Isaias 43:19 - Maung A Balita Biblia

¹⁹ Talaranan yoy gawaen kon balo a bengatla. Nagagawa la—nanengneng yo la natan! Manggawa ak na dalan ed kalawakan tan itdan ta kayo na saray sobul diman.

Maung a Balita Biblia

¹⁹ Talaranan yoy gawaen kon balo a bengatla. Nagagawa lananengneng yo la natan! Manggawa ak na dalan ed kalawakan tan itdan ta kayo na saray sobul diman.

Isaias 43:19 Iomraidhean Croise

Saray Salmo 105:41

Nilokasan toy sakey a baton-dampay, et tinmuroy danum; singa ilog ya inmagos ed kalawakan.

Saray Salmo 126:4

Katawan, paaligwas mo kami pa lamet, a singa pamaparanum na oran ed saray nakatan a kolus.

Exodo 17:6

Manalagey ak ed arap mo diad tapew na sakey a baton-dampay ed palandey na Sinai. Pekpek mo so baton-dampay, et ompaway diman so danum ya inomen na saray totoo.” Ginawa nen Moises imay imbaga na Katawan diad arapan na saramay pangulo na Israel.

Isaias 30:25

Diad agew a nadakep iray tirinsira na saray kalaban yo tan napatey iray totoo ra, onagos iray sobul a manlapud balang palandey tan balang pokdul.

Isaias 32:2

Balang sakey ed sikara et magmaliw a singa sakey a salimbeng no panaoy maragem tan sakey a pasen ya amutan no walay bagyo. Magmaliw iran singa kolus a managagos ed sakey ya amagamagan pasen, tan sakey a sirum ed petek na balbaleg a bato ed kinmelang a dalin.

Isaias 33:21

Ipanengneng ed sikatayo na Katawan so kagalangan to. Manayam tayo ed gilig na saray maawang ya ilog tan kolus, ya ag dalanen na bapor da ray kalaban.

Isaias 35:1

Manliket so kalawakan, tan ombuskag iray rosas diman.

Isaias 41:18

Saray ilog paagosen kod saray kapokdulan ya anggapoy tanaman tan paagosen kod saray patar iray sobul. Pagmaliwen kon dipositoy danum so kalawakan; pagmaliwen kon managagos a danum so amagan dalin.

Isaias 41:19

Patuboen kod kalawakan iray sidro, akasia, mirto, tan saray oliba. Magmaliw a takel so dalin ya anggapoy tanaman, natuboan na saleng, sipris, tan olmo.

Isaias 42:9

Tinmua la natan iray impapasakbay ko. Ibagak ed sikayo natan iray balon bengatla anggan kasakbayan na igapoy pakagawa ra.”

Isaias 48:5

Lapud saya impasakbay ko lan abayag so nagawad sika ed arapen; kasakbayan a nagawa ray bengatla imbabawag ko la ra, pian ag mo ipasen a saray talintao tan saray imahin na diriyos mo so angyabuloy a nagawa ra ya.

Isaias 48:6

“Agawa la ray amin ya impasakbay ko; nepeg mon birbiren yan katwaan. Natan ibagak ed sikay balon bengatla ya onsabi, bengatla ran nagawa ya ag ko impaamta nen saman.

Isaias 49:10

ag iran balut naerasan odino naapgaan. Ag ira napasakitan na petang na agew tan makasinit a dagem, ta iwanwan ira na samay maarod sikara. Iwanwan to rad abay na sobul na danum.

Isaias 51:3

“Kasian ko so Jerusalem saray amin a manaayam ed saray deral-deral to. Anggaman a kalawakan so dalin to, gawaen ko a sakey a tanamanan, singa samay tanamanan a ginawak ed Eden. Niwalad man so liket tan gayaga, tan saray kantan pangidayew tan pisalamat ed siak.

Jeremias 23:7

“Onsabiy panaon,” kuay Katawan, “a saray totoo et ag la ra mansamba a kuanda, ‘Nitay mabilay a Dios ya angipaway ed dalin na Egipto ed saray totood Israel.’

Jeremias 31:22

Kapigan mangangga so panduaruwa yo, sikayon anggapoy pananisian totoo? Nanggawa ak na bengatlan balo tan nidoma, nidoma a singa sakey a bii ya iyaagel toy laki.”

Jeremias 31:9

Diad liket dan ompapawil iray totook ag da napokpokay interter na lua ra, mampipikasi ra legan ko ran iwawanwan. Iwanwan ko rad gilig na managagos a danum, diad mablak a dalan pian ag ira niparokul. Singa ama so pasen ko ed Israel, et si Efraim so sankapangulowanan ya anak kon laki.”

Saray Bilang 20:11

Insan inyatagey nen Moises imay baston tan pinekpek ton amidua imay baton dampay, et pinmaway so manwawan sobul na danum. Inmiinom iray amin a totoo tan amin ya ayayep.

2 CORINTO 5:17

Kanyan nagmaliw a balon pinalsa so siopaman a toon akikasakey ed Cristo. Linmabas lay daan, tan sinmabi lay balo.

Deuteronomio 8:15

Inwanwan to kayon binmeltang ed samay maawang tan makapataktakot a kalawakan a kawalaan na saray nanditan oleg tan alakdan. Diad saman ya amaga tan anggapoy danum a dalin pinapaway tod baton dampay so danum a para sikayo.

Puyan 21:5

Insan inkuanto may akayorung ed trono, “Natan, pasimbaloen ko ya amin iray bengatla!” Inkuantod siak ed satan, “Isulat mo ya, ta napanmatalkan tan tua ra yan salita.”