Jeremias 2:8 - Maung A Balita Biblia

⁸ Ag tinepet na saray papari, ‘Kawa-laan na Katawan?’ Ag ak kabat na saray dilin paparik. Nilabanan ak na saray manoley; nansasalita ray propita diad ngaran nen Baal tan angigagalang irad saray andi-kakanaan a talintaoy diriyos.”

Maung a Balita Biblia

⁸ Ag tinepet na saray papari, Kawa-laan na Katawan? Ag ak kabat na saray dilin paparik. Nilabanan ak na saray manoley; nansasalita ray propita diad ngaran nen Baal tan angigagalang irad saray andi-kakanaan a talintaoy diriyos.

Jeremias 2:8 Iomraidhean Croise

1 Saray Arari 18:22

Insan inkuanen Elias, “Bukbukor ko lay atilak a propita na Katawan, balet apat a lasus iray propita nen Baal.

1 Saray Arari 18:29

Nanlalabir-labir tan naneeyag-eyag ira ya anggad onngangarem la; balet anggapoy ebat, anggapoy anggan narengel a tanul.

1 Saray Arari 18:40

Ingganggan nen Elias, “Erel yo ray propita nen Baal; ag kayo mamapabatik na anggan sakey ed sikara!” Inerel da ra, insan inyakar nen Elias iran amin ed Kolus na Kison tan diman to ra pinapatey.

Say Libro nen Job 35:10

Balet ag ira onsisingger ed Dios ya amalsa ed sikara, anta sikatoy makapangiter ed sikara na ilalo no mapalaloy kagugunigon da.

Isaias 28:7

Abuek iray pati propita tan saray papari, kanyan mandongilngil ira. Mapalaloy karakel na nainom dan alak, kanyan mantumba ra tan ag da amtay gagawaen da. Akainom a maung iray propita, kanyan ag da natalusay pasingayew na Dios, tan saray papari et mapalaloy inkabuek da, kanyan aliway sintinsia ra ed saray kason niaapireng ed sikara.

Isaias 29:10

Impantemeg kayo na Katawan, ngalngali kayo la makalirep na malmalet. Saray propita so nepeg komun a pinagkamata na saray totoo, balet pinerengan ira na Dios.

Isaias 30:5

magbabawi ray totood Juda diad impanmatalek dad ag napampiaan a bansa, say bansan ag makatulong no ag ingen mangipelag ed sikarad kababaingan.”

Jeremias 10:21

Inmebat ak, “Anggapoy kalakal iray pangulo mi; ag ira papaiwanwan ed Katawan. Sikato yay makasengeg no akin et aliwa ran maaligwas, tan nikaykayat iray totoo tayo.

Jeremias 12:10

Saray amayamay a manoley a taga arum a bansa et dineral da so kaubasan ko; ginagatinan da ray kaalogan ko; ginawa ran kabueran so marakerakep a dalin ko.

Jeremias 16:19

Katawan, sika so mangyaagel ed siak, tan mangiiter na biskeg ko; tutulongan mo ak no panaon na gunigon. Onlad sika ray bansan nanlapud nandoroman sokung na mundo tan ikuanda, “Tila-tilan diriyos labat so walad saray lalaki mi; anggapo lay arum no ag ta saray andi-kakanaan a talintaoy diriyos.

Jeremias 18:18

Insan inkuan na saray totoo, “Pankokomplutan tayo lay Jeremias! Wala ray paparin mangibangat ed sikatayo, saray makabat a totoon manimbawad sikatayo, tan saray propitan mangibaga na salitay Katawan. Akusaen tayo, tan tondaan tayo lay ondengel ed ibabaga to.”

Jeremias 2:11

Wala tay bansan sinalatan to ray diriyos to, anggaman ya aliwan petepeteg iray diriyos da? Balet insalat ak na saray totook, say Dios ya angiter ed sikara na kagalangan; insalat da ak ed saray diriyos ya anggapoy nagawaan dan para sikara.

