Joel 1:9 - Marahay na Bareta Biblia

⁹ Mayo na nin trigo o arak na idodolot sa Templo; nagmomondo an mga padi huli ta mayo sindang mga dolot para sa Kagurangnan.

Joel 1:9 Iomraidhean Croise

2 Mga Cronica 13:10

“Alagad para samo, an Kagurangnan iyo an samuyang Dios asin dai kami nagtalikod saiya. An naglilingkod sa Kagurangnan bilang mga padi iyo an mga aki ni Aaron asin an mga Levita an nagtatabang sainda.

Exodo 28:1

“Ipaapod mo si Aaron na saimong tugang sagkod an saiyang mga aki na si Nadab, Abihu, Eleazar asin si Itamar. Laenon mo sinda sa gabos na Israelita tanganing maglingkod sako bilang mga padi.

Isaias 61:6

Mimidbidon kamