Oseas 8:6 - Maung A Balita Biblia

⁶ Sakey a platiron taga Israel so nanggawa na talintao, et aliwa ni lamlamang a dios imay ginawa to! Namisimisi imay bakan balituk a gagalangen ed Samaria!

Maung a Balita Biblia

⁶ Sakey a platiron taga Israel so nanggawa na talintao, et aliwa ni lamlamang a dios imay ginawa to! Namisimisi imay bakan balituk a gagalangen ed Samaria!

Oseas 8:6 Iomraidhean Croise

2 Saray Arari 23:15

Inggeba met nen Josias so pasen a panangigalangan diad Betel a ginawa na lakin anak nen Nebat a si Ari Jeroboam a nilagyat ton nankasalanan so Israel. Inggeba nen Josias imay altar, minekmek to ray bato to ya anggad dinmabuk ira; pinoolan to met so masanton tiken a nisaklang ed diosan Asera.

2 Saray Arari 23:19

Diad balang siudad na Israel inggeba nen Ari Josias ya amin iray paganon pasen a panangigalangan ya impapaalagey na saray ararid Israel ya apampasnuk day Katawan lapud saya. Inggeba ton amin iray altar a singa impangigeba tod altar na Betel.

2 Saray Awaran 13:8

Natan labay yon labanan so pakayari na ari ya inter na Katawan ed saray kabyangay boleg nen David. Dakerakel kayon sondalo, tan walad sikayo ray balituk a bakan kilaw a diriyos yo a ginagawa nen Jeroboam.

2 Saray Awaran 31:1

Kayari na pista, amin da ray totood Israel linma rad balang siudad na Juda tan minemekmek da ray baton lusek, binabatang da ray tanda na diosan Asera, tan dinederal da ray altar tan saray paganon pasen a panangigalangan. Onya met so ginagawa ra ed arum a pasen na Juda tan diad saray dalin na Benjamin, Efraim, tan Manases, insan la ra sinmempet.

Jeremias 10:14

Diad pakanengneng ed saraya, nabirbir na amin a totoo a makulang-kulang tan anggapoy pakatalus da; balang platiro naeekalay ilalo ed saray talintao to, ta tila-tilan diriyos iray gagawaen da; anggapoy bilay da.

Jeremias 48:13

Diad satan saray taga Moab ibaing day dios dan Camos a singa samay inkabaingan da ray Israelita ed Betel, sakey a dios a nanmatalkan da.

Jeremias 50:2

“Ibagam ed saray bansa so balita! Ibawag mo! Iparontal moy tanda, tan ibandom so balita! Ag mo iyaamut! Naplag so Babilonia! Say dios ton Merodac et naplag ed kababaingan! Mabambanday so asumpalan da ray talintaoy diriyos na Babilonia; atemek-temek iray makapaingungot a talintao to.

Oseas 10:2

Saray totoon managpalikdoy kapusuan da et nepeg la ran manirap lapud saray kasalanan da. Igeba na Dios iray altar da tan deralen to ray masanton lusek da.

Oseas 13:2

Itutuloy da niy panagkasalanan da diad panggagawa ra na saray mital a talintaoy diriyos a galgalangen da—saray talintaon pilak, a bunga na kanunotan tan say limay too so nanggawa. Insan da kuan, “Mangisaklang kayod sikara na saray bagat.” Panoy iyangub na saray totoo ed saraman a talintaoy diriyos—talintao ran kapara na saray bakan kalakyan?

Oseas 14:3

Ag ka min balut nilaban na saray taga Asiria, tan ag kami niagel na saray kabayon para bakal. Ag min balut la ibagad saray talintao mi a sikaray Dios mi. O Katawan, kakasian mo ray totoo ya anggapoy napiregan da no ag sika lambengat.”

Mikias 1:7

Namisimisid kibasig-basig ya amin iray mabmablin talintao to, natemek ed apoy ya amin iray bengatlan niiter ed saray marotak a lalaki tan bibiid timplo, tan nagawan bunton na deral-deral iray imahin to. Amin da ray bengatlan atipon na Samaria lapud impangigalang ed saray diriyos a makapabona, kanyan saray kalaban ibatik da ran amin ed arum a pasen, ta ikana da rad arum a pasen para saray marotak a lalaki tan bibii ed timplo.”

Habacuc 2:18

Antoy kana na sakey a talintaoy dios? Sakey labat a ginawa na sakey a too, et anggapoy nibaga tod sikayo no ag katilaan labat. Antoy kaabigan a niiter na talintao diad panmatalek ed sikato na nanggawad sikato? Say talintao et sakey labat a dios ya ag anggan makasalita.

Saray Gawgawa 17:29

Lapud anak itayo met na Dios, ag tayo komun ipasen a say Dios et singa talintaon balituk, pilak, o baton ginaway lima tan kakabatan na too.

Saray Gawgawa 19:26

Nanenengneng tan narerengel yo met so gagawaen to man a Pablo. Ibabaga ton saray diriyos a gagawaey totoo et aliwa ran tuan diriyos. Amayamay la ray apanisia to, diad Efeso tan diad ngalngali intiron Asia.