Genesis 42:21 - Maung A Balita Biblia

²¹ tan inkuan na sakey tan sakey ed sikara, “Nankasalanan itayo ed samay ginawa tayod agi tayo; anengneng tayoy baleg ya irap to nen akikasid sikatayo, balet ag tayo dinengel. Kanyan wala tayo natan ed sayan irap.”

Maung a Balita Biblia

²¹ tan inkuan na sakey tan sakey ed sikara, Nankasalanan itayo ed samay ginawa tayod agi tayo; anengneng tayoy baleg ya irap to nen akikasid sikatayo, balet ag tayo dinengel. Kanyan wala tayo natan ed sayan irap.

Genesis 42:21 Iomraidhean Croise

Genesis 41:9

Insan samay inkargadoy alak inkuantod ari, “Akoen kod sayan agew a nankasalanan ak.

Genesis 44:16

“Antoy nibaga mi?” kuanen Juda. “Panoy pankatonungan mi? Panoy pakapangipanengneng min anggapoy kasalanan mi? Say Dios a dili so amapapaway ed kasalanan mi. Natan, aripen yo kami lan amin, aliwan saman labat so akalmoay kupa.”

Genesis 45:3

Inkuanen Jose ed saramay agagi to, “Siak si Jose. Mabilay nin tuay amak?” Balet diad ontan lan takot da ra may agagi to, ag ira makaebat.

Genesis 50:15

Kayariy impatey nen ama ra, inkuan na lalakin agagi nen Jose, “Nayarin bosulen itayo ni nen Jose tan mamplanon ombawid sikatayon amin, lapud samay ginawa tayod sikato.”

2 Samuel 12:13

“Nankasalanan ak ed Katawan,” kuanen David ed kinen Natan. Inmebat si Natan, “Pinirdona ka na Katawan; ag ka ompatey.

1 Saray Arari 17:18

Inkuantod kinen Elias, “Too na Dios, akin et ginawam ed siak ya? Linma ka dian mangipanunot ed Dios na kasalanan ko, pian onsabiy patey ed anak ko?”

Probirbio 21:13

No ag mo dengelen so pikekerew da ray mairap-bilay na tulong, ag met narengel so pankerew mo na tulong.

Probirbio 28:17

Say toon akapatey na kapara ton too et gaganatan ton kotkotan so dilin lobuk to. Ag mo babanoen.

Jeremias 2:17

Israel, sika so nansengegan ed saya! Inkaindan mo ak a Katawan a Dios mo, legan ya iwawanwan ta kad dalan.

Jeremias 2:19

Dusaen ka na dilin kaogsan mo; deralen ka na impangikaindan mod siak. Naamtaan mo no panoy kapaitan tan kaogsan na pangikaindan ed siak a Katawan a Dios mo, tan say ag mo pansiansian matoor ed siak. Siak, say Katawan a Dios a Makapanyarin-amin, so nansalita.”

Jeremias 34:17

Kanyan natan, siak, say Katawan, kuanko ya ag yo ak inonur; ag yo initdan na kawayangan iray kapara yon Israelita. Sigi sirin, itdan ta kayoy kawayangan: say kawayangan ya ompatey ed bakal, salot tan eras. Gawaen koy amin a bansa ed intiron mundo a nataktakot lapud gawaen kod sikayo.

Jeremias 4:18

Juda, sika met ni lamlamang so nanlapwan ed saya lapud impanbilay mo tan lapud saray ginagawam. Say kasalanan mo so makasengeg ed sayan kairapan; tinoruk ton tinalus so pusom.

Oseas 5:15

“Ikaindan ko ray totook ya anggad asigsigput so impanirap da, lapud saray kasalanan da tan onsabi ran mananap ed siak. Angangko diad gaway panirap da anapen da ak.”

Saray Bilang 32:23

Balet no ag yo sumpalen so sipan yo, pasakbayan ta kayo a mankasalanan kayod Katawan. Andi-duaruwad satan a nadusa kayo lapud kasalanan yo.

Mateo 7:2

Ta no panoy panisintinsia yod arum a too, ontan met so panisintinsia na Dios ed sikayo; tan no panoy panusukat yod arum a too, ontan met so panusukat na Dios ed sikayo.

Marcos 9:48

Diman, ‘ag ompatey iray bigis a mankibkib ed sikara, tan ag naerep a balut so apoy.’

Lucas 16:28

ta walad may limaran agagik a lalaki. Paonla yo pad man ta pasakbayan to ra, pian ag ira makakar ed sayan pasen na kairapan.’

Saray Gawgawa 19:18

Amayamay ed saray mananisia so dinmadago, binibirbir tan impapatwa rad karaklan so ginagawa ra.

Santiago 2:13

Ta diad panagsintinsiay Dios, ag to kasiay toon ag to amtay mangasi; balet say panangasi taloen toy sintinsia.

1 Juan 1:9

Balet no ipatwa tayod Dios iray kasalanan tayo, pirdonaen to ray kasalanan tayo tan gawaen to itayon malinis diad pangekal to ray amin a kaogsan ed bilay tayo, lapud sikato et matoor tan matonung.

Saray Huis 1:7

Inkuanen Adoni-bezec, “Nandodokdok nen saman na ibung ed silong na lamisaan ko iray arari ya apotut-potut so tangan na lima tan sali ra. Gagawaen ed siak natan na Dios imay ginagawak ed sikara.” Niakar ed Jerusalem si Adoni-bezec, tan diman la inatey.