Levitico 10:3 - Maung A Balita Biblia

³ Insan inkuanen Moises ed kinen Aaron, “Sikato yay sasalitaen na Katawan nen inkuanto, ‘Amin da ray manlingkur ed siak nepeg a pagalangan day inkasantok; ipatnag kod saray totook so kagalangan ko!’” Balet ag inmesel si Aaron.

Maung a Balita Biblia

³ Insan inkuanen Moises ed kinen Aaron, Sikato yay sasalitaen na Katawan nen inkuanto, Amin da ray manlingkur ed siak nepeg a pagalangan day inkasantok; ipatnag kod saray totook so kagalangan ko! Balet ag inmesel si Aaron.

Levitico 10:3 Iomraidhean Croise

Genesis 18:25

Andi-duaruwan ag mo pipatey iray matonung ed saray maoges. Ag nayarin balut a gawaen moy ontan. Ta no gawaen mo, napidusa ray matonung ed saray maoges. Ag nayarin balut! Ag ta matonung so huis na intiron mundo?”

Say Libro nen Job 2:10

Inmebat si Job, “Andi-kakanaay ibabagam! No mangiter na kamaungan so Dios, awaten tayo. Akin et ag tayo awaten no kairapan so iter to?” Anggan ontan lay paniirap to si Job ag nansalita na maoges sumpad Dios.

Saray Salmo 119:120

Lapud sika natatakot ak; lapud saray sintinsiam natatakot ak.

Saray Salmo 148:14

Pinabiskeg toy bansa to, pian idayew na amin a totoo to— saray totood Israel a mabli ran tuloy ed sikato. Idayew yoy Katawan!

Saray Salmo 39:10

Ag mo ak pa la dudusaen! Ngalngali ak la ompatey lapud panagkabil mod siak.

Saray Salmo 39:9

Mandeen ak, ag ak mangibalikas na anggan anton salita, ta sikay nanlapwan na sayan paniirap ko.

Saray Salmo 46:10

Kuanko, “Itonda yo lay panlalaban yo, tan birbir yon siak so Dios, sankatalonggaringan ed saray bansa, sankatalonggaringan ed intiron mundo.”

Saray Salmo 89:7

Sikay gagalangen ed tipon da ray masanto; manalalagey iran amin a natatakot ed sika.

Saray Salmo 93:5

Magnayon iray ganggan mo, Katawan, tan tuan masanto so Timplom ya anggad angga.

Exodo 14:17

Paaweten koy kapusoan da ray Egipsio; onosil irad satan, et napagalangan ak diad panalok ed ari, diad saray sondalo to, diad saray karwahi to, tan diad saray kutsiro to.

Exodo 14:4

Paaweten koy puso to, kanyan osilan to kayo, et pakagalangan ko so panalok ed ari tan saray sondalo to. Diad satan naamtaan na saray Egipsio a siak so Katawan.” Ginawa na saray Israelita so nibagad sikara.

Exodo 19:22

Anggan saray paparin onasingger ed siak nepeg ya iparaan day sikaran dili a mangigalang ed siak, ta no andi, dusaen ko ra.”

Exodo 19:24

Say Katawan inmebat, “Akseb ka tan itagar mo diay Aaron. Balet saray papari tan saray totoo ag da nepeg a labsanan so ketegan no ondago rad siak; ta no andi, dusaen ko ra.”

Exodo 30:30

Insan mo poyukan si Aaron tan saray lalakin anak to tan ikonsagram ira a papari a manlingkur ed siak.

Isaias 39:8

Say atalusan nen Ari Ezekias a kabaliksan to ya et say kiwala na kareenan tan kaandi na kaatapan legan na pambilay to, kanyan inmebat, “Maung so imbagam ed siak a salita na Katawan.”

Isaias 49:3

Inkuantod siak, “Israel, sikay aripen ko; lapud sika, idayew ak na saray totoo.”

Isaias 52:11

Ag yo sasaewen a taynan so Babilonia, amin yon umaawit na saray kagawaan na Timplo. Ag yo didiwiten so antokaman a marotak onung ed ganggan; pansiansia yon masanto so sikayon dili tan taynan kayo.

Ezekiel 20:41

Kayari ta kayon nipaway ed saray bansan nikaykayatan yo tan no atipon ta kayo la, maliket kon awaten iray bagat a popoolan yo, et nanengneng ed satan na saray bansa a masanto ak.

Ezekiel 28:22

Ibagam ed saray totood man so ibabagak, siak a Katawan a Dios: Siak so kalaban mo, Sidon; idayew ak na saray totoo lapud gagawaen kod sika. Naamtaan da a siak so Katawan, no ipanengneng koy ontan lan inkasantok diad panusak ed saray totoon manaayam ed sika.

Ezekiel 38:16

Dogpaan mo ray totook ya Israel a singa ka bagyon ondadalan ed dalin. No onsabiy tan a panaon, ibaki ta kan onloob ed dalin ko, pian nipanengneng kod saray bansa no siopa ak, pian nipanengneng koy kasantosan ko diad panamegley mo.

