Isaias 30:6 - Maung A Balita Biblia

⁶ Sikato yay sinalita na Dios nipaakar ed saray ayayep ed kalawakan diad abalaten: “Saramay imbaki ondadalan irad maatap a kalawakan a panaayaman na saray lion tan wala ray maditan oleg tan mantikyab a dragon. Saray beneg na saray asno tan saray kamilyo et pinano ra na saray mabmablin rigalo ya iter dad bansan ag makatulong ed sikara.

Maung a Balita Biblia

⁶ Sikato yay sinalita na Dios nipaakar ed saray ayayep ed kalawakan diad abalaten: Saramay imbaki ondadalan irad maatap a kalawakan a panaayaman na saray lion tan wala ray maditan oleg tan mantikyab a dragon. Saray beneg na saray asno tan saray kamilyo et pinano ra na saray mabmablin rigalo ya iter dad bansan ag makatulong ed sikara.

Isaias 30:6 Iomraidhean Croise

Genesis 12:9

Manlapud man, tinmonda-tondan nanaayam ed nandoroman pasen ya anggad akasabid bandad abalaten a parti na Canaan.

1 Saray Arari 10:2

Sinmabin kaiba to ray amayamay ya aripen, pati saray kamilyo a napnoy beneg da na saray rikado, alahas, tan balituk. Nen kaarap toy Solomon, intepet to lay amin a nanunotan to.

2 Saray Awaran 16:2

Kanyan angala si Ari Asa na pilak tan balituk ed kayamanan na Timplo tan palasio, insan to imbakid Damasco iray pigaran opisyal to. Diad Damasco so panaayaman na ari ed Siria a si Ari Ben-hadad. Inter dad ari may pilak tan balituk, insan da sinalita so papaibaga nen Ari Asa:

2 Saray Awaran 9:1

Nadngelan na riyna na Seba so inkabantug nen Solomon, kanyan linmad Jerusalem ta suboken toy Solomon diad panamegley na pantepet to na saray mairap a tepet. Sinmabin kaiba to ray amayamay ya aripen, tan saray kamilyo a napnoy beneg da na saray rikado, alahas, tan balituk. Nen kaarap toy Solomon intepet to lay amin a nayarian ton tepeten.

Say Libro nen Job 39:11

Napanmatalkan mo so ontan lan biskeg to tan napanilaloan mon gawaen toy kimey mo?

Isaias 14:29

Totood Filistia, apoter so bastun ya amekpek ed sikayo, balet ag yo ya nepeg a panliketan. No ompatey so sakey ya oleg, onsalat so lalon maoges nen say sikato. Ompusnak so mantikyab a dragon ya iknul na oleg.

Isaias 15:7

Bebeltangen na saray totoo so Patar na Kiew a Sausi, ta ombatik iran sankaawit da ray amin a kayaryan da.

Isaias 19:4

Ipalimak iray Egipsio ed pakayari na sakey a masebeg tan maruksan ari a manoley ed sikara. Siak, say Katawan a Makapanyarin-amin so nansalita.”

Isaias 35:9

Anggapo rad may niwalan lion; anggapoy ondalan diman a masebeg ya ayep. Diad ipawil na saray totoon inyagel na Katawan ondalan irad saman a dalan.

Isaias 5:30

No onsabi tan ya agew, singa kakasil na ungol na dayat so panungol dad Israel. Nengneng yo yan bansa! Kabilongetan tan kaermenan! Inakmun na bilonget so liwawa.

Isaias 57:9

Popoyukan yoy laman yo na saray nandoroman pabalingit, insan kayo mangigalang ed dios a Moloc. Diad pananap yo na saray diriyos ya igalang yo, mangibabaki kayod ararawin pasen, ya anggan diad pasen a panaayaman da ray inaatey.

Isaias 8:22

odino onnengneng irad dalin, balet anggapoy arum a nanengneng da no ag say gunigon tan kabilongetan, say makapataktakot a kabilongetan ya akaibantakan da.

Jeremias 11:4

Sayan sipanan et ginawak ed saray lalaki ra nen impaway ko rad Egipto, say dalin a singa palbaan na balatyang ed sikara. Imbagak ed sikara ya onuren da ak tan sumpalen da ray ingganggan kod sikara. Imbagak ed sikara a no ontoluk ira magmaliw iran totook tan siak so Dios da.

Jeremias 2:6

Inekal da ak lad kanunotan da, anggaman a siak so angyagel ed sikarad Egipto tan angiwanwan ed sikarad kalawakan: sakey a dalin na kalawakan tan kaabutan, sakey a dalin ya amaga tan walay kaatapan, sakey a dalin ya anggapoy ondadalan tan anggapoy anggan manayam.

Ezekiel 20:46

Inkuanto, “Sika a toon ompatey, nengneng kad abalaten. Mansalita ka sumpad abalaten tan mampropisiya ka sumpad takel ed abalaten.

Oseas 12:1

Andi-kakanaan tan makaderal ya amin iray gagawaen da ray totood Israel manlapud kabwasan ya anggad labi. Mandakel so gagawaen dan panamalikdo tan panagduksa. Mipapaknaan irad Asiria tan mininigosio ra ed Egipto.”

Oseas 12:2

Walay pangakusaan na ed saray totood Juda; dusaen to met so Israel lapud saray gagawaen da ray totoo to. Singilen to rad saray gagawaen da.

Mikias 6:14

Mangan kayo, balet ag kayo napesel—diad tuay tua narasan kayo ni. Ibatik yoy amin a bengatla, balet ag yo ra niyagel; deralen kod bakal so antokaman a niyagel yo.

Zacarias 6:6

Samay karwahin igogoyur na saray andeket a kabayo et mamapaarap irad baybay diad Babilonia, saramay ampotin kabayo et diad bokig so lalaen da, tan saramay batekan et oonla rad bansa diad abalaten.

Zacarias 9:9

Manliket kayo na baleg, sikayon totood Sion! Eyag kayod liket, sikayon totood Jerusalem! Nengneng yo, onsasabid sikayo so ari yo! Onsasabin analo tan sipapalabo, balet mapaabeba tan akakabayod sakey a kilaw na asno—

Saray Bilang 21:8

Insan say Katawan imbaga tod kinen Moises a manggawa na gansan oleg tan ibitin tod sakey a teken, pian mambilay so siopaman ya aketket na oleg insan onnengneng ed gansan oleg.

Mateo 12:42

Diad Agew na Okum onalagey so Riyna Seba tan akusaen to kayo, ta nanlapud arawdawin pasen ya ondengel labat ed kakabatan nen Solomon. Balet kuankod sikayo a wadyay lalon makapanyari nen si Solomon!”

Deuteronomio 17:16

Say ari ag nepeg ya amayamay iray kabayo ton para saray sondalo to, tan ag to nepeg ya ibaki ray totoo to a manaliw ed Egipto na saray kabayo, ta imbaga la na Katawan ya ag lan balut ompawil diman iray totoo to.

Deuteronomio 4:20

Balet sikayo ray totoon inyagel tod Egipto ya aliling toy manliub a palbaan. Impaway to kayod man pian pagmaliwen to kayon dilin totoo to a sikatoy kipapasen yo natan.

Deuteronomio 8:15

Inwanwan to kayon binmeltang ed samay maawang tan makapataktakot a kalawakan a kawalaan na saray nanditan oleg tan alakdan. Diad saman ya amaga tan anggapoy danum a dalin pinapaway tod baton dampay so danum a para sikayo.