Isaias 24:14 - Maung A Balita Biblia

¹⁴ Mankantad liket iray makapaliis ed patey. Saray walad Sagur ibaga ran ontan lay inkatalonggaring na Katawan,

Maung a Balita Biblia

¹⁴ Mankantad liket iray makapaliis ed patey. Saray walad Sagur ibaga ran ontan lay inkatalonggaring na Katawan,

Isaias 24:14 Iomraidhean Croise

Isaias 25:1

Katawan, sika so Dios ko; Igalang ta ka tan idayew koy ngaran mo. Makapakelaw iray ginagawam a bengatla; matoor mon sinumpal iray plano ya abayag lan ninunot mo.

Isaias 26:1

Onsabiy agew a saray totooy Dios et kantaen dad dalin na Juda yan kanta: Mabiskeg so siudad tayo! Say Dios a dili so mangyaagel ed saray padir to!

Isaias 27:2

Diad satan ya agew say Katawan ikuantoy nipaakar ed marakep a kaubasan to,

Isaias 35:10

Magayaga ran makasabid Jerusalem, mangankanta tan maneyag-eyag irad liket da. Manliket iran ando lan ando, naandi lan anggad angga so ermen tan dageyem.

Isaias 35:2

Mankanta tan maneyag ed liket so kalawakan; magmaliw a marakep a singa Saray Palandey na Libano tan mataba a singa saray kaalogan na Carmelo tan Saron. Nanengneng na balang sakey a too so kagalangan na Katawan, say inkatalonggaring to tan say pakapanyari to.

Isaias 40:9

Jerusalem, tatdang kad atagey a palandey, ta ipulong moy maung a balita! Kolyaot ka, Sion, ibawag moy maung a balita! Ag ka ontatakot, mansalita ka. Ibagam ed saray baley na Juda ya onsasabi lay Dios da!

Isaias 44:23

Eyag kayod liket, sikayon katawenan! Eyag kayo, sikayon aralem a pasen na dalin! Eyag kayod liket, sikayon kapalandeyan, tan amin yon kakiewan ed katakelan! Diad impangilaban tod saray totoo ton Israel impanengneng toy inkatalonggaring to.

Isaias 48:20

Paway kayod Babilonia, taynanan yo man a pasen! Maliket yon ibawag so balita; ipaamta yod amin a pasen: “Dinondon la na Katawan so aripen ton Israel!”

Isaias 51:11

Onsabin magaygayaga ed Jerusalem ira may inyagel mo, mankanta tan maneyag ira lapud liket. Manliket ira ed ando lan ando, naandi lad bilay da so ermen tan dageyem.

Isaias 54:1

Jerusalem, singa ka biin lepes, balet natan makapankanta tan makapaneyag ka lapud liket. Nawalaan ka natan na saray anak a dakel ni nen saray anak na biin ag balut tinaynan na asawa to.

Isaias 60:5

Nanengneng mo yan nagawa, et nalimbos kay liket; Manlukso-lukso ka lapud liket mo. Niakar ed sika iray kayamanan na saray bansa; Onsabin manlapud biek na dayat iray kayamanan da.

Jeremias 30:19

Mankanta na panangidayew iray totoon manaayam diman; maneyag irad liket. Lapud panamindision ko ondakel ira, tan napagalangan ira.

Jeremias 31:12

Ondago ra tan mankanta rad liket diad Palandey na Sion tan panliketan da ray rigalok— saray rigalon trigo, alak, tan larak na oliba, saray karniro tan saray baka. Magmaliw iran singa asalusalug a tanamanan, tan nawalaan ira na amin a nakaukolan da.

Jeremias 33:11

iray eyag na liket tan gayaga, tan say tanul na sayaksak ed saray bansal. Narengel yo ray totoon mankanta legan dan mangibabagat ed Timplok na pisasalamat; ikuanda, ‘Misalamat kayod Katawan a Makapanyarin-amin, ta sikato et maung, tan ag mangangga so panangaro to.’ Paaligwasen ko yan dalin a singa samay kipapasen to nen saman. Siak, say Katawan, so nansalita.”

Jeremias 51:10

Say Katawan kuanto, “Iyeeyag na saray totook, ‘Impanengneng na Katawan a wala itayod katonungan. Onla tayon mangibagad saray totoo ed Jerusalem na ginawa na Katawan a Dios tayo.’”

Zacarias 2:10

Say Katawan kuanto, “Mankanta kayod liket, sikayon totood Jerusalem, ta onsabi ak a manayam ed pegley yo!”