Puyan 14:15 - Maung A Balita Biblia

¹⁵ Insan pinmaway so sananey ya anghil a nanlapud timplo tan inkuantod maksil a bosis ed samay akayorung ed lorem, “Ikanam tay palot mo tan manani ka, ta panagani la. Matakken lay aaniyen ed mundo!”

Maung a Balita Biblia

¹⁵ Insan pinmaway so sananey ya anghil a nanlapud timplo tan inkuantod maksil a bosis ed samay akayorung ed lorem, Ikanam tay palot mo tan manani ka, ta panagani la. Matakken lay aaniyen ed mundo!

Puyan 14:15 Iomraidhean Croise

Genesis 15:6

Anisiay Abram ed Katawan, tan lapud sayan pananisia to say Katawan impasen ton matonung si Abram.

Isaias 62:1

Mansalita ak a pamabiskeg kod linawa na Jerusalem; Ag ak mampainawa ya anggad sikatoy nilaban, Tan onsinag a singa baleg a silew ed labi so pananalo to.

Jeremias 51:33

Ag mabayag, gapasen ira la na saray kalaban tan gatin-gatinan da ran singa ilik ed panagilikan. Siak, say Katawan a Makapanyarin-amin a Dios na Israel, so nansalita.”

Joel 3:13

Mapalaloy kaogsan da; gapas mo pa ran singa trigo no panaoy panagani; terak mo ran singa katerak na ubas diad panagpespesan ya anggad onlepwan onagos so alak.”

Mateo 13:30

Paolyan yon mambansag iran ontuboy trigo tan dika ya anggad panagani. Ibagak ed saray manani ed satan ya onaen dan baguten iray dika tan balkuten da ran ibantak ed apoy, insan da anien iray trigo tan ikarga da rad kamalir.’”

Mateo 13:39

samay kalaban a nansibwag na saray bokel na dika, say dilin Diablo. Samay panagani, say anggaan na mundo; tan saramay omaani, saray anghil.

Mateo 23:32

Sigi sirin, ituloy yoy inggapo nen saman na saray lalaki yo!

Marcos 4:29

No tinmakken la ray bunga, samay nantanem anien to la ra, ta asabi lay panagani.”

1 TESALONICA 2:16

Labay da ni ingen a patondaen kami ed pangipupulong mid saray Hintil na Maung a Balitan kilabanan da. Napno da lay bayung na kasalanan, kanyan sinmabin siansiay pasnuk na Dios ed sikara!

Puyan 11:19

Alokasan ed tawen so timplo na Dios, tan anengneng ed timplo to so kaban a kawalaay sipanan. Insan kinmirmat, dinmalagorug, kinmarul, yinmegyeg, tan inmoray dakerakel a kristal.

Puyan 13:12

Inkana ton amiy pakayari na samay onaan ya ayep diad arap to. Impangigalang toy mundo tan amin a katoowan ed samay onaan ya ayep a say sugat to et inmabig la.

Puyan 14:14

Ninmengneng ak, tan anengneng koy sakey ya ampotin lorem. Walay akayorung diman a singa too, ya akakoronay balituk tan sankaawit toy matdem a palot.

Puyan 14:16

Inwasiwas to may akayorung ed lorem so palot to, tan agapas so aaniyen ed tapew na dalin.

Puyan 14:17

Anengneng kod satan a pinmaway so sananey ya anghil a nanlapud timplo ed tawen, tan wala met so sankabembenan ton matdem a palot.

Puyan 14:18

Pinmaway niy sananey ya anghil a nanlapud altar. Sikato yay anghil a walay pakaoley tod apoy. Inkuantod maksil a bosis ed anghil a walay matdem a palot, “Ikanam la tay palot mo. Borbor mo ray ubas ed saray kaubasan diad mundo, ta aloto la ra!”

Puyan 15:6

Pinmaway a nanlapud timplo ira may pitoran anghil a sankaawit da ray pitoran salot. Akakawes iray malinis tan masilesileng a lino, tan say pagew da abalkesan na balituk.

Puyan 16:17

Samay kumapiton anghil inkalbo tod dagem so kargay yaung to. Walay maksil a bosis a nanlapud trono ed timplo tan inkuanto, “Asumpal lan agawa!”

Puyan 6:10

Ineyag day makmaksil, “Katawan a Makapanyarin-amin, masanto tan matwa! Panoy kabayag mi nin manalagar ed panintinsiam ed saray katoowan diad tapew na dalin tan say panusam ed sikara lapud impamapatey dad sikami?”