Jeremias 18:16 - Maung A Balita Biblia

¹⁶ Ginawa ran makapataktakot yan dalin, a nabalaw ya anggad angga. Nataktakot ya amin iray ondalan, lapud saray nanengneng da; ipeyeng-peyeng day olo rad pankelaw da.

Maung a Balita Biblia

¹⁶ Ginawa ran makapataktakot yan dalin, a nabalaw ya anggad angga. Nataktakot ya amin iray ondalan, lapud saray nanengneng da; ipeyeng-peyeng day olo rad pankelaw da.

Jeremias 18:16 Iomraidhean Croise

1 Saray Arari 9:8

Bontun na saray deral-deral so pagmaliwan na sayan Timplo, tan nabiglaan tan nikelawan so siopaman ya ondalan. Tepetan da, ‘Akin et ginawa na Katawan so onya ed sayan dalin tan diad sayan Timplo?’

2 Saray Awaran 29:8

Lapud saya akapasnuk so Katawan ed Juda tan Jerusalem, et nikelawan tan ataktakot so balang sakey lapud ginawa tod sikara. Malinlinew so pakaamta yod sayan inkagawa.

Saray Salmo 109:25

Elek-elekan ak na saray totoon makanenengneng ed siak; mameyang-peyeng iran mamabalaw ed siak.

Saray Salmo 22:7

Luludlureyen ak na amin da ray makanenengneng ed siak; dilat-dilatan tan mameyeng-peyeng ira.

Saray Salmo 44:14

Ginawa mo kamin panelekan na saray arum a bansa; mameyeng-peyeng irad panlelemlemew dad sikami.

Isaias 37:22

inkuan na Katawan, “Eelekan ka na siudad na Jerusalem, Senakerib, tan luludlureyen to ka.

Isaias 6:11

Tinepet ko, “Katawan, anggad kapigan ya onyay nagawa?” Inmebat so Katawan, “Anggad aderal-deral tan anggapo la ray totoon manayam ed siudad—anggad anggapo la ray manayam ed saray abung—anggad say dalin et andi-kakanaan lan ataynan.

Jeremias 19:8

Iyakar kod sayan siudad so onyan makapasinagem a deral pian balang sakey ya ondalan et natalagnaw tan nikelawan.

Jeremias 25:9

‘Tawagen kon amin iray totood baybay tan say aripen kon Ari Nabucodonosor na Babilonia. Pibakalen ko ra sumpad sayan bansa tan amin a manaayam dia tan amin a kaliber-liber ton bansa. Deralen ko ya anggad angga yan bansa tan saray kaabay to, paolyan ko ran aderal-deral ya anggad angga, makapataktakot tan makapasinagem iran nengnengen.

Jeremias 29:18

Osilan ko ra na bakal, eras, tan salot, pian diad ontan saray totood amin a bansa ed mundo et nataktakot ira ed nanengneng da. Inerman a pasen a pangikayatan kod sikara, saray totood man et natalagnaw tan nataktakot ira ed agawad sikara. Ludlureyen da ra tan ikana ran sakey a samba so ngaran da.

Jeremias 42:18

“Say Katawan a Dios na Israel kuanto, ‘No panoy impamasnuk kod saray totood Jerusalem, ontan met so pamasnuk kod sikayo, no onla kayod Egipto. Magmaliw kayon makapagiwgiw a nengnengen; ludlureyen kayo na saray totoo tan ikana ray ngaran yo a sakey a samba. Ag yo lan balut nanengneng yan pasen.’”

Jeremias 44:12

Andi-saew a deralen kon amin iray akeraan a totood Juda tan talagan labay day manayam ed Egipto. Amin da, abeba may atagey so kipapasen, ompatey irad bakal odino eras diad Egipto. Magmaliw iran makapagiwgiw a nengnengen; ludlureyen ira na saray totoo tan ikana ray ngaran da a sakey a samba.

Jeremias 48:27

Moab, nanunotan mo no panoy impanluludlurey mod saray totood Israel? Impapasen mon kaolup ira na saray matakew, kanyan mameyeng-peyeng ka kapag nasalitam ira.

Jeremias 49:13

Sinambaan kon dili a say siudad na Bozra et magmaliw a makapataktakot a nengnengen tan sakey ya andi-kakanaan; ludlureyen na saray totoo tan ikana ray ngaran to a sakey a samba. Ando lan andon naderal iray kaliber-liber ton baley. Siak, say Katawan, so nansalita.”

