Jeremias 5:6 - Maung A Balita Biblia

⁶ Lapud saya pateyen ira na saray lion a manlapud takel; bingbingkasen ira na saray asod katakelan a manlapud kalawakan; onloob ed saray baley da iray liopardo. Siopaman ed sikara so ompaway nabingbingkas ta amayamay lay kasalanan da, tan amimpiga-piga la ran inmaarawi ed Dios.

Maung a Balita Biblia

⁶ Lapud saya pateyen ira na saray lion a manlapud takel; bingbingkasen ira na saray asod katakelan a manlapud kalawakan; onloob ed saray baley da iray liopardo. Siopaman ed sikara so ompaway nabingbingkas ta amayamay lay kasalanan da, tan amimpiga-piga la ran inmaarawi ed Dios.

Jeremias 5:6 Iomraidhean Croise

2 Saray Awaran 36:14

Ontan met, saray pangulo na Juda, saray papari, tan saray karaklan et ag da tinoor so Dios, ta inalig da ray kaogsan da ray bansan walad kaliber-liber da diad impangigalang dad saray talintaoy diriyos. Diad onya, dinotakan day Timplo a pinasanto na Katawan.

Esdras 10:10

Inmalagey si Esdras a pari, insan nansalitad sikara. Inkuanto, “Aliwa kayon matoor, ta angaasawa kayoy bibiin taga arum a bansa, kanyan inaruman yoy kasalanan na Israel.

Esdras 9:6

Inkuan ko, “Ambaing ak a mangitangway olok ed arap mo, O Dios. Atagey nen saray olo mi so bontun na saray kasalanan mi; toktokdulen da lay katawenan.

Say Libro nen Job 10:16

No siak so onaligwas osilan mo ak a pateyen a singa lion; manggagawa ka na anggan saray milagro a mamasakit ed siak.

Saray Salmo 104:20

Ginawam so labi, et no ambilonget la, ompaway iray ayayep ed katakelan.

Saray Salmo 80:13

naalibuk tan natumba na saray animolok, tan nabwag na saray ayayep ed katakelan.

Isaias 1:23

Mananumpa iray pangulom tan kakaiba ra na saray matakew; labalabay day mangawat lan mangawat na rigalo tan saray pasoksok. Balet ag da iyaalagey ed korti iray olila, odino onderengel ed pankatonungan na saray balo.

Isaias 59:12

“Katawan, amayamay iray kaogsan a ginagawa mi sumpad sika. Aakusaen kami na saray kasalanan mi. Malinew so pakaamta mid saray kasalanan mi.

Jeremias 14:7

Ontatawag ed siak iray totook, ‘Anggaman ya aakusaen kami na saray kasalanan mi, tulongan mo kami pa, Katawan, onung na insipan mo. Amimpiga kamin inmarawid sika; nankasalanan kamid sika.

Jeremias 2:15

Singa ra lion a nangwam ed sikato; makmaksil so pangwam da. Ginawa ran andi-kakanaan so dalin to; aderal-deral iray baley to, kanyan anggapo lay manaayam.

Jeremias 2:17

Israel, sika so nansengegan ed saya! Inkaindan mo ak a Katawan a Dios mo, legan ya iwawanwan ta kad dalan.

Jeremias 2:19

Dusaen ka na dilin kaogsan mo; deralen ka na impangikaindan mod siak. Naamtaan mo no panoy kapaitan tan kaogsan na pangikaindan ed siak a Katawan a Dios mo, tan say ag mo pansiansian matoor ed siak. Siak, say Katawan a Dios a Makapanyarin-amin, so nansalita.”

Jeremias 2:31

Dengel kayod ibagak, amin yon totood Israel. Nagmaliw ak ta a singa kalawakan ed sikayo odino singa dalin ya ambilonget tan walay kaatapan? Akin sirin, totook, et ibabaga yon gawaen yoy labay yo, tan ag kayo la ompawil ed siak?

Jeremias 25:38

Inkaindan na Katawan iray totoo to a singa lion ya ontataynan ed ongib to. Nagmaliw a kalawakan so bansa ra lapud baleg a bakal tan lapud mapalalon petang na olo na Katawan.

