Saray Bilang 21:7 - Maung A Balita Biblia

⁷ Sinmingger ed kinen Moises iray totoo tan kuanda, “Nankasalanan kami nen nansalita kamiy sumpad Dios tan sumpad sika. Ipikasim pad Katawan ya ekalen to la ra yan oleg.” Kanyan impikasi nen Moises iray totoo.

Maung a Balita Biblia

⁷ Sinmingger ed kinen Moises iray totoo tan kuanda, Nankasalanan kami nen nansalita kamiy sumpad Dios tan sumpad sika. Ipikasim pad Katawan ya ekalen to la ra yan oleg. Kanyan impikasi nen Moises iray totoo.

Saray Bilang 21:7 Iomraidhean Croise

Genesis 20:17

Lapud samay agawad kinen Sara ya asawa nen Abraham, say Katawan ginawa to ya ag makapanlokun iray bibii a walad abung nen Abimelec. Kanyan impikasi nen Abraham si Abimelec, tan pinaabig na Dios. Pinaabig to met so asawa nen Abimelec tan saray bibiin aripen to, pian makapananak ira.

Genesis 20:7

Ipawil mo la sirin imay bii ed dilin asawa to; say asawa ton propita ipikasi to kan ag ompatey. Balet no ag mo ipawil, pasakbayan ta kan ompatey ka, sika tan saray totoom.”

1 Saray Arari 13:6

Inkuanen Ari Jeroboam ed samay propita, “Ipikasi mo ak pa ed Katawan a Dios mo, tan kerew mon paabigen toy taklay ko.” Nampikasid Katawan imay propita, et inmabig so taklay na ari.

2 Saray Arari 13:4

Insan nampikasid Katawan si Joacaz, et inebatan na Katawan so pikakasi to, lapud pakanenengneng tod ontan lan pamapairap na ari na Siria ed saray Israelita.

Say Libro nen Job 42:10

Insan kayari nen Job ya impikasid Katawan ira may taloran kakaaro to, pinaaligwas lamet na Katawan; initdan toy mamiduan karakel na samay kayaryan to nen saman.

Say Libro nen Job 42:8

Natan sirin, mangyakar kayod kinen Job na pitoran bakan kalakyan tan pitoran karniron kalakyan ta isaklang yo ran bagat a popoolan para sikayo. Ipikasi to kayo nen Job, et ebatan koy pikakasi yo tan ag ta ki la dusaen onung na kanepegan yo. Kanepegan yo komuy dusaen lapud ag yo sinalita so katwaan nipaakar ed siak, a singa ginawa nen Job.”

Saray Salmo 106:23

Nen imbaga na Dios a deralen to ray totoo to, binaat nen Moises a pinili ton aripen to, et pinakepa na Dios so pasnuk ton maneral ed sikara.

Saray Salmo 78:34

Balet kapag wala ray pateyen tod sikara, saray nakdaan onsingger irad Dios; mampatauli ra tan masimoon iran mampikasid sikato.

Exodo 10:17

Pirdona yo ak pan maminsan labat ni ed sayan kasalanan ko tan pikasi yod Katawan a Dios yo a paandien to lad siak yan makapatey a dusa.”

Exodo 32:11

Balet si Moises akikasi ed Katawan a Dios to tan kuanto, “Katawan, akin et mapalaloy pasnuk mod saray totoom ya impaway mod Egipto diad panamegley na baleg a pakayarim tan biskeg mo?

Exodo 32:30

Diad ontombuk ya agew si Moises kuantod saray katoowan, “Ambelat a tuloy so kasalanan a ginawa yo. Balet onkalab ak lamet ed palandey ta laen koy Katawan; angangko nagamuran koy pakapirdona na kasalanan yo.”

Exodo 8:28

Say ari kuanto, “Abuloyan ta kayon mangibagat ed Katawan a Dios yo diad kalawakan, dapot ag kayo oonlad arawdawi. Ipikasi mo ak.”

Exodo 8:4

Onluklukso rad laman mo, diad saray totoom, tan diad amin ya opisyal mo.’”

Exodo 8:8

Say ari impaawit to ra di Moises tan Aaron tan kuanto, “Ipikasi yod Katawan a pagiten to ra yay patang, insan ko abuloyan ya onla la ray totoom, pian makapangibagat irad Katawan.”

Isaias 26:16

Dinusam iray totoom, Katawan, tan diad paniirap da nampikasi rad sika.

Jeremias 15:1

Insan inkuan na Katawan ed siak, “Anggan manalagey ira di Moises tan Samuel diad arap ko a mikasi ed siak, ag ko kasian ira yan totoo. Paekal mo ra tan pataynan mo rad pakanengneng ko.

Jeremias 37:3

Si Ari Sedekias imbaki tod siak si Jucal a lakin anak nen Selemias tan say pari a si Sofonias a lakin anak nen Maasias, ta kerewen dan ipikasik ed Katawan a Dios tayo so bansa.

Oseas 5:15

“Ikaindan ko ray totook ya anggad asigsigput so impanirap da, lapud saray kasalanan da tan onsabi ran mananap ed siak. Angangko diad gaway panirap da anapen da ak.”

Saray Bilang 11:2

Saray totoo et kinmerew ira na tulong ed kinen Moises; nampikasiy Moises ed Katawan, et narep imay apoy.

Mateo 27:4

“Nankasalanan ak, ta inyawat kon papatey so toon anggapoy kasalanan!” inkuanto. “Antoy pibabalian mi? Sikay akaoley ed satan!” inebat da.

Saray Gawgawa 8:24

Inkuanen Simon ed kindi Pedro tan Juan, “Ipikasi yo ak pa sirin ed Katawan, pian anggapod saray imbaga yo so nagawad siak.”

Saray Taga Roma 10:1

Agagi, ontan lay pampipilalek tan pampipikasik ed Dios a nilaban ira komuy kadalaan tan kabaleyan ko.

Deuteronomio 9:20

Diad saman, mapalalo met so pasnuk na Katawan ed kinen Aaron et pateyen to la lawari, kanyan impikasik met si Aaron.

Santiago 5:16

Kanyan mampapatwaan kayo ray kasalanan yo, tan mampipikasiyan kayo, pian onabig kayo. Dakel so nagawaay pikakasi na toon matonung.

1 Samuel 15:24

“On, nankasalanan ak,” ebat nen Saul, “Ag ko inonur so ganggan na Katawan tan saray bilibilin mo. Antakot ak ed saray totook, kanyan ginawak iray labay da.

1 Samuel 15:30

“Nankasalanan ak,” ebat nen Saul. “Balet pagalangan mo ak pa ni labat diad arap da ray pangulo na totook tan amin a totood Israel. Mila kad siak pian nigalang koy Katawan a Dios mo.”