Jeremias 26:2 - Maung A Balita Biblia

² say Katawan inkuantod siak, “Manalagey kad patio na Timplo tan ibawag mo ray ingganggan kon salitaen mod saray totoon nanlapud saray baley na Juda a mangigalang diman. Ibagam ya amiy bengatla.

Maung a Balita Biblia

² say Katawan inkuantod siak, Manalagey kad patio na Timplo tan ibawag mo ray ingganggan kon salitaen mod saray totoon nanlapud saray baley na Juda a mangigalang diman. Ibagam ya amiy bengatla.

Jeremias 26:2 Iomraidhean Croise

Jeremias 1:17

Mamparaan ka, Jeremias; laka, ta ibagam ed sikaray amin ya ingganggan kod sikan salitaen mo. Ag ka la natan ontatakot ed sikara; ta no andi, pagmaliwen ta kan lalon ontakot no wadman ka lad sikara.

Jeremias 1:7

Balet inkuan na Katawan ed siak, “Ag mo ibabagan ogaogaw ka; ingen, lakad saray totoon pangibakian kod sika, ta ibagam ed sikaray amin ya igaganggan kod sika.

Jeremias 19:14

Insan tinaynan koy Tofet ya angibakian na Katawan ed siak a pangibawagan koy salita to. Linma ak a nanalagey ed patio na Timplo tan imbagak ed amin a totoo

Jeremias 23:28

Say propitan walay kogip to nepeg ton ibaga a sakey labat a kogip, balet say propitan walad sikatoy salitak nepeg a matoor ton ipulong. Antoy piparaan na dayami ed ilik?

Jeremias 25:2

Inkuankod amin a totood Juda tan Jerusalem,

Jeremias 28:5

Insan akisalita ak ed kinen propita Ananias diad arap da ray papari tan saray arum a totoo a manalalagey ed dalem na Timplo.

Jeremias 36:10

Nen manderengel ya amin iray totoo, binasa nen Baruc ed samay nilokut a babasaen iray amin ya imbagak. Ginawa to ya ed Timplo, diad kuarto na sikritariod ari a si Gemarias a lakin anak nen Safan. Walad bandad tagey a patio so kuarto to, diad lolooban na Puirtan Balo na Timplo.

Jeremias 42:4

Inebetan ko ra, “Maung itay anunotan yo. Ipikasi ta kayod Katawan a Dios tayo tan ibagak so kekerewen yo. No antoy ibaga to, salitaen kod sikayo. Anggapoy iyamut kod sikayo.”

Jeremias 7:27

“Kanyan, Jeremias, salitaen mo ra yad saray totook, balet ag da ka dengelen; tawagen mo ra, balet ag da ka ebatan.

Ezekiel 3:10

Intuloy na Dios ya inkuan, “Sika a toon ompatey, dengel kan maung tan tandaan moy ibagak ed sika.

Ezekiel 33:7

“Natan, sika a toon ompatey, gawaen ta ka a managbantay na bansa na Israel. Nepeg mon ipasabid sikara iray pasakbay ya iiter kod sika.

Ezekiel 40:4

Inkuantod siak, “Mambantay ka, sika a toon ompatey. Mandengel kan maung tan apiger mon imanoen ya amin iray ipanengneng kod sika, ta sikato tan so makasengeg na angyakaran kod sika dia. Nepeg mon ibagad saray totood Israel iray amin a nanengneng mo.”

Mateo 28:20

tan ibangat yo ran mangonur ed amin ya ingganggan kod sikayo. Tan tandaan yo! Siak, ibaan ta kayo lawas anggad pansamput na panaon.”

Lucas 19:47

Nambabangat si Jesus ya inagew-agew ed Timplo. Saray manonan papari, saray iskriba, tan saray manonad baley et labay dan pateyen si Jesus.

Juan 18:20

Inmebat si Jesus, “Ag ko iyaamut so pampapaliwawak ed saray totoo. Mambabangat ak a naynay ed saray sinagoga tan diad Timplo a pantitiponan da ray Judio. Ag ak balut nansalitad maamut.

Juan 8:2

Kabkabwasan nen pinmawil ed Timplo. Minongkug na dakel a totoo, kanyan inmirung tan binangatan to ra.

Saray Gawgawa 20:20

Amta yo ya anggapoy ag ko imbaga a makatulong ed sikayo diad impambabangat tan impanpupulong kod sikayo, diad arap na karaklan man odino diad kaabungan yo.

Saray Gawgawa 20:27

Ta imbagak ed sikayoy amin a linaway Dios.

Saray Gawgawa 5:25

Balet nitan lay sakey a laki ya inkuanto, “Saramay impriso yo et wadman ira natan ed Timplo a mambabangat!”

Saray Gawgawa 5:42

Inagew-agew, diad Timplo tan diad saray kaabungan, intuloy day nambabangat tan nampupulong na nipaakar ed kinen Jesus, say Cristo.

Deuteronomio 12:32

“Onur yo ray amin ya ingganggan kod sikayo; ag yo ra pasosolukan odino babawasan.

Deuteronomio 12:5

Diad dalin na amin da ray tribu yo, say Katawan mamili na sakey a pasen a panayaman to a sikatoy laen na saray totoo a pangigalangan ed sikato.

Deuteronomio 4:2

Ag yo aaruman so igaganggan kod sikayo, tan ag yo babawasan. Onur yo ray ganggan na Katawan a Dios yo, saray ganggan ya inter kod sikayo.

Josue 8:35

Balang sakey ed saray ganggan nen Moises et imbasa ra nen Josue ed amin a nantitipon a totoo, pati saray bibii tan saray ogogaw, ontan met ed saray taga arum a bansa a manaayam ed kawalaan da.

Puyan 22:19

Siopamay mangekal na antokaman ed saray propisiyan nisulat dia, ekalen na Dios met so pinanabang tod bungay kiew na bilay tan say pinanabang tod Masantod Siudad, ya asalita rad sayan libro.