Jeremias 27:13 - Maung A Balita Biblia

¹³ Akin et ompatey kayod bakal, o diad salot? Sikato yay imbaga na Katawan a nagawa ed dinan man a bansan ag paoleyan ed ari na Babilonia.

Maung a Balita Biblia

¹³ Akin et ompatey kayod bakal, o diad salot? Sikato yay imbaga na Katawan a nagawa ed dinan man a bansan ag paoleyan ed ari na Babilonia.

Jeremias 27:13 Iomraidhean Croise

Probirbio 8:36

Balet say toon ag makarumog ed siak, papasakitan toy sikaton dili; siopamay mamobosul ed siak inaro toy patey.”

Jeremias 17:4

Napasoot kayon mangikban na dalin ya inter kod sikayo. Pagmaliwen ta kayon aripen na saray kalaban yo diad dalin ya ag yo kabat, lapud say pasnuk ko et singa apoy, tan ondalang ya anggad angga.”

Jeremias 24:9

Iyakar kod sikara yan deral pian ontakot iray amin a bansa ed mundo. Ludlureyen ira na saray totoo, sutil-sutilen da ra, balbalawen da ra, tan ikana ran sakey a samba so ngaran da anggan iner a pasen a pangikayatan kod sikara.

Jeremias 27:8

“Balet no walay bansa odino nanarian ya ag onsilong ed pakaoley nen Nabucodonosor tan ag ontoluk ed pakaoley to, dusaen ko itan a bansa diad panamegley na bakal, eras, tan salot, anggad sigput a napaderal kod sikato.

Jeremias 38:2

a say Katawan inkuanto, “Ompatey ed bakal, odino eras, odino salot so siopaman a manayam ed dalem na siudad. Balet ag napatey so siopaman ya ompaway ed siudad ta onsukod saray taga Babilonia; nipaliis ed patey tan mambilay.”

Jeremias 38:20

Inkuankod sikato, “Ag ka nipalimad sikara. Kerewen kod sika ya onur moy salitay Katawan onung na imbagak lad sika; diad ontan maung so pansumpalan mo. Nipaliis kad patey.

Jeremias 38:23

Insan inkuanko ni, “Amin da ray bibii tan saray anak mo et nipaway iran niakar ed saray taga Babilonia, tan ag mo ra nibatikan. Nadakep ka na ari na Babilonia, tan napoolan yan siudad.”

Ezekiel 14:21

Sikato ya so ibabaga na Katawan a Dios: “Mangipadalan ak na mapalalon dusa ed Jerusalem—bakal, eras, ayayep ed katakelan, tan salot—a maneral ed saray totoo tan saray ayayep.

Ezekiel 18:24

“Balet no say toon matonung et ontondan manggaway kamaungan tan onggapo lan manggaway kaogsan, a salanti saray makapaingungot a gagawaen na saray totoon maoges, mansiansia kasin mambilay? Andi! Ag la nanunotan iray antokaman a ginawa ton kamaungan. Ompatey lapud aliwan matoor tan lapud saray kasalanan to.

Ezekiel 18:31

Tondaan yo la ray kaogsan a gagawaen yo, tan iyalaan yo lay sikayon dili na balon isip tan puso. Akin et labay yoy ompatey, sikayo ran Israelita?

Ezekiel 33:11

Ibagam ed sikara a legan a siak so mabilay a Katawan a Dios, ag ko panliketan so ipatey na toon makasalanan. Labay ko ingen a magbabawid saray kasalanan to tan mambilay. Israel, tondaan mo lay kaogsan a gagawaen mo. Akin et labay moy ompatey?