1 Saray Arari 3:14 - Maung A Balita Biblia

¹⁴ Et no mambilay ka onung na linawak, no onuren mo ray ganggan tan saray bilin ko a singa ginawa nen amam a David, itdan ta ka na andokey a bilay.”

Maung a Balita Biblia

¹⁴ Et no mambilay ka onung na linawak, no onuren mo ray ganggan tan saray bilin ko a singa ginawa nen amam a David, itdan ta ka na andokey a bilay.

1 Saray Arari 3:14 Iomraidhean Croise

1 Saray Arari 11:34

Balet ag ko ekalen so intiron nanarian ed kinen Solomon, tan pansiansiaen kon manoley legan ton mambibilay, lapud kinen pinilik a David ya aripen kon angonur na saray ganggan tan saray bilin ko.

1 Saray Arari 15:5

Ginagawa ya na Katawan, lapud ginawa nen David iray makapaliket ed sikato tan ag ton balut sinumlang iray ganggan to, likud ed samay ginawa to ed Urias a Heteo.

1 Saray Arari 3:3

Inaro nen Solomon so Katawan tan sinumpal to ray bilibilin nen ama ton David, balet nampapatas met na saray amayamay ya ayayep tan imbabagat to rad nandoroman altar.

1 Saray Arari 3:6

Inmebat si Solomon, “Balbaleg a panangaroy inter mod kinen amak a David ya aripen mo, ta maung, matoor, tan matonung so impanbilay tod arap mo. Intuloy mo nin inter ed sikato yan baleg tan ag naoman a panangaro diad impangiter mod sikatoy sakey ya anak a lakin manooley natan a kasalat to.

1 Saray Awaran 28:7

Pansiansiaen kod anggad angga so nanarian to, no ituloy ton apiapigeren ya onuren iray ganggan tan saray bilin ko a singa gagawaen to la.’

1 Saray Awaran 28:9

Insan inkuantod kinen Solomon, “Anak ko, nia so bilin kod sika: birbir moy Dios nen amam tan panlingkuran mod intiron pusom tan mabolbolus a linawa. Amta to ray amin a kanunotan tan saray pilalek tayo. No ondago kad sikato, awaten to ka; balet no ibeneg mo, ando lan andon ikaindan to ka.

2 Saray Awaran 29:2

Ginagawa toy makapaliket ed Katawan, ta inalig to ray ginagawa nen laki ton Ari David.

2 Saray Awaran 34:2

Ginagawa toy makapaliket ed Katawan; inalig to ray ginagawa nen laki ton Ari David, ta mapeget ton inonur ya amin iray ganggan na Dios.

Saray Salmo 132:12

No tooren na saray anak mo so impisipanan ko, tan onuren da ray ganggan ya ibangat kod sikara, onsalat met a manari ya anggad angga iray anak da.”

Saray Salmo 21:4

Kinmerew na bilay et initdan mo, andokey tan andi-anggaan a bilay.

Saray Salmo 21:5

Baleg so kagalangan to lapud tinulongan mo; impagmaliw mon bantug tan matalonggaring.

Saray Salmo 91:16

Tumangan ko ra na andokey a bilay, tan ilaban ko ra.”

Probirbio 3:16

Say kakabatan itdan to kay andokey a bilay, kayamanan, tan kagalangan.

Probirbio 3:2

Say bangat ko et itdan to ka na andokey tan maaligwas a bilay.

Zacarias 3:7

say Katawan a Makapanyarin-amin kuanto: “No onuren mo ray ganggan ko tan sumpalen mo ray kimey a nipabetang ed sika mansiansia kan makaoley ed Timplok tan diad saray patio to, tan dengelen ko ray pikakasim a singa pandedengel kod pikakasi da ray anghil a manaayam ed kawalaan ko.

Saray Gawgawa 13:22

Nen inekal lay Dios si Saul, inter ton manarid sikara si David. Onyay imbagay Dios nipaakar ed sikato: ‘Nalmok a si David ya anak nen Jesse so toon pakaliliketan ko, sakey a toon sipaparaan a manumpal na amin a linawak.’

Deuteronomio 25:15

Ikana yo so tua tan dugan simbangan tan sukatan, pian andokey so pambilay yo ed dalin ya iiter ed sikayo na Katawan a Dios yo.

Deuteronomio 5:16

“‘Igalang moy amam tan say inam, onung na ingganggan ko, siak a Katawan a Dios mo, ed sika, pian maung lawas so kipapasen mo tan andokey so pambilay mo ed dalin ya iter kod sika.

Deuteronomio 5:33

Onur yo ran amin, pian maung lawas so kipapasen yo tan mansiansia kayon mambilay ed dalin a panayaman yo.

1 Timoteo 4:8

Walay kaabigan ya iiter na pangipasal na laman. Balet say pangipasal ed masanton panagbilay et lalon maabig so iter to, ta isipan toy bilay a para natan tan diad arapen.