, “Alis ka ni, ta patawag ta ka no walay panaon ko.”

Saray Gawgawa 24:27

Kalabas na duay taon, si Porcio Festo sinalatan ton Gobirnador si Felix. Lapud labay nen Felix ya alaen so maung a linawa da ray Judio, pinaolyan toy Pablo ed prisowan.

Saray Gawgawa 26:11

Amimpiga-pigan pinapairap ko ra ed amin a sinagoga, tan pinapasoot ko ran mansalitay pangibeneg dad pananisia ra. Diad ontan lan petang na olok ed sikara, lilinma ak ya anggad saray siudad ed arum a bansa a mamairap ed sikara.”

1 CORINTO 1:23

Balet no nipaakar ed sikami, ipupulong miy Cristo a nipasak ed krus, sakey a bangat a diad saray Judio et pakatumbaan tan diad saray Hintil et anggapoy kabaliksan.

1 CORINTO 4:10

Makulang-kulang kami nisengeg ed Cristo, balet makabat kayo diad pikakasakey ed Cristo! Makapkapoy kami, balet mabisbiskeg kayo! Nababalaw kami, balet napapagalangan kayo!

2 CORINTO 5:13

No singa kami ambagel, Dios so kipaakaran to, no makalakal kami, sikayoy kipaakaran to.

2 Timoteo 3:15

Amtam a nanlapud impanogaw mo, akabatan mo lay Masanton Sulat a makaiter ed sikay kakabatan a mansumpal ed kilalalaban diad panamegley na pananisiad Cristo Jesus.