Exodo 23:12 - Maung A Balita Biblia

¹² “Mankimey kayo na anem agew ed loob na sakey simba, balet ag kayo mankikimey ed kumapiton agew, pian makapampainawa ray aripen tan saray sangkailin kumikimey yo, a pati saray ayayep yo.

Maung a Balita Biblia

¹² Mankimey kayo na anem agew ed loob na sakey simba, balet ag kayo mankikimey ed kumapiton agew, pian makapampainawa ray aripen tan saray sangkailin kumikimey yo, a pati saray ayayep yo.

Exodo 23:12 Iomraidhean Croise

Nehemias 13:16

Wala ray pigaran totoon taga siudad na Tiro a manaayam ed Jerusalem a mangaawit irad siudad na saray sira tan amin a klasin sasaliwen, ta ilalako rad saray totoo mi no Agew na Panagpainawa.

Exodo 16:23

Inkuantod sikara, “Say Katawan ingganggan to a nabwas et masanton agew na panagpainawa, say agew a nisaklang ed Katawan. Iyorno yo lan amin natan so labay yon ornoen, tan ilambung yo lay labay yon lambungen. Isinup yoy antokaman ya ikera yon para nabwas.”

Exodo 23:11

Balet diad kumapiton taon pampainawa yoy dalin yo, tan ag yo aanien so bunga na ontubon tanaman. Nayarin kanen la na saray mairap-bilay so antokaman ya ontubod man, tan nayarin buagen la na saray ayayep ed katakelan so antokaman a natilak. Onya met so gawaen yo ed saray kaubasan yo tan saray kaolibaan yo.

Exodo 34:21

“Walay anem agew a pakapankimey yo, balet mampainawa kayo no kumapiton agew, anggan panaon na panagbaka odino panagani.

Exodo 35:2

Anem agew a makapankimey kayo, balet masanto so kumapiton agew, sakey a masanton agew na panagpainawa a nisaklang ed siak a Katawan. Siopamay mankimey ed satan ya agew nepeg a pateyen.

Exodo 35:3

Ag kayo anggan mamaparlang ed dalem na kaabungan yo no Agew na Panagpainawa.”

Isaias 58:3

Tepet na saray totoo, “Akin et manayuno kami no ag lamlamang imanoen na Katawan so panayuno mi? Akin et manayuno kami anta ag met lamlamang imanoen na Katawan so ag mi pangan?” Say Katawan kuantod sikara, “Say katwaan to ibabansag yod panagayuno yo so panggagawa yoy pankaabigan yon dili tan say pamapairap yod saray kumikimey yo.

Levitico 23:3

Walay anem agew a pankimey yo, balet ag yo lilingwanan a say kumapiton agew et agew na panagpainawa. Diad satan ya agew ag kayo mankikimey, no ag ingen mantitipon kayon mangigalang ed Dios. Say Agew na Panagpainawa et kayaryan na Katawan, anggan iner so panaayaman yo.

Marcos 2:27

Insan kuanen Jesus, “Say Agew na Panagpainawa so niletneg a pankaabigay too; say too ag pinalsa a para Agew na Panagpainawa.

Lucas 13:14

Balet nampasnuk so inkargadoy sinagoga, lapud amaabig si Jesus ed Agew na Panagpainawa. Inkuantod saray totoo, “Walay anemiran agew a niganan pankimey. Laki diad sarayan agew a mampatambal, aliwan sano Agew na Panagpainawa!”