1 Saray Arari 21:3 - Maung A Balita Biblia

³ “Tinawir ko yan kaubasan ed saray lalakik,” ebat nen Nabot. “Ag iyabuloy na Katawan ya iter kod sika!”

Maung a Balita Biblia

³ Tinawir ko yan kaubasan ed saray lalakik, ebat nen Nabot. Ag iyabuloy na Katawan ya iter kod sika!

1 Saray Arari 21:3 Iomraidhean Croise

Genesis 44:17

Inkuanen Jose, “Andi, ag ko tan balut gawaen! Saman labat so akalmoay kupa so magmaliw ya aripen ko. Saray arum ed sikayo, nayarian yo lay onsempet ed kinen ama yo.”

Genesis 44:7

Inmebat ira, “Antoy labay mon ibaga diad pansasalitam na ontan? Sambaan mi ya ag mi ginawa tay ibabagam.

1 Saray Awaran 11:19

tan kuanto, “Ag nayarin balut ya inomen ko ya! Ta no inomen ko, singa iinomen ko so dala da ra yan totoo ya angipostay bilay da!” Kanyan ag to ininom. Sikara ya so ginagawa na saramay taloran bantug a sondalo.

Say Libro nen Job 27:5

Ag kon balut ibaga a sikayo so duga; legan a mabilay ak ipasoot kon anggapoy kasalanan ko.

Ezekiel 46:18

Say manoley a prinsipi et ag nepeg ya alaen tod saray totoo so antokaman a kayaryan da. Say dinan man a dalin ya iter tod saray anak ton lalaki et nepeg a manlapud dalin a nipabetang ed sikato, pian ag to napairap so siopaman ed saray totook diad pangala tod dalin.”

Levitico 25:23

Say dalin ag nepeg ya ilakon anggad angga lapud ag yo kayaryan; say Dios so akankayaryan, tan singa kayo sangkailin naabuloyan a mangikana ed dalin.

Saray Bilang 36:7

Kayaryan na balang sakey ya Israelita et nepeg a mansiansia ed dilin tribu to.

Saray Bilang 36:9

kanyan ag onlad sananey a tribu so kayaryan to. Say kayaryan na balang tribu nepeg a mansiansian kayaryan to.”

Saray Taga Roma 3:31

Lapud sayan pananisia, ekalan mi kasiy kakanaan so Ganggan? Andin balut! Itatalindeg mi ingen so Ganggan.

Saray Taga Roma 3:4

Andi! Nepeg a matoor ed katwaan so Dios anggaman a matilan amin iray katoowan, ta onung na ibabagay Masanton Sulat, “Saray salitam so mangipatnag a maptek ka; tan manalo ka no sikay naakusa.”

Saray Taga Roma 3:6

Andin balut! No aliwan matonung so Dios, panon ton sintinsiaay sankamundoan?

Saray Taga Roma 6:15

Anto sirin ey, mankasalanan itayo kasi lapud aliwa tin walad silong na ganggan no ag ta walad silong na baleg a panangaroy Dios? Andi!

Saray Taga Roma 6:2

Andi! Inatey ti lad kasalanan, panon niy pambilay tid kasalanan?

Saray Taga Roma 7:13

Say labay to yan ibaga kasi et say kamaungan so makasengeg na impatey ko? Andi! Say kasalanan so amatey ed siak; diad panamegley na kamaungan so impamatey na kasalanan ed siak, pian nipanengneng so tuan kipapasey kasalanan. Kanyan diad panamegley na ganggan, apatnagay ontan lan kaogsay kasalanan.

Saray Taga Roma 7:7

Nayarian ti kasin ibaga a makapakasalanan so Ganggan? Ag nayari! Anggaman ontan, say Ganggan so angipaamtad siak no antoy kasalanan. No ag imbagay Ganggan, “Ag ka maagom,” ag ko komun amta no anto tay panagagom.

1 CORINTO 6:15

Ag yo ta amta a saray laman yo et kabyangan nen Cristo? Alaen ko tay kabyangan nen Cristo, insan ko gawaen a kabyangan na biin marotak? Ag nayarin balut!

TAGA GALACIA 6:14

Balet no para siak, anggapo lay arum a pampasirayewan ko no ag say krus labat na Katawan tayon Jesu-Cristo; ta diad panamegley na krus to, say sankamundoan inatey la para siak, tan inatey ak la para sankamundoan.

Josue 22:29

Anggapon balut so getma min onsumpad Katawan odino ontonda kamin ontombuk ed sikato diad panggawa miy sakey ya altar a pangisaklangan mi na saray bagat a para kareenan odino saray bagat a trigo odino arum ni ran bagat. Ag mi kaduaan imay altar a walad arap na Tuldan Ayaman to.”

Josue 24:16

Inmebat iray totoo, “Ag min balut taynan so Katawan pian makapanlingkur kamid arum a diriyos!

1 Samuel 12:23

Para say siak, ag komun iyabuloy na Katawan a mankasalanan ak diad pangitondak na pangipikasik ed sikayo. Ingen, ibangat kod sikayo no anto ray maung tan maptek a gawaen yo.

1 Samuel 24:6

tan kuantod saray totoo to, “Ag iyabuloy komun na Katawan a pasakitan koy pinili ton ari! Ag ko nepeg a pasakitan ta sikatoy ari a pinili na Katawan!”