Jeremias 30:14

Alingwanan kayo la na amin da ray kainarowan mo; ag da ki la labay. Dinogpaan ta kayon singa sakey a kalaban; mapalaloy inkadusa yo, lapud amayamay so kasalanan yo tan mapalaloy kaogsan yo.

Jeremias 30:15

Ag kayo manririklamo lapud saray sugat yo; ag kayo la napaabig. Onyay impanusak ed sikayo, lapud amayamay so kasalanan yo tan mapalaloy kaogsan yo.

Jeremias 4:7

Singa lion a manlalapud amutan ton pasen; say managderal na saray bansa et akaparaan la. Onsasabin maneral ed Juda. Naderal-deral iray siudad na Juda, anggapoy natilak a manayam ed sikara.

Jeremias 49:19

Onsabi ak a singa isasabid malambut a pastolan na sakey a lion a nanlapud makdel a takel ed gilig na Ilog na Jordan, insan ko biglan pataynanen ed bansa ra iray Edomita. Insan manoley ed bansa so pangulon pilien ko. Siopay mipara ed siak? Siopay mampangayan onlaban ed siak? Siopan manoley so makasumpad siak?

Jeremias 8:5

Totook, akin et onaarawi kayod siak tan ag kayo ompawil? Ag kayo oniikban ed saray talintaoy diriyos yo tan ag yo labay so ompawil ed siak.

Jeremias 8:7

Anggan saray gikgik ed liwang amta ra no oras lay kapapawil; saray malapati, saray mangalimpana, tan saray dolakak amta ra no kapigay iyakar dad arum a pasen a panayaman da. Balet, sikayo ran totook, ag yo amta ray ganggan ko a nepeg yo ran onuren.

Saray Tagleey 1:5

Nampalabo ray kalaban to; sikato lay walad silong na pakayari ra. Paniirapen na Katawan, lapud amin ya amayamay a kasalanan to; Anggan saray ogogaw adakep ira tan sikaray inaawit na kalaban da.

Ezekiel 16:25

Insasagar mod pitek so gangganam. Inter moy sikan dili ed balang toon dinmalan, tan inagew-agew alabas ka ni nen say marotak a bii. Amimpiga-pigam yan ginagawa.

Ezekiel 22:27

Saray pangulo na gobirno et singa ra saray asod katakelan a mambibingkas na pinatey dan ayayep. Mampapatey ira na totoo, pian onyaman ira.

Ezekiel 23:19

Inkaloor toy inkamarotak ton bii, ginagawa toy singa ginagawa to nen malangwer ni, nen sikatoy marotak a bii diad Egipto.

Daniel 7:4

Say onona singa lion so nengneng to, balet wala ray payak to a singa saray payak na agila. Nen ombabantay ak, nakal ira may payak to. Niatagey imay ayep tan nipaalagey a singa too. Insan niiter ed sikato so kanunotan na too.

Daniel 7:6

Nen ombabantay ak, sakey lamet ya ayep so pinmaway. Singa liopardo so nengneng to, balet walay apatiran payak ed beneg to a singa ra payak na manok, tan apatiray olo to. Niiter ed sikato so pakaoley.

Oseas 5:14

Ondogpa ak a singa lion ed Israel tan diad Juda. Siak a dili so mambingbingkas ed sikara, insan ko ra taynan. No igayugoy ko ra, anggapoy makapangilaban ed sikara.

Habacuc 1:8

“Maples nen saray liopardo iray kabayo ra, tan masebeg ira nen saray narasan ya asod katakelan. Onsasabin nanlapud arawin pasen iray kumakabayo ra; saray kabayo ra idepak-depak day dalin. Onsabi ran mapmaples ya ondogpan singa agilan manisibar na labay ton kanen.

Sofonias 3:3

Singa mangwam a lion iray opisyal to; singa narasan ya asod katakelan iray huis to, a diad gaway inkaagom to et ag to nataynan ya anggad kabwasan so pokel.

Saray Bilang 32:14

Et natan sinalatan yo ray atateng yo, sakey a balon kailalakan na makasalanan a totoo a sipaparaan a mangipadapo lamet na mapalalon pasnuk na Katawan ed Israel.

Puyan 13:2

Singa liopardo man ya ayep ya anengneng ko. Singa sali na uso ray sali to, tan singa sangiy lion so sangi to. Inter na dragon ed samay ayep so dilin pakayari to, say trono to, tan say baleg a pakaoley to.