Exodo 6:1 - Maung A Balita Biblia

¹ Insan say Katawan kuantod kinen Moises, “Nanengneng mo natan no antoy gawaen kod ari. Pasooten ko ya abuloyan ton ontaynan iray totook. Diad tuay tua, piliten ko a dagdagen to ran taynan day bansa to.”

Maung a Balita Biblia

¹ Insan say Katawan kuantod kinen Moises, Nanengneng mo natan no antoy gawaen kod ari. Pasooten ko ya abuloyan ton ontaynan iray totook. Diad tuay tua, piliten ko a dagdagen to ran taynan day bansa to.

Exodo 6:1 Iomraidhean Croise

2 Saray Arari 7:19

Onya balet so ebat na samay opisyal, “Ag itan nagawa—anggan mangipelag na oran a tampol so Katawan!” Inebatan balet nen Eliseo, “Nanengneng mon nagawa, balet ag mo natawayan yan tagano.”

2 Saray Arari 7:2

Say opisyal ya angolup ed ari kuantod kinen Eliseo, “Ag itan nagawa—anggan mangipelag na oran a tampol so Katawan!” “Nanengneng mon nagawa, balet ag mo natawayan yan tagano,” ebat nen Eliseo.

2 Saray Awaran 20:17

Aliwan sikayoy nepeg a milaban ed sayan bakal. Ilira yo labat so sikayon dili tan manalagar kayo; nanengneng yoy pangiter na Katawan ed sikayo na pananalo. Totood Juda tan Jerusalem, ag kayo ontatalaw odino ontatakot. Paway kayon mibakal, tan olupen kayo na Katawan!”

Saray Salmo 12:5

Balet kuay Katawan, “Onsingger ak natan, ta napapairap iray mankakaukolan tan mandadageyem ed sakit iray napapasegsegang. Iyarawik irad kaatapan ta sikatoy pampipilalekan da!”

Saray Salmo 12:6

Napanmatalkan iray salita na Katawan; singa ra tuan pilak a pinapuron amimpito ed palbaan.

Saray Salmo 136:12

diad panamegley na mabiskeg tan makapanyari ran taklay to; andi-anggaan so panangaro to.

Saray Salmo 89:13

Agaylay pakayarim! Agaylay biskeg mo!

Exodo 11:1

Insan say Katawan kuantod kinen Moises, “Mangiter ak niy sakey a kaonuran a dusa ed ari na Egipto tan diad saray totoo to. Kayari to ya, abuloyan to kayo lan ontaynan. Diad tuay tua, pasooten to kayo lan pataynanen ya amin.

Exodo 12:31

Diad saman a labi impatawag na ari ira di Moises tan Aaron tan kuantod sikara, “Taynan ki la, sikayo ran Israelita! Taynan yo lay bansak; laka yo lan mangigalang ed Katawan onung na kekerewen yo.

Exodo 12:33

Pinaganatan a pilit na saray Egipsio a taynan la na saray Israelita so bansa ra; inkuanda, “Ompatey kamin amin no ag kayo ontaynan.”

Exodo 12:39

Ginawa ran tinapay ira may anggapoy libaduran masa ya inawit da nen tinaynan day Egipto, ta lapud biglan impangibaki rad sikara, anggapoy panaon dan angiparaan na antokaman a kanen da.

Exodo 13:14

Diad arapen a panaon, no tepeten na saray anak yo so kabaliksan na sayan gawaen yo, onya so iyebat yo; ‘Diad panamegley na baleg a pakayari na Katawan, impaway to kamid Egipto, say pasen ya akaaripenan mi.

Exodo 13:16

Sakey a pakanudnunotan yan pista a singa bengatlan nisinger ed saray lima tayo odino diad muling tayo; ipanunot tod sikatayo a say Katawan impaway to tayod Egipto diad panamegley na baleg a pakayari to.’”

Exodo 13:3

Si Moises kuantod saray totoo, “Tandaan yo yan agew—say agew ya intaynan yon manlapud dalin na Egipto a dimay inkaaripenan yo. Diad sayan agew say Katawan impaway to kayo diad panamegley na baleg a pakayari to. Ag nepeg a kanen ed sayan agew so tinapay a pinaalsad libadura.

Exodo 13:9

Sayan pista et sakey a pakanudnonotan a singa bengatlan nisinger ed lima yo odino diad muling yo; ipanunot tod sikayo so pangituloy yoy pangibitla tan panaral na Ganggan na Katawan, lapud say Katawan impaway to kayod Egipto diad panamegley na baleg a pakayari to.

Exodo 14:13

Inmebat si Moises, “Ag kayo natatakot! Pakpel yoy linawa yo, et nanengneng yo no antoy gawaen na Katawan a pangilaban tod sikayo ed sayan agew; ag yo la napidwan nanengneng ira yan Egipsio.

Exodo 15:6

“Say kawanan a limam, O Katawan, et walaan na makapakebyew a pakayari; bingbingkasen to ray kalaban.

Exodo 7:4

Insan iter kod Egipto so ambelat a dusa tan iwanwan ko ray boleg na totook diad itaynan da.

Exodo 7:5

Naamtaan ed satan na saray Egipsio a siak so Katawan no iyatagey koy taklay ko sumpad sikara tan ipaway kod bansa ra iray Israelita.”

Isaias 63:12

Kawalaan na Katawan a diad pakayari to et nanggawa na saray ankabaleg a pakelaw diad panamegley nen Moises, binelsay toy danum ed dayat tan inwanwan ton binmaliw iray totoo to ed aralem a danum, pian makagamur na ag manganggan kagalangan to?” Diad panangiwanwan na Katawan, singa ra kabayod katakelan ya ag balut natumba.

Saray Bilang 11:23

“Wala sirin so ag ko nagawaan?” ebat na Katawan. “Ag mabayag nanengneng mo no kasi nasumpal so sinalitak odino andi!”

Saray Bilang 23:23

Anggapoy panamalikdo odino panagsalamangka diad pananulong na maoges ya ispiritu A makasumpa ed bansan Israel. Natan saray totoo ikuanda nipaakar ed Israel. ‘Nengneng yo no antoy ginawa na Dios!’

Saray Gawgawa 13:17

Say Dios na bansay Israel pinili to ray lalaki tayo tan ginawa to ran matalonggaring a totoo nen manaayam irad Egipto. Impaway to rad man diad panamegley na baleg a pakayari to,

Deuteronomio 32:39

“‘Siak, tan siak labat, so Dios; anggapo lay arum. Mamatey ak tan mangiter ak na bilay, manugat ak tan mamaabig ak, tan anggapoy makasumlang ed antokaman a gawaen ko.

Deuteronomio 4:34

Wala la kasi so dios a sinali toy linman angalad arum a bansa na saray totoo tan impagmaliw to ran dilin totoo to, a singa ginawad sikayod man ed Egipto na Katawan a Dios yo? Anengneng na dilin mata yo so impangipapakana tod baleg a pakayari to tan say biskeg to; impapadalan to ray salot tan bakal, nanggagawa na saray milagro, saray pakelaw, tan saray makapataktakot a bengatla.