Amos 1:2 - Maung A Balita Biblia

² Inkuanen Amos, “Unuungol a manlapud Sion so Katawan; onkakarul a manlapud Jerusalem so bosis to. Namamagaan iray pastolan tan ompapatey iray dika ed Palandey na Carmelo.”

Maung a Balita Biblia

² Inkuanen Amos, Unuungol a manlapud Sion so Katawan; onkakarul a manlalapud Jerusalem so bosis to. Namamagaan iray pastolan tan ompapatey iray dika ed Palandey na Carmelo.

Amos 1:2 Iomraidhean Croise

Saray Salmo 29:4

Narerengel so bosis na Katawan, say bosis ton makapanyari tan napnoy kagalangan.

Saray Salmo 46:6

Natatakot iray bansa, nagogolo ray nanarian; oneeyag so Dios, et natotonaw so sankamundoan.

Probirbio 20:2

Takotan moy mamapasnuk ya ari a singa itakot mod mangwam a lion; mambibikkel ka no pampasnuken mo.

Isaias 33:9

Ataynan so dalin kanyan anggapoy onkitakitaw. Amagaan so takel na Libano, nagmaliw a singa kalawakan so patar na Saron, tan mampagpag iray bulong na kakiewan ed Basan tan diad Palandey na Carmelo.

Isaias 35:2

Mankanta tan maneyag ed liket so kalawakan; magmaliw a marakep a singa Saray Palandey na Libano tan mataba a singa saray kaalogan na Carmelo tan Saron. Nanengneng na balang sakey a too so kagalangan na Katawan, say inkatalonggaring to tan say pakapanyari to.

Isaias 42:13

Say Katawan ompapaway a milaban a singa sondalon mibabakal; akaparaan tan mampilalek a mibakal. Oneeyag na eyag na bakal; ipapanengneng toy pakayari to sumpad saray kalaban to.

Jeremias 12:4

Kapigay itonda na sayan inkamagaay dalin mi, tan say inkalenes na karikaan ed kaalogan? Ompapatey iray ayayep tan saray manok, lapud kaogsan na saray totoon manaayam ed sayan dalin, ya ibabaga ra, ‘Ag nanenengneng na Dios so gagawaen mi.’”

Jeremias 14:2

“Say Juda et walad kaermenan, ompapatey iray siudad to, mandokdokul ed dalin iray totoo to lapud kaermenan, tan onkekerew na tulong so Jerusalem.

Jeremias 25:30

“Sika, Jeremias, nepeg mon ipulong ya amin iray imbagak. Nepeg mon ikuan ed sarayan totoo, ‘Say Katawan unungol manlapud tawen tan onkarul manlapud saray tagey na tawen. Unungol sumpad saray totoo to; oneyag a singa lakin manggagatingatin na saray ubas, Narengel na balang too ed tapew na dalin,

Jeremias 28:8

Saray propitan nansalita nen abayag lan panaon kasakbayan na panaon ko tan panaon mo, impropisiya ray idalan na bakal, eras, tan salot ed saray amayamay a bansa tan saray makapanyarin nanarian.

Jeremias 50:19

Papawilen kod dalin da iray totood Israel. Pantagano da ray bunga na tanaman ya ontutubod Palandey na Carmelo tan diad pasen na Basan, tan kanen day labalabay da ed saray tanaman ya ontutubo ed dalin na Efraim tan dalin na Galaad.

Oseas 11:10

“Ontombuk ed siak iray totook no singa ak lion ya ongwam ed saray kalaban da. Manlapud sagur mangganat iran ondagod siak.

Oseas 13:8

Dogpaan ta kayo a singa sakey ya uson imbatik da ray anak to, tan wabwaben ko ray pagew yo. Singa ak lion a buagen ta kayod kawalaan yo, tan singa ak ayep ed katakelan a mamingbingkas ed sikayo.

Joel 1:19

Ontatawag ak ed sika, O Katawan, lapud amagaan iray pastolan tan saray kakiewan, singa ra apoolan.

Joel 2:11

Say Katawan iyeeyag ton singa karul so ganggan tod saray sondalo to. Amayamay iray sondalo ton onoonur ed sikato tan makapanyari ra. Makapataktakot a tuloy so agew na Katawan! Siopay makapaliis ed patey no onsabi yan agew?

Joel 3:16

Unungol a manlapud Palandey na Sion so Katawan; say bosis to onkarul a manlapud Jerusalem; nayakayak iray katawenan tan nayegyeg so dalin. Balet iyagel to ray totoo to.

Amos 9:3

No onamut irad toktok na Palandey na Carmelo, anapen ko ra et erelen ko ra. No iyamutan da ak ed dalem na dayat, iganggan koy dragon ed dayat ta ketketen to ra.

Nahum 1:4

Igaganggan toy dayat et oneekat! Paeekaten to ray ilog! Namamagaan iray kaalogan na Basan, namamagaan so Palandey na Carmelo, tan nalalaylay iray rosas na Libano.

1 Samuel 25:2

Walay sakey a lakin kabyangay boleg nen Caleb a manngaray Nabal; taga baley na Maon, balet say kawalaay anapan to diad baley na Carmel. Mayaman a maung yan too: talon libo so karniro to tan sanlibo so kanding to. Say asawa to si Abigail, sakey a maganggana tan maotek a bii; balet si Nabal maonganget tan aliwliway ogali to. Aminsan walad Carmel si Nabal a mangakatliy karniro to.