Ecclesiastes 5:1 - Maung A Balita Biblia

¹ Apiger moy kakaonlam ed Timplo. Say iyakar mon manaral ed Timplo et magmaung ni nen say pangisaklang na saray bagat a singa gagawaen na saray makulang-kulang ya ag da amtan ibiig so maung ed maoges.

Maung a Balita Biblia

¹ Apiger moy kakaonlam ed Timplo. Say iyakar mon manaral ed Timplo et magmaung ni nen say pangisaklang na saray bagat a singa gagawaen na saray makulang-kulang ya ag da amtan ibiig so maung ed maoges.

Ecclesiastes 5:1 Iomraidhean Croise

2 Saray Awaran 26:16

Balet nagmaliw a mapaatagey si Ari Uzias nen pinmalaloy pakayari to; sikato yay makasengeg na inkaderal to. Nileglemew to so Katawan a Dios to nen linmad Timplo a nampool na insinso ed tapew na altar a panagpoolay insinso.

Say Libro nen Job 11:2

“Anggapoy onebat ed sarayan andi-kakanaan a balikas? Napatonung kasiy sakey a too lapud masalita?

Say Libro nen Job 22:12

Ag ta manaayam ed sankatageyan a tawen so Dios, tan ososdongan to ray bitewen anggaman ya atagtagey ira?

Saray Salmo 89:7

Sikay gagalangen ed tipon da ray masanto; manalalagey iran amin a natatakot ed sika.

Exodo 3:5

“Ag ka onaasingger dia,” inkuan na Dios, “ekal mo ray sandalyam, ta masanto so dalin a kawalaan mo.

Exodo 30:18

“Manggawa kay gansan talyasi a panorasan tan say gansan ansagan to. Iliram ed nanleetan na Tulda tan say altar, tan kargaan mo na danum.

Probirbio 10:19

Mainomay a makapankasalanan so toon malabir. Makabat so toon madangka ed panagsalita.

Probirbio 15:8

Makaliliket so Katawan no mampikasi iray totoon maptek, balet kabosul to ray bagat ya iyaakar ed sikato na saray totoon maoges.

Probirbio 21:27

Kabosul na Katawan iray bagat na saray totoon maoges, nagkalalo la no maoges iray getma ran mangibagat.

Isaias 66:3

“Saray totoo gagawaen day labay dan dili. Anggapoy pandomaan ed sikara so pamatey na baka ya ibagat tan say pamatey na too ya ibagat; say pangibagat na kordiro tan say pamekpek na aso ed tenger; say pangisaklang da na bagat a trigo tan say pangibagat day dala na baboy; say pangibagat da na insinso tan say pampikasi rad talintaoy diriyos. Maliket irad makapaingungot a klasiy panangigalang ed Dios.

Levitico 10:3

Insan inkuanen Moises ed kinen Aaron, “Sikato yay sasalitaen na Katawan nen inkuanto, ‘Amin da ray manlingkur ed siak nepeg a pagalangan day inkasantok; ipatnag kod saray totook so kagalangan ko!’” Balet ag inmesel si Aaron.

Saray Gawgawa 10:33

Impaawit ta kan tampol, tan salamat la ta sinmabi ka. Kanyan wadya kamin amin natan a nantitipon a sankanengneng na Dios tan manaalagar kamin mandengel na antokaman a paibabagad sikay Katawan.”

Saray Gawgawa 17:11

Magmaung ni rad may Judion pitongtongan nen saray taga Tesalonica. Agaylay karerengel da ed ipupulong nen Pablo, tan inagew-agew dan sosokayan so Masanton Sulat, ta labay dan nengnengen no tuay ibabaga nen Pablo.

1 CORINTO 11:22

Anggapo tay kaabungan yon panganan tan inoman yo? Odino lalon labay yon lemlemewey iglisiay Dios tan pabpabaingan iray mairap-bilay? Antoy ibagak ed sikayo natan? Idayew ta kayo kasi? Andi! Ag ta kayo nepeg ya idayew ed sayan gagawaen yo!

Saray Hebreo 10:26

No kasumpal tin naamtaay katwaan et gagalaen tayo niy mankasalanan, anggapo lay bagat a makapaandid saray kasalanan tayo.

Santiago 1:19

Tandaan yo ya, inararok iran agagi! Nepeg a masiglat ya ondengel so balang sakey, mapalnad panagsalita, tan aliwan maipapasnuk.

Josue 5:15

Inkuan na samay pangulo da ray sondalo na Katawan, “Ekal moy sandalyam ta manalalagey kad masanton dalin.” Et ginawa nen Josue so nibagad sikato.