Isaias 10:3 - Maung A Balita Biblia

³ Antoy gawaen yo no dusaen kayo na Dios? Antoy gawaen yo no iyakar tod sikayoy deral a manlapud arawin bansa? Iner so batikan yon kereway tulong? Iner so pangyamutan yo na saray kayamanan yo?

Maung a Balita Biblia

³ Antoy gawaen yo no iyakar tod sikayoy deral a manlapud arawin bansa? Iner so batikan yon kereway tulong? Iner so pangyamutan yo na saray kayamanan yo?

Isaias 10:3 Iomraidhean Croise

Genesis 31:1

Nadngelan nen Jacob a kuan na saray lalakin anak nen Laban, “Inala nen Jacob so amin a kayaryan nen ama tayo. Nanlapud ama tayo so amin a kayamanan to.”

2 Saray Arari 7:15

Linma ra ya anggad Jordan, tan diad dalan anengneng da ray kawes tan saray kagawaan ya intitilak na saray Siriano diad imbatik da. Insan ira pinmawil tan imbaga rad ari so agawa.

Say Libro nen Job 31:14

No ag ko dinengel, panoy piarap kod Dios? Antoy nibagak no sinmabin manintinsiad siak?

Probirbio 11:4

Anggapoy kakanaan so kayamanan mo no asabi lay agew na ipatey mo, balet say kaptekan nilaban toy bilay mo.

Isaias 13:6

Ingal kayod paniirap yo! Asingger lay agew na Katawan, say agew a pangyakar na Makapanyarin-amin na panagderal!

Isaias 17:4

Say Katawan inkuanto, “Onsabiy panaon a naekalay kagalangan so Israel, tan nasalatan na inkaduka so kayamanan to.

Isaias 20:6

No onsabiy tan a panaon, ibaga na saray totoon manaayam ed gilig na dayat na Filistia, ‘Nengneng yoy agawad saray totoo a nanmatalekan tayon mangyagel ed sikatayod impirador na Asiria! Panoy pakaliktar tayo?’”

Isaias 26:14

Inaatey la ra natan tan ag ombangon iray anyani ra; anggan say anino ra anggapo la, tan dinusam tan pinatey mo ra. Anggapo lay makanunot ed sikara.

Isaias 26:21

Say Katawan et onsasabin manlalapud mangatatawen a pasen ya ayaman to tan dusaen to ray totood mundo lapud saray kasalanan da. Nipaamta iray maamut ya impamatey diad tapew na dalin, tan say dalin ag to la iyamut iray apatey-patey.

Isaias 28:20

Singa kayo samay too ed sakey a probirbio ya ondokul ed sakey a katrin antikey a tuloy, tan makisir a tuloy so oles.

Isaias 29:6

say Katawan a Makapanyarin-amin iyagel to ka diad panamegley na saray karul tan yegyeg. Mangibaki na saray alimbusabos tan say manliub ya apoy;

Isaias 30:16

Ingen, plano yon ibatikan iray kalaban yo diad ikabayo yod saray mabatik a kabayo. Kanyan say ibatik yo so pilalek yon gawaen. Abaloan yon mabatik la ray kabayo yo, balet mabatik ni ray kabayo na onosil ed sikayo!

Isaias 30:5

magbabawi ray totood Juda diad impanmatalek dad ag napampiaan a bansa, say bansan ag makatulong no ag ingen mangipelag ed sikarad kababaingan.”

Isaias 30:7

Andikakanaan a tulong so iter na Egipto. Lapud saya pinangaranan koy Egipto na ‘Say Maamon Dragon.’”

Isaias 33:14

Manggiwgiw ed takot iray makasalanan a totood Sion. Kuanda, “Singa apoy a mandarlang ed anggad angga so panagsintinsia na Dios. Wala kasid sikatayoy makapangitepel ed onyan dalang?”