Jeremias 49:17

Say Katawan inkuanto, “Makapasinagem so nagawa ed Edom, kanyan nikelawan tan nataktakot ed agawa so siopaman a makadalan.

Jeremias 50:13

Diad pasnuk ko anggapoy manayam ed Babilonia, ta magmaliw ya aderal-deral a siudad, tan natalagnaw tan nikelawan ya amin iray ondalan.

Jeremias 51:37

Insan magmaliw a bunton na deral-deral so Babilonia tan panayaman na saray ayayep ed katakelan. Makapataktakot a nengnengen; anggapod may toon manayam, tan nataktakot ya amin iray makanengneng ed agawa.

Jeremias 51:43

Nagmaliw a makapataktakot a nengnengen iray baley to, tan nagmaliw iran andiay danum a kabueran, ya anggapo lad may toon manaayam odino ondadalan.

Jeremias 9:11

Say Katawan kuanto, “Gawaen kon bunton na deral-deral so Jerusalem, sakey a pasen a panayaman da ray asod katakelan; magmaliw a kalawakan iray siudad na Juda, tan sakey a pasen ya ag panayaman na totoo.”

Saray Tagleey 1:12

“Nengneng yo ak,” eyag na siudad ed balang ondadalan. “Anggapoy singa siak diad panliliknak na kairapan, Say kairapan ya impalikna na Katawan ed siak nen ampetang so olo to.

Ezekiel 12:19

Ibagam ed intiron bansa a sikato yay salita na Katawan a Dios ed saray totoon atilak ed Jerusalem: Onggiwgiw ira no mangan ira tan ompayegpeg irad takot no oninom ira. Naandian na karga so dalin da, lapud maoges so kabibilay na balang sakey ed sikara.

Ezekiel 27:36

Naandipat ka ya anggad angga; ataktakot ya amin iray nigosianti ed intiron mundo, natatakot ira ompan nadamay irad makapasinagem a nansumpalan mo.”

Ezekiel 36:3

“Mampropisiya ka, sirin, tan ibawag mo so ibabagak, siak a Katawan a Dios. Nen adakep tan asamsaman na saray kaliber-liber a bansa so kapalandeyan na Israel, niluludlurey na balang sakey a too so Israel.

Ezekiel 6:14

On, onla ak a maneral ed bansa ra. Say bansa ra et pagmaliwen kon andi-kakanaan tan begtebegtew a pasen, manlapud niabalaten a kalawakan ya anggad siudad na Ribla diad baybay; napibaliy amin a pasen a panaayaman da ray Israelita. Diad satan naamtaan dan amin a siak so Katawan.”

Levitico 26:32

Sigput kon deralen so dalin yo kanyan nikelawan iray kalaban yon manayam diman.

Levitico 26:43

Balet nakaukolan nin say dalin et naandian na totoo pian makapampainawan sigput, tan saray totoo et bayaran da niy impangipolisay dad saray ganggan ko tan saray bilin ko.

Mikias 6:16

Onyay nagawa, lapud inalig yo ray maoges a ginagawa nen Ari Omri tan si anak ton laki a si Ari Acab. Intuloy yon inoonur iray ganggan da, kanyan iyakar kod sikayoy deral, tan balawen kayo na balang too. Leglemewen kayo na amin a katoowan ed inerman a pasen.”

Mateo 27:39

Si Jesus pineyeng-peyengan tan pinapabaingan na saray totoon onlalabas.

Marcos 15:29

Si Jesus pineyeng-peyengan tan pinapabaingan na saray totoon onlalabas: “Aha, aliwa tan sika may maneral na Timplo, insan mo ipaalagey ed loob na taloy agew?

Deuteronomio 28:59

ipadalan tod sikayo tan saray kabyangay boleg yo so ag onabig a sakit tan makapataktakot a salot ya ag manonda.

Deuteronomio 29:23

Saray kaalogan et magmaliw iran andi-kakanaan, atabunan na asumpri tan asin; ag nataneman na anggan dinan a tanaman, tan anggapoy anggan dika ya ontobo. Say dalin yo et magmaliw a singa saray siudad na Sodoma tan Gomorra, singa Adma tan Zeboiim a dinederal ira na Katawan nen mapalaloy pasnuk to.