Isaias 22:12 - Maung A Balita Biblia

¹² Diad saman, say Katawan a Dios a Makapanyarin-amin et tinatangguyor to kayon manakis tan manermen, mangiskis na kaoloan yo tan mankawes na sako.

Maung a Balita Biblia

¹² Diad saman, say Katawan a Dios a Makapanyarin-amin et tinatangguyor to kayon manakis tan manermen, mangiskis na kaoloan yo tan mankawes na sako.

Isaias 22:12 Iomraidhean Croise

2 Saray Awaran 35:25

Nanggaway propita Jeremias na kantan panermen ed kinen Ari Josias, tan nagmaliw ed Israel a kantaen ya na saray lalaki tan bibii no manermen irad sikato. Narumog yan kanta ed tipon na saray kantan panermen.

Esdras 9:3

Nen nadngel ko ya, pinipilat koy kawes ko diad pangipanengneng koy ermen ko, ginogonut koy buek ko tan say balbas ko, insan ak inmirung a mapalaloy ermen ko.

Nehemias 9:9

“Anengneng mo no panoy impanirap da ray lalaki mi ed Egipto; dinengel moy inkerew da na tulong nen wala rad Dayat ya Ambalanga.

Say Libro nen Job 1:20

Lapud saya inmalagey si Job tan pinilat toy kawes to a pangipanengneng toy ermen to. Kiniskisan toy olo to tan intiblak tod dalin.

Ecclesiastes 3:11

Inggetar toy manepeg a panaon na amin a bengatla. Initdan to tayo na pilalek a mangamta na arapen, balet ag ton balut iter ed sikatayoy kapenek na ayadyarin pakatalus ed saray gagawaen to.

Ecclesiastes 3:4

Igegetar toy panaon na panermen tan say panaon na panliket, say panaon na pandageyem tan say panaon na pansayaw,

Isaias 15:2

Onkakalab ed pokdul iray totood Dibon, ta mannangis irad man ed altar. Saray totood Moab mandageyem irad ermen lapud saray siudad na Nebo tan Medeba; kiniskisan day olo ra tan saray balbas da lapud ermen da.

Isaias 26:10

Anggaman a mapangasi kad saray totoon maoges, ag dan balut naaralan so manggaway kaptekan. Anggan diad dalin na saray totoon matonung manggagawa ran siansiay kaogsan; ag da labay a birbiren so inkatalonggaring mo.

Isaias 29:1

Say altar na Dios, say dilin Jerusalem et pangaskasiyay kipapasen to! Kaskasian so siudad a nankampoan nen David! Palabasen niy sakey o duaran taon, a pati saray pista to,

Isaias 3:24

Anta mampabalingit ira komun, naboluk ira; anta mambalkes ira komun na balibali, mambalkes iray magasgasal a lobir; anta marakerakep komun so buek da, nakiskisan so olo ra; anta mankawes ira komun na marakerakep, lupot so ikawes da; magmaliw a makapabaing so ganggana ra!

Isaias 32:11

Mambibilay kayod inawa ed abayag lan panaon, tan anggapoy kapagaan yo; balet natan giwgiw kayod takot! Lakseb yoy kawes yo tan mansapey kayoy sako.

Isaias 37:1

Diad ermen nen Ari Ezekias nen nadngel toy imbalita da ra may opisyal to, pinilat toy kawes to, insan linmad Timplo na Katawan.

Isaias 37:2

Imbaki tod kinen propita Isaias a lakin anak nen Amoz ira di Eliakim a makaoley ed palasio, Sebna a sikritario na korti, tan saray mamatakken a papari. Akakawes met iray sako.

Isaias 58:3

Tepet na saray totoo, “Akin et manayuno kami no ag lamlamang imanoen na Katawan so panayuno mi? Akin et manayuno kami anta ag met lamlamang imanoen na Katawan so ag mi pangan?” Say Katawan kuantod sikara, “Say katwaan to ibabansag yod panagayuno yo so panggagawa yoy pankaabigan yon dili tan say pamapairap yod saray kumikimey yo.

Jeremias 16:6

Ompatey ed sayan dalin iray mamayaman tan saray mairap-bilay, balet anggapoy manermen odino mangipompon ed sikara. Anggapoy manggerger na laman odino mangiskis na olo to a pangipanengneng toy paneermen to.

Jeremias 16:8

“Ag ka onloloob ed abung a kawalaay totoon manliliket. Ag ka mirorongod sikaran mangan odino oninom.

Jeremias 4:8

Kanyan mansolung kayoy sako, mannangis tan manermen kayo, lapud ag nakal ed Juda so ontan lan sanuk na Katawan.

Jeremias 7:29

“Manermen kayo, sikayo ran totood Jerusalem; potut yoy buek yo, insan yo ibantak. Manogtog kayod toktok na kapok-dulan na makapaermen, ta siak, say Katawan, impolisay tan inkaindan ko ra yan totoo a pamapasnukan ko.

Ezekiel 27:31

Lapud sika kinikiskisan day olo ra Tan nankakawes iray sako. Maninget so pagew da legan dan onaakis.

Daniel 5:1

Aminsan a labi inimbitaan nen Ari Belsasar ed sakey a baleg a ponsia iray sanlibon atagey ya opisyal to, tan naniinoman iray alak.

Oseas 9:1

Totood Israel, tondaan yo ray pansisilibra yod saray pista yo a singa saray pagano. Inkaindan yoy Dios yo tan nagmaliw kayon aliwan matoor ed sikato. Diad nandoroman pasen inlalako yoy sikayon dili a singa saray marotak a bibii ed dios a Baal tan labalabay yo ray trigon abaloan yon imbayar tod sikayo.

Joel 1:13

Mankawes kayoy sako tan mannangis kayo, sikayo ran paparin manlilingkur ed altar! Laka yod Timplo tan manermen kayon sanlabi! Anggapoy trigo odino alak a nibagat ed Dios yo.

Joel 1:8

Akis kayon singa sakey a marikit a nanangisan toy impatey na nubio to.

Joel 2:12

“Balet anggan natan,” kuay Katawan! “masimoon kayon magbabawi tan pawil kayod siak a manaayuno, mannangnangis, tan maneermen kayo.

Joel 2:17

Nepeg ya onakis tan mampikasi iray paparin manlilingkur ed nanleetan na altar tan say lolooban ed Timplo: “Katawan, kasian mo pa ray totoom. Ag mo pa iyaabuloy a balawen tan ludlureyen kami na arum a bansa diad pangikuan da, ‘Kawalaan na Dios yo?’”

Amos 8:10

Pagmaliwen kon panagermen iray pista yo tan salatan ko na panagugol lapud ermen iray maliket a kansion yo. Pankiskisen ta kayo na kaoluan yo tan pansulongen ta kayoy sako, tan magmaliw kayon singa saray atateng a maermen lapud impatey na saksakey ya anak dan laki. Diad satan ya agew mapalaloy ermen da ray totoo ya anggad samput.

Jonas 3:6

Nen nadngelan na ari ed Ninive so nipaakar ed saya, inmepas a nanlapud trono to, nilakseb toy kawes to, nansolung na sako, tan nanirung ed dapul.

Mikias 1:16

Sikayo ran totood Juda, katlian yo ray buek yo diad pangipanengneng yoy kaermenan yo, lapud saray inararo yon anak. Kiskisan yoy kaolowan yo a singa saray buitri, lapud naalad sikayo ray anak yo tan nibantak irad arum a bansa.

Santiago 5:1

Dengel yo ya, sikayon mamayaman! Nangisan tan panogaogan yoy kairapan ya onsabid sikayo!