Isaias 39:3

Insan linmay propita Isaias ed kinen Ari Ezekias tan tinepet to, “Iner so nanlapwan na sarayan totoo tan antoy kuandad sika?” Inmebat si Ezekias, “Nanlapu rad Babilonia ya arawdawin bansa.”

Isaias 5:14

Narasan na bangkay da so pasen a panaayaman da ray inaatey. Isasangi ton maung so songut to. Aakmunen to ray totoon atatagey so kipapasen da, a pati saray maingal a karaklan.

Isaias 5:26

Say Katawan sisinyasan to a tawagen so sakey a bansan walad bandad arawi. Ngingisiwan to ra pian ondago ran manlapud saray samput na mundo. Et natan nia la ra; masigsiglat tan mapanaspas ira.

Jeremias 22:7

Mangibaki ak na totoon manderal ed sayan palasio. Awiten dan amin iray wasay da, batangen da ray balibalin lusek a sidro, insan da ra ibontuk ed apoy.

Jeremias 4:30

Jerusalem, pangaskasiyan ka! Akin et akakawes kay ambalbalanga? Akin et manaalahas ka tan akapinta na pampaganggana iray matam? Andi-kakanaan lay pampapagangganam! Impolisay ka la na saray kainarowan mo tan labay da kan pateyen.

Jeremias 5:31

saray propita tilan amin so sasalitaen da; saray papari manooley ira diad panangiganggan na saray propita, et onya so labay da ray totook a nagawa. Balet antoy gawaen da no mangangga la yan amin?”

Jeremias 9:9

Ag ko ra dusaen lapud sarayan bengatla? Ag ak ombawi ed bansan singa onya? Siak, say Katawan, so nansalita.”

Oseas 5:13

“Nen anengneng na Israel so ontan lan pansasakit to, tan say Juda et anengneng to ray sugat to, linmay Israel ed Asiria, ta onkerew na tulong ed matalonggaring ya ari, balet ag to ra natambal odino napaabig iray sugat da.

Oseas 9:5

Et antoy gawaen da no onsabiy panaon a nigetar a pansilibrad saray pista a pamagalang ed Katawan?

Oseas 9:7

Sinmabi lay panaon na dusa, say panaon ya awaten na saray totood Israel so kanepegan dan dusa. No nagawa la ya, naamtaan na Israel! “Sayan propita,” kuanyo, “et makulang-kulang. Ambagel yan toon apuyanan na ispiritu.” Mapalaloy pambobosul yod siak lapud ambelat lan tuloy so kasalanan yo.

Amos 5:19

Saman ya agew et aliling toy toon ibabatikan toy lion balet ta nabet toy uso! Odino singa toon kasempet tod abung et inkapa tod padir so lima to, balet kinetket na oleg!

Mikias 7:4

Anggan say sankamaungan tan sankatonungan ed sikara et singa la andi-kakanaan a dika. Sinmabi lay agew a dusaen na Dios iray totoo, onung na pasakbay ed sikara na saray managbantay ed sikara, salanti saray propita. Agolo-golo la ra natan.

Sofonias 1:18

Diad agew a pangidapoy Katawan na pasnuk to, ag ira nilaban na anggan amin a pilak tan balituk da. Deralen na apoy na sanuk to so intiron mundo. Bigla ton panganggaen so balang sakey a manaayam ed tapew na dalin.

Lucas 19:44

Deralen da ka tan saray totoon walad loob na padir mo. Anggapoy anggan sakey a baton natilak ed pasen to, ta ag mo inasikasoy insabi na Dios a mangilaban ed sika!”

Deuteronomio 28:49

Say Katawan mangibaki na onsumpad sikayon sakey a bansan manlapud arawin dalin, ya ag yo amta so salita ray totoo to. Onsibar irad sikayon singa sakey ya agila.

1 Pedro 2:12

Nepeg a mambilay kayon masimpit ed pegley da ray aliwan mananisia. Anggaman a palsaan da kayon manggagaway kaogsan natan, nabirbir da met lamlamang so maung iran gawgawa yo tan diad ontan, igalang day Dios no Agew na isabi to.