Jeremias 2:6

Inekal da ak lad kanunotan da, anggaman a siak so angyagel ed sikarad Egipto tan angiwanwan ed sikarad kalawakan: sakey a dalin na kalawakan tan kaabutan, sakey a dalin ya amaga tan walay kaatapan, sakey a dalin ya anggapoy ondadalan tan anggapoy anggan manayam.

Jeremias 4:22

Say Katawan kuanto, “Anggapoy kalakal iray totook; ag da ak kabat. Singa ra ogogaw ya anggapoy kalakal; anggapoy pakatalus da. Marunong iran manggaway kaogsan, balet ag da amtay manggaway kamaungan.”

Jeremias 5:31

saray propita tilan amin so sasalitaen da; saray papari manooley ira diad panangiganggan na saray propita, et onya so labay da ray totook a nagawa. Balet antoy gawaen da no mangangga la yan amin?”

Jeremias 7:8

“Imano yo, andi-kakanaan so panmamatalek yod managpalikdon balikas.

Jeremias 9:14

Anawet so olo ra, kanyan inonur day labay dan dili. Inggalang da ray talintao nen Baal onung na imbangat na saray lalaki ra a gawaen da.

Ezekiel 22:26

Susumlangen na saray papari so ganggan ko tan dodotakan da so antokaman a masanto. Ag da pandodomaen so masanto tan say aliwan masanto. Ag da ibabangat so pandomaan na bengatlan malinis tan say aliwan malinis, tan anggapoy walad sikara so Agew na Panagpainawa. Lapud saya, ag ak papagalangan na saray totood Israel.

Ezekiel 34:2

Inkuanto, “Sika a toon ompatey, mansalita ka na sumpa ed saray manoley ed Israel. Mampropisiya kad sikara tan ibagam ed sikara so ibabagak, siak a Katawan a Dios: Asintinsiaan kayo lan nadusa, sikayon pumapastol ed Israel! Aasikasoen yoy sikayon dili, balet ag yon balut ipapastol iray karniro.

Oseas 4:6

Adusa ray totook lapud ag da ak bibirbiren a Dios. Sikayon papari et ag yo ak binirbir a Dios yo tan impolisay yo ray bangat ko, kanyan ipolisay ta kayo tan ag ko birbiren a paparik iray anak yon lalaki.

Habacuc 2:18

Antoy kana na sakey a talintaoy dios? Sakey labat a ginawa na sakey a too, et anggapoy nibaga tod sikayo no ag katilaan labat. Antoy kaabigan a niiter na talintao diad panmatalek ed sikato na nanggawad sikato? Say talintao et sakey labat a dios ya ag anggan makasalita.

Mateo 16:26

Antoy nagonggona na sakey a toon nakayarian toy intiron mundo, no naandi lamlamang so bilay to? Anggapoy nibayar na too a pamapawil toy bilay to.

Lucas 11:52

“Pakaskasi ki la, sikayon makabat ed Ganggan! Inyamut yoy tombuk a panaglokas na puirtay abung na kakabatan. Anta ag yo la labay so onloob, sesebelan yo ni ray malabay ya onloob!”

Juan 16:3

Gawaen da ra yad sikayo, ta ag da kabat so Ama odino say siak.

Juan 8:55

Ag yo ni akabatan, balet kabkabat ko. No ibagak ya ag ko kabat, matila ak met a singa sikayo. Balet kabkabat ko tan oonuren koy salita to.

2 CORINTO 4:2

Inkaindan mi la ray maamut tan makapabaing a gawa. Ag kami mamapalingo odino mamipikewet na salitay Dios. Diad liwaway katwaan, mambibilay kami ed arap na Dios, tan imamatalek miy sikamin dili ed balang konsinsia na too.

Deuteronomio 33:10

Ibangat da ray totoom a mangonur ed Ganggan mo; Mangisaklang ira na saray bagat ed altar mo.

1 Samuel 12:21

Ag kayo manlilingkur ed saray tila-tilan diriyos; ag da kayo natulongan odino nilaban, ta aliwa ran peteg a Dios.

1 Samuel 2:12

Maoges iray lalakin anak nen Eli. Ag da italtalek so Katawan