Ezekiel 40:46

tan samay kuarton akaarap ed baybay et para saray paparin manlilingkur ed altar. Si Sadoc so sengeg na amin da ray papari; sikara labat so kabyangay tribu nen Levi a naabuloyan ya onlad kawalaan na Katawan, ta manlingkur irad sikato.

Ezekiel 42:13

Samay laki kuantod siak, “Masanto ra yan paalagey. Diad loob na sarayan kuarto, kanen na saray paparin onloob ed kawalaan na Katawan iray sankasantosan a bagat. Lapud masanto ra yan kuarto, ipasen dia na saray papari iray sankasantosan a bagat: saray trigon bagat tan saray bagat a nisaklang a para kasalanan odino bagat a pambayar.

Levitico 21:15

No aliwan birhin so asawaen to, saray anak to a nepeg a masanto ra et marotak ira onung ed ganggan. Siak so Katawan tan siak so angibiig ed sikato a Pangulon Pari.”

Levitico 21:17

kinen Aaron, “Siopamay kabyangay boleg mon walay deral na laman to et ag nepeg a mangisaklang ed siak na bagat a kakanen. Mansiansia yan totontonen ed anggan kapigan a panaon.

Levitico 21:21

Siopaman a kabyangay boleg nen Aaron a pari a walay deral na laman to et ag nayarin mangisaklang ed siak na bagat a kakanen.

Levitico 21:6

Nepeg a sikatoy masanto tan ag to nepeg ya ipelag ed kababaingan so ngaran ko. Sikatoy mangisasaklang na bagat a popoolan, kanyan nepeg a masanto.

Levitico 21:8

Saray totoo nepeg ya ipasen dan masanto so pari, lapud sikatoy mangisasaklang ed siak na bagat a kakanen. Siak so Katawan, masanto ak tan pasantosen ko ray totook.

Levitico 22:9

“Amin a pari nepeg a tombuken da ray totontonen ya inter ko. No ag da ra tombuken, mankasalanan ira tan ompatey ira, lapud sinumlang da ray masanton totontonen. Siak so Katawan a mapasantod sikara.

Levitico 8:35

Diad loob na pitoran agew nepeg a manayam kayod mad lolooban na Tulda diad agew tan labi tan gawa yoy ingganggan na Katawan. No ag yo sumpalen, ompatey kayo. Sikato ya so ingganggan na Katawan ed siak.”

Saray Bilang 16:5

Insan inkuantod kinen Core tan saramay kagampi to, “Nabwas na kabwasan say Katawan ipanengneng tod sikatayo no siopa ray kayaryan to; abuloyan to so siopaman a kayaryan to, salanti say pinili to, ya onsingger ed sikato ed altar.

Saray Bilang 20:12

Balet nanpasnukan na Katawan ira di Moises tan Aaron. Inkuanto, “Lapud kulang so pananisia yon mamirbir na masanton pakayarik diad arap na saray totood Israel, aliwan sikayoy mangipangulod sikara diad iloob dad dalin ya insipan kon iter ed sikara.”

Mateo 10:37

“Siopamay babaleg so panangaro tod ama o ina to nen say panangaro tod siak et ag manepeg ed siak. Ontan met, siopamay babaleg so panangaro tod anak ton laki o bii nen say panangaro tod siak, ag manepeg ed siak.

Juan 12:28

Ama, pagalangan moy ngaran mo!” Insan walay bosis a nanlapud tawen a kuanto, “Pinagalangan ko la, tan pagalangan ko lamet.”

Juan 14:13

Antokaman a kerewen yod ngaran ko, gawaen ko, pian nipatnag so kagalangay Ama diad panamegley na Anak.

Deuteronomio 32:51

lapud aliwa kayon duan matoor ed siak diad arap na saray totood Israel. Nen wala kayo ed abay na danum na Meriba diad asingger ed baley na Cades diad kalawakan na Zin, ag yo ak pinagalangan ed arap na saray totoo.

2 TESALONICA 1:10

Nagawa ya ed Agew ya isabi ton mangawat na galang a manlapud saray totoon pinili to, tan say dayew a manlapud saray mananisiad sikato. Kaiba da kayo met, ta sinisia yoy Maung a Balitan impulong mid sikayo.

1 Pedro 4:17

Sinmabi lay oras na igapoy pananintinsia, tan onaan a nasintinsiaan iray totooy Dios. No onaan itayon nasintinsiaan, anto siriy pansumpalan da ray ag ontotombuk ed Maung a Balita na Dios?

1 Samuel 2:30

Siak, say Katawan a Dios na Israel, insipan ko nen saman a say pamilyam tan saray kabyangay boleg mo et anggad anggan manlingkur iran papari ed siak. Balet ibabagak natan ya ag ko la sumpalen! Ingen, pagalangan ko ray mamagalang ed siak, balet lemlemewen ko ray mambalaw ed siak.

1 Samuel 3:18

Kanyan imbaga nen Samuel iray amin a bengatla; anggapoy inyamut to. Inkuanen Eli, “Sikato so Katawan; gawaen toy antokaman ya isisipen ton maabig.”

1 Samuel 6:20

Kanyan inkuan na saray taga Bet-semes, “Siopay nayarin ontalindeg ed arap na Katawan, sayan masanton Dios? Iner so pangyakaran tayod Kaban to, pian naarawian to tayo la?”