1 Samuel 16:7 - Maung A Balita Biblia

⁷ Balet inkuan na Katawan ed sikato, “Ag mo iimanoen no panoy kinabaleg tan kinaguapo to. Impolisay ko, ta say panagpilik aliwan singa panagpili na too. Say too say walad paway so nenengnengen to, balet say puso so nenengnengen ko.”

Maung a Balita Biblia

⁷ Balet inkuan na Katawan ed sikato, Ag mo iimanoen no panoy kinabaleg tan kinaguapo to. Impolisay ko, ta say panagpilik aliwan singa panagpili na too. Say too say walad paway so nenengnengen to, balet say puso so nenengnengen ko.

1 Samuel 16:7 Iomraidhean Croise

Genesis 4:5

balet ag akaliket ed kinen Cain tan samay bagat to. Mapalaloy pasnuk nen Cain tan binmilonget so lupa to.

2 Samuel 14:25

Diad intiron Israel anggapoy anggan sakey a toon mipara ed inkabantug nen Absalom lapud inkaguapo to; anggapoy deral to manlapud toktok na olo to ya anggad dapan to.

2 Samuel 7:20

Anto niy nayarian kon ibagad sika? Kabkabat mo ak, say aripen mo.

1 Saray Arari 8:39

dengel mo pay pikakasi ra. Diad ayaman mod tawen dengel mo pa ra, pirdonam ira, tan tulongan mo ra. Sika labat so makaamta ed kanunotan na balang sakey a too. Iter mo pad balang sakey so kanepegan ton awaten,

1 Saray Awaran 17:18

Anto niy nayarian kon ibagad sika? Kabkabat mo ak ya aripen mo, et siansian papagalangan mo ak.

1 Saray Awaran 28:9

Insan inkuantod kinen Solomon, “Anak ko, nia so bilin kod sika: birbir moy Dios nen amam tan panlingkuran mod intiron pusom tan mabolbolus a linawa. Amta to ray amin a kanunotan tan saray pilalek tayo. No ondago kad sikato, awaten to ka; balet no ibeneg mo, ando lan andon ikaindan to ka.

2 Saray Awaran 16:9

Iimanoen a maung na Katawan so sankamundoan, pian naitdan to na pakayari iray totoon matoor ed sikato so kapusoan da. Kakulang-kulangan so ginawam, kanyan manlapud natan lawas kan mibakal.”

2 Saray Awaran 6:30

dengel mo pa ray pikakasi ra. Ditad ayaman mod tawen dengel mo pa ra tan pirdonam ira. Sika labat so makaamta ed kanunotan na balang sakey a too. Iter mo pad balang sakey so kanepegan ton awaten,

Say Libro nen Job 10:4

Singa kasi panangipasen mi so panangipasen mo ed saray bengatla?

Say Libro nen Job 35:5

Tangay moy tawen! Nengneng mo so ontan lan kaatagey na saray lorem!

Saray Salmo 139:2

Antam ya amin iray gagawaen ko; anggan arawiy kawalaan mo, natatalusan mo ray kanunotan ko.

Saray Salmo 7:9

Matonung kan Dios tan sisintinsiaan moy kanunotan tan pilalek mi. Patondam pay kaogsan da ray totoon maoges tan tumangan mo pa ray maung a totoo.

Probirbio 15:11

Amta na Katawan so anggan walad pasen a panaayaman da ray inaatey; panon sirin ya iyamut na too ed Dios iray kanunotan to.

Probirbio 16:2

Nayarin abaloan mo a maptek ya amin so gagawaen mo, balet say Katawan sisintinsiaan to ray gagalam.

Probirbio 24:12

Nayarin ibagam ya anggapoy pibabalim, balet amta na Dios iray getmam tan simbangen to ra. Say Dios a mamabantay ed sika amta toy peteg a nagagawa. Tumangan to ka onung ed gagawaen mo.

Probirbio 31:30

Makapalikdo so limgas tan mangangga so ganggana, balet nepeg ya idayew so biin papagalangan toy Katawan.

Jeremias 11:20

Insan nampikasi ak, “Katawan a Makapanyarin-amin, sakey kan matonung a huis; susuboken moy kanunotan tan say liknaan da ray totoo. Iyabuloy mo pan nanengneng ta kan ombawid sarayan totoo, lapud sikay angimatalkan kod kipapasen ko.”

Jeremias 17:10

Siak, say Katawan, sokayan ko ray kanunotan tan suboken ko ray puso da ray totoo. Tumangan ko so balang too onung na panagbilay to, onung na gagawaen to.”

Jeremias 20:12

Balet, Katawan a Makapanyarin-amin, maptek so panusubok mod saray totoo; amtam no anto ray walad puso tan kanunotan da. Iyabuloy mo pan nanengneng koy ibawim ed saray kalaban ko, ta impalimak ed sika so kipapasen ko.

Lucas 16:15

Inkuanen Jesus ed sikara, “Mansimpisimpitan kayod arap na totoo, balet amtay Dios so kipapasen da ray puso yo. Ta say ipapasen a makanakana na too, anggapoy kana tod Dios.

Juan 7:24

Ag yo sisintinsiaay too lapud saray nanengneng yon gagawaen to; sintinsiaan yo onung ed kaptekan.”

Juan 8:15

Manisintinsia kayo onung ed pananintinsiay too, balet anggapoy sisintinsiaan kon too.

Saray Gawgawa 1:24

Insan ira nampikasi, “Katawan, kabat moy walad puso na balang sakey. Ipanengneng mo pad sikami no siopay pinilim ed sarayan dua

2 CORINTO 10:10

Ibabaga ra, “Ambelat tan mabiskeg so panagsulat to, balet diad arap-arapan anggapoy nagawaan to tan andi-kakanaan iray salita to!”

2 CORINTO 10:7

Say paway labat so nenengnengen yo. No ag panduaruwaan na siopaman a sikatoy kayaryan nen Cristo, nepeg ton nunoten a wala kami met ed Cristo.

Saray Hebreo 4:13

Anggapoy niamut ed Dios. Diad pakanengneng to, lokas tan malinew ya amin iray pinalsa, tan sikato so pangebatan tayod kabibilay tayo.

1 Pedro 2:4

Singger kayod Katawan, say baton mabilay ya imbantak na totoo, balet pinili na Dios tan mabmablid pakanengneng to.

1 Pedro 3:4

Say ganggana yo et nepeg a walad peteg ya inkatoo yon niamut ed puso yo, say ag onkupas a ganggana a katekep toy maoyamo tan mareen ya ogali. Sikato yay mabmabli ed matay Dios.

Puyan 2:23

Pateyen ko met iray anak to, pian naamtaan na saray iglisia a siak so makaamta ed puso tan kanunotan da ray katoowan. Mangiter ak ed balang sakey ed sikayo, onung ed saray gawgawa to.

1 Samuel 2:3

Itonda yo lay makmaknul a panagpasirayew yo; ag ki la mampapasirayew ed saray panagsalita yo. Ta say Katawan et sakey a Dios a makapikabat ed amin, tan sintinsiaan toy amin a gawgawa na katoowan.

1 Samuel 9:2

Walay anak ton laki a manngaray Saul; malangwer ni, atagey ni na sankarangan nen amin da ray totood Israel, tan sankaguapuan ed sikara.