Jeremias 31:28 - Maung A Balita Biblia

²⁸ Onung na impangasikasok ed impamagut, impangibalsak, impangipatalo, impaneral, tan impamataynan kod sikara, ontan met so pangasikasok ed pangiletneg tan pamasimbaloy kipapasen da.

Maung a Balita Biblia

²⁸ Onung na impangasikasok ed impamagut, impangibalsak, impangipatalo, impaneral, tan impamataynan kod sikara, ontan met so pangasikasok ed pangiletneg tan pamasimbaloy kipapasen da.

Jeremias 31:28 Iomraidhean Croise

Say Libro nen Job 29:2

“Komun ta napapawil ira may agew a linmabas, nen bambantayan ak na Dios!

Saray Salmo 102:16

No ipaalagey lamet na Katawan so Sion, ipaamta toy kagalangan to.

Saray Salmo 147:2

Say Katawan ipapaalagey to lamet so Jerusalem; papapawilen to ray Israelitan nibantak ed sananey a bansa.

Saray Salmo 69:35

Ilaban toy Jerusalem tan iletneg to lamet iray baley ed Juda. Manayam irad may totoo to tan kayaryanen day dalin;

Jeremias 1:10

Natad sayan agew iiter kod sikay pakaoley ed saray bansa tan saray nanarian, pian sikay mamagut tan mangigeba, maneral tan manalo, mamaalagey tan mangiletneg.”

Jeremias 1:12

Inkuan na Katawan ed siak, “Tua tay imbagam, tan mambabantay ak, pian naimatunan koy pakasumpal na saray sinalitak.”

Jeremias 24:6

Asikasoen ko ra tan ipawil ko rad sayan dalin. Iletneg, aliwan temeken, ko ra; itanem, aliwan baguten, ko ra.

Jeremias 32:41

Panliketan koy panggawak na kamaungan ed sikara, tan pansiansiaen ko ran iletneg ed sayan dalin.

Jeremias 32:42

“Onung na impangyakar koy deral ed sarayan totoo, ontan met iter kod sikaray amin a maung a bengatla ya insipan kod sikara.

Jeremias 42:10

‘No labay yoy mansiansian manayam ed sayan dalin, iletneg ta kayo; ag ta kayo deralen; itanem ta kayo ya aliwan baguten. Akapaermen na mapalalo ed siak so deral ya inyakar kod sikayo.

Jeremias 44:27

Ag ta kayon balut paaligwasen; ingen, naderal kayo. Amin yon taga Juda a manaayam ed Egipto et ompatey ed bakal o diad salot, anggad anggapoy anggan sakey a nakeraan ed sikayo.

Jeremias 45:4

“Balet siak a Katawan, babagbagen ko so impaalagey ko tan babaguten ko so intanem ko. Gawaen ko ya ed intiron mundo.

Ezekiel 19:12

Balet diad gaway pasnuk na totoo nilamut dan binagut tan imbantak da ed dalin. Say dagem a nanlapud bokig et pinamaga toy bunga to. Apoter-poter iray sanga to; impamaga ra tan apoolan ira.

Ezekiel 36:10

Parakelen koy bilang yo. Manayam kayod saray siudad tan pasimbaloen yon ipaalagey iray aderal-deral a bengatla.

Daniel 9:14

O Katawan a Dios mi, akaparaan ka la nen saman a manusad sikami, et dinusa mo kamin tua, lapud matonung lawas so gagawaen mo, tan ag mi ka dinengel.

Daniel 9:25

Amtaen tan talusan mo ya: Manlapud kipaakseb na ganggan a nipawil ed gendat a kipapasen so Jerusalem ya anggad isabi na pangulon pinili na Dios, mamimpiton pitoran taon so napalabas. Nipaalagey lamet so Jerusalem; nipawil iray dalan tan saray mabiskeg a tirinsira to, tan mansiansia ra ya a mamimpiton anemaplo tan duan taon, balet panaon ya na saray gunigon.

Amos 9:11

Say Katawan kuanto, “Onsabiy agew ya ipawil koy gendat a kipapasen na nanarian nen David, a kaparpara toy sakey ya abung ya aderal-deral ed inkageba to. Apigeren ko ray padir to tan ipaalagey kon singa gendat.

Amos 9:14

Ipawil kod dalin da iray totook. Pasimbaloen dan ipaalagey iray aderal-deral a siudad da tan manayam irad man; mantanem ira na saray ubas tan inomen da ray alak da; mantanem ira na saray tanaman tan kanen da ray bunga ra.

Zacarias 8:14

Say Katawan a Makapanyarin-amin kuanto, “Nen impanpasnuk ak na saray lalaki yo, ninunot ko ya ipadalan so deral ed sikara tan ag ko inoman so kanunotan ko, no ag ingen intuloy kon sinumpal iray planok.

Zacarias 8:15

Balet natan nununoten ko a bindisionan iray totood Jerusalem tan Juda. Kanyan ag kayo natatakot.

Saray Gawgawa 15:16

‘Kasumpal to ya, ompawil ak, kuay Katawan tan ipaalagey ko lamet so nanarian nen David. Pasimbaloen kon ipaalagey iray deral-deral to tan pabiskegen ko lamet.

Deuteronomio 30:9

Say Katawan paaligwasen to kayo ed amin a gawaen yo; nawalaan kayo na amayamay ya anak tan amayamay ya ayayep, tan makaani kayo na daakan ed saray alog yo. No kaonungay impanliket to ya amaaligwas ed saray lalaki yo, ontan met so panliket ton mamaaligwas ed sikayo,