Jeremias 42:18 - Maung A Balita Biblia

¹⁸ “Say Katawan a Dios na Israel kuanto, ‘No panoy impamasnuk kod saray totood Jerusalem, ontan met so pamasnuk kod sikayo, no onla kayod Egipto. Magmaliw kayon makapagiwgiw a nengnengen; ludlureyen kayo na saray totoo tan ikana ray ngaran yo a sakey a samba. Ag yo lan balut nanengneng yan pasen.’”

Maung a Balita Biblia

¹⁸ Say Katawan a Dios na Israel kuanto, No panoy impamasnuk kod saray totood Jerusalem, ontan met so pamasnuk kod sikayo, no onla kayod Egipto. Magmaliw kayon makapagiwgiw a nengnengen; ludlureyen kayo na saray totoo tan ikana ray ngaran yo a sakey a samba. Ag yo lan balut nanengneng yan pasen.

Jeremias 42:18 Iomraidhean Croise

2 Saray Awaran 34:25

Impolisay da ak tan nambabagat irad saray arum a diriyos, kanyan impanpasnuk da ak lapud amin a ginagawa ra. Pinmetang so olok ed Jerusalem, et ag ombetel.

Isaias 30:3

Balet anggapoy pakayari na ari ya ontulong ed sikara, tan saray panangyagel na Egipto et mansumpal ed kaderal da.

Isaias 65:15

Ikana na saray pinilik a totoo so ngaran yo a sakey a samba. Siak a Katawan a Dios pateyen ta tayo. Balet itdan ko na balon ngaran iray mangoonur ed siak.

Jeremias 18:16

Ginawa ran makapataktakot yan dalin, a nabalaw ya anggad angga. Nataktakot ya amin iray ondalan, lapud saray nanengneng da; ipeyeng-peyeng day olo rad pankelaw da.

Jeremias 22:27

Pampilalekan yon nanengneng lamet yan bansa, balet ag ki lan balut makapawil.”

Jeremias 23:40

Ipelag ko rad andi-anggaan a kababaingan tan kabandayan ya ag balut nalingwanan.”

Jeremias 24:9

Iyakar kod sikara yan deral pian ontakot iray amin a bansa ed mundo. Ludlureyen ira na saray totoo, sutil-sutilen da ra, balbalawen da ra, tan ikana ran sakey a samba so ngaran da anggan iner a pasen a pangikayatan kod sikara.

Jeremias 25:9

‘Tawagen kon amin iray totood baybay tan say aripen kon Ari Nabucodonosor na Babilonia. Pibakalen ko ra sumpad sayan bansa tan amin a manaayam dia tan amin a kaliber-liber ton bansa. Deralen ko ya anggad angga yan bansa tan saray kaabay to, paolyan ko ran aderal-deral ya anggad angga, makapataktakot tan makapasinagem iran nengnengen.

Jeremias 26:6

No ituloy yoy ag mangonur ed siak, gawaen kod sayan Timplo so singa samay ginawak ed Silo tan saray amin a bansa ikana ray ngaran na sayan siudad a sakey a samba.”

Jeremias 29:18

Osilan ko ra na bakal, eras, tan salot, pian diad ontan saray totood amin a bansa ed mundo et nataktakot ira ed nanengneng da. Inerman a pasen a pangikayatan kod sikara, saray totood man et natalagnaw tan nataktakot ira ed agawad sikara. Ludlureyen da ra tan ikana ran sakey a samba so ngaran da.

Jeremias 29:22

No saray totoon niakar a priso ed Babilonia manlapud Jerusalem et labay dan isamba so sakey a too, ikuanda, ‘Gawaen na Katawan komun ed sika so singa ginawa tod kindi Sedekias tan Acab, a say ari na Babilonia et inkakalut to ran mabilay.’

Jeremias 33:5

Onlaban iray pigara ed saray taga Babilonia a mampanod sayan siudad na saray bangkay da ray kabilen ko lapud pasnuk tan sanuk ko. Inmarawi ak ed sayan siudad lapud saray maoges a bengatlan ginagawa na saray totoo to.

Jeremias 44:12

Andi-saew a deralen kon amin iray akeraan a totood Juda tan talagan labay day manayam ed Egipto. Amin da, abeba may atagey so kipapasen, ompatey irad bakal odino eras diad Egipto. Magmaliw iran makapagiwgiw a nengnengen; ludlureyen ira na saray totoo tan ikana ray ngaran da a sakey a samba.

Jeremias 44:22

Diad sayan agew aderal-deral so dalin yo tan anggapoy manaayam. Nagmaliw a makapagiwgiw a nengnengen tan ikakana na saray totoo so ngaran to a sakey a samba, lapud ag la naanosan na Katawan so marotak tan maoges a gagawaen yo.

Jeremias 44:6

Kanyan nampasnuk ak a maung ed saray baley na Juda tan diad saray dalan na Jerusalem, tan pinopoolan ko ra. Aderal-deral ira tan nagmaliw iran makapagiwgiw a nengnengen, a singa kipapasen da natan.

Jeremias 44:8

Akin et pampapasnuken yo ak diad pangigagalang yod saray talintaoy diriyos tan diad pangibabagat yod saray arum a diriyos diad Egipto a nila yon panaayaman? Gagawaen yo ya a paneral ed sikayon dili, pian ludlureyen kayo na amin iray bansa diad tapew na dalin tan ikana ray ngaran yo a sakey a samba?

Jeremias 6:11

Napno ak na sanuk mo, Katawan, tan naooputan ak lay anos a mamokpok ed sanuk mo.” Insan inkuan na Katawan ed siak, “Idapom so sanuk ko ed saray ogogaw a walad daladalan tan diad pantitiponan da ray tobun-balo. Nadakep iray asawan lalaki tan saray asawan bibii, tan anggan saray mamatakken lan maung.

Jeremias 7:20

Kanyan siak, say Katawan a Dios, idapok ed sayan Timplo so ontan lan pasnuk ko. Idapok ed saray totoo, saray ayayep, tan anggan diad saray kakiewan tan saray tanaman. Say pasnuk ko singa pool ya anggapoy makadepdep.

Saray Tagleey 2:4

Singa kalaban ya impaarap toy pana tod sikatayo; Pinatey ton amin iray ikikinon tan panliliketan tayo. Anggan diad Jerusalem alikna tayoy manliub a pasnuk to.

Saray Tagleey 2:6

Minekmek toy Timplo ya angigalangan mid sikato; Pinatonda to ray masanton agew tan saray Agew na Panagpainawa. Ari may pari, alikna ray biskeg na petang na olo to.

Saray Tagleey 4:11

Impelag na Katawan so intiron biskeg na petang na olo to; pinoolan to ya anggad dalin so siudad na Sion.

Ezekiel 20:34

Ipanengneng kod sikayoy pakayarik tan say pasnuk ko no tiponen ta kayon amin manlapud saray bansan nikayatan yo.

Ezekiel 22:22

Natonaw ira ed Jerusalem a singa katonaw na pilak ed palbaan, et diad satan naamtaan da a liliknaen da so sulit na pasnuk ko, siak a Katawan.”

Daniel 9:11

Sinumlang na amin ya Israelita iray ganggan mo tan ag da nilabay a dengelen so imbagam. Nankasalanan kamid sika, kanyan impelag mod sikami iray samban nisulat ed Ganggan nen Moises ya aripen mo.

Daniel 9:27

Pitoy taon a saman a manoley et nawalaan na malet a sipanan ed amayamay a totoo, tan kalabas na kapalduad sayan panaon, patondaen toy pangisaklang na saray bagat. Nipasen ed sankatageyan a parti na Timplo so Makapataktakot a Managderal tan mansiansiad man ya anggad onsabi so inggetar na Dios a pangangga na samay angipasen diman.”

Oseas 7:16

Itutuloy day onsingger ed sakey a dios ya anggapoy pakayari. Ag ira napanmatalkan a singa pikewet a pana. Lapud mapaatagey ed panagsalita iray pangulo ra ompatey irad ispada. Diad ontan elekan ira na saray Egipsio.”

Nahum 1:6

No mamapasnuk so Katawan, siopay makapaliis ed patey? Siopay makatepel na ontan lan sanuk to? Iibung toy manliub a pasnuk to; diad arap to nakukusbo tan ondadabuk iray baton-dampay.

Zacarias 8:13

Sikayo ran totood Juda tan Israel! Nen saman saray sangkaili mansasambaan ira ya ikuandad sakey tan sakey, ‘Ondapo met komun ed sika so deral a singa samay deral a dinmapo ed Juda tan Israel!’ Balet ilaban ta kayo, insan saraman a sangkaili ikuandad sakey tan sakey, ‘Nagamuran mo met komun so bindision a singa samay bindision ya agamuran na Juda tan Israel!’ Kanyan pabiskeg yoy linawa yo, ag kayo ontatakot.”

Saray Bilang 5:27

No akikaloguran imay bii, pairapen na samay danum; onlarag so eges to tan onkebet so kayaryan to. Magmaliw a panalwaran ed saray kadalaan to so ngaran to.

Puyan 14:10

inomen toy alak, say alak na pasnuk na Dios ya imbales ton anggapoy lauk ed kupay sanuk to! Napairap ed apoy tan asupri diad arap na Kordiro tan saray masanton anghil.