Joel 2:13 - Maung A Balita Biblia

¹³ Ipapuso yoy panermen yo; aliwan masarag so pampilat yod kawes yo.” Pawil kayod Katawan a Dios yo, ta maabagey tan mapangasi; sikatoy maanos tan totooren toy sipan to; sipaparaan a mamirdona, aliwan manusa.

Maung a Balita Biblia

¹³ Ipapuso yoy panermen yo; aliwan masarag so pampilat yod kawes yo. Pawil kayod Katawan a Dios yo, ta maabagey tan mapangasi; sikatoy maanos tan totooren toy sipan to; sipaparaan a mamirdona, aliwan manusa.

Joel 2:13 Iomraidhean Croise

Genesis 37:29

Nen pinmawil ed samay bobun si Ruben tan anengneng ton anggapo lad may Jose, pinilat toy kawes to diad ermen to.

Genesis 37:34

Pinilat nen Jacob so kawes to diad ermen to tan nansolung na sako. Abayag a nanermen lapud si anak to.

2 Samuel 1:11

Diad ermen nen David pinilat toy kawes to, tan onya met so ginawa na saray totoo to.

1 Saray Arari 21:27

Nen asumpal a nansalitay Elias, pinilat nen Acab so kawes to, inekal to tan nansolung na sako. Ag angan, dinmokul ed sako, tan nanakar-akar a maerermen.

2 Saray Arari 22:11

Nen nadngel na ari so impangibasad libro, ginebyas toy kawes to lapud ermen to.

2 Saray Arari 22:19

nampatauli ka tan nampaabeba kad siak ginebyas moy kawes mo tan manakakis ka nen nadngel mo no panoy panusak ed Jerusalem tan saray totoon manaayam diman. Gawaen kon makapasinagem a nengnengen, sakey a pasen a say ngaran to et ikana na saray totoo a sakey a samba. Balet nadngel koy pikakasim,

2 Saray Arari 5:7

Kapambasa na ari na Israel ed samay sulat, pinilat toy kawes to a pangipanengneng toy inkagunigon to tan inkuanto, “Panoy panilalo na ari ed Siria a napaabig ko yan too? Dios ak sirin a walay pakayarid bilay tan patey? Mapatnag a labay toy mikolkol ed siak!”

2 Saray Arari 6:30

Kadngel na arid saya, pinilat toy kawes to diad inkagunigon to, tan naimano na saray totoon walad abay na padir ya akasolung na sako diad dalem na kawes to.

2 Saray Awaran 6:27

dengel mo pa rad tawen, O Katawan, tan pirdonam iray kasalanan da ray aripen mo, saray totoom ya Israelita tan ibangat mo pad sikaray maptek a pambilay da. Insan, O Katawan, ipelag moy oran ed dalin mo ya impatawir mod saray totoom.

Nehemias 9:17

Ag ira tinmoluk; alingwanan da ray amin a ginagawam; alingwanan da ray milagron ginagawam. Lapud panagpasirayew da amili ray sakey a pangulo a mamapawil ed sikara ed inkaaripen da ed Egipto. Balet manamirdona ka a Dios; mapangasi tan maaro ka, tan aliwa kan maipapasnuk. Alay kabaleg na ag mangoman a panangarom; ag mo ra inkaindan.

Say Libro nen Job 1:20

Lapud saya inmalagey si Job tan pinilat toy kawes to a pangipanengneng toy ermen to. Kiniskisan toy olo to tan intiblak tod dalin.

Saray Salmo 103:8

Maaro tan mapangasi so Katawan, aliwan maipapasnuk tan napno na ag mangoman a panangaro.

Saray Salmo 106:45

Lapud sikara, anunotan toy impisipanan to, tan lapud baleg a panangaro to nansalat na kanunotan.

Saray Salmo 34:18

Say Katawan maasinger ed saray nanaekalay biskeg na linawa; ilalaban to ray sigput a naandiay ilalo.

Saray Salmo 51:17

Say mapaabeban ispiritu so ibagat kod sika, O Dios; ag mo ipolisay so mapaabeba tan magbabawin puso.

Saray Salmo 86:15

Balet sika, Katawan, mapangasi tan maaro kan Dios, maanos ka, maabagey tan matoor ka lawas.

Saray Salmo 86:5

Katawan, maung tan manamirdona ka, napno kay ag mangoman a panangaro ed amin da ray mampipikasid sika.

Isaias 57:15

“Siak so atagey tan masanton Dios a mambibilay ed ando lan ando. Manaayam ak ed atagey tan masanton pasen, balet manaayaman ak met ed kawalaan da ray mapaabeba tan magbabawin totoo, pian nipawil koy biskeg na linawa ra tan say ilalo ra.

Isaias 58:5

No manaayuno kayo, papairapen yoy sikayon dili; itetewek yon singa dika so olo yo tan mangyaaplag kayoy sako tan tatayakan yoy dapul so dokulan yo. Ontan so tatawagen yon panagayuno? Abaloan yon manliket ak ed satan?

Isaias 66:2

Siak a dili so amalsad sansinakuban. Maliket ak ed saray mapaabeba tan magbabawi, saray walay takot tan mangoonur ed siak.

Jeremias 36:7

Gawam ya, ta ag la pigan mampikasi rad Katawan tan benegan day maoges a kabibilay da, lapud imbesngaw na Katawan ed sarayan totoo so mapalalon pasnuk tan sanuk tod sikara.”

Jeremias 41:5

wala ray walomplon lalakin sinmabi a nanlapud Sikem, Silo, tan Samaria. Inekal da ray balbas da, pinipilat da ray kawes da, tan sinasalger day laman da. Sankaawit da ray trigo tan say insinso ya ibagat da ed dalem na Timplo.

Jeremias 42:10

‘No labay yoy mansiansian manayam ed sayan dalin, iletneg ta kayo; ag ta kayo deralen; itanem ta kayo ya aliwan baguten. Akapaermen na mapalalo ed siak so deral ya inyakar kod sikayo.

Ezekiel 9:4

“Lakad intiron siudad na Jerusalem, ta markaan moy muling na balang sakey a toon maermen tan magunigon, lapud amin a makapaingungot a nagagawad siudad.”

Oseas 14:1

Sikayo ran totood Israel, pawil kayo la ed Katawan a Dios yo. Imparokul tan impelag kayo na kasalanan yo.

Jonas 3:9

Angangko mangoman na kanunotan so Dios; pakepaen to angangkoy pasnuk to, et ag itayo ompatey!”

Jonas 4:2

Kanyan nampikasi, “Katawan, ag ko ta la imbaga a kasakbayan a tinaynan koy baley ko et onyay gawaen mo? Lapud saman ya imbagak ginawak so anggaay nayarian ko ya ombatik ed Espanya! Amtak a maaro tan mapangasi kan Dios, maanos ka lawas, tan akaparaan ka lawas a mangoman na kanunotan mo tan ag ka manusa.

Mikias 7:18

Anggapoy dios a singa sika, O Katawan; pipirdonaen moy kasalanan da ray totoom ya apaliisan day patey. Ag ka mampasnuk ya ando lan ando, no ag ta panliketan mon ipanengneng so ag mangoman a panangarom.

Nahum 1:3

Aliwan maipapasnuk so Katawan; balet makapanyari tan ag to aabuloyan ya ag nadusa iray nankasalanan. Ombabagyo so pasen a panaakaran na Katawan; dabuk na saray sali to so kaloreman!

Saray Bilang 14:18

‘Siak, a Katawan, et aliwan maipapasnuk, tan ipanengneng ko so baleg a panangaron ag mangoman, tan pirdonaen ko so kasalanan tan say pananumlang. Balet andisaew a dusaen ko ray anak tan saray apo ya anggad kumatlo tan kumapat a kailalakan lapud saray kasalanan da ray atateng da.’

Saray Taga Roma 2:4

Babalawen mo kasiy baleg a panangasi, anos, tan tepel na Dios? Ag mo ta amtan say kaabigan na Dios et dagdagen to kan magbabawi?

TAGA-EFESO 2:4

Balet ag nasabsabaan so panangasiy Dios tan ontan lay kabaleg na panangaro tod sikatayo.

1 Timoteo 4:8

Walay kaabigan ya iiter na pangipasal na laman. Balet say pangipasal ed masanton panagbilay et lalon maabig so iter to, ta isipan toy bilay a para natan tan diad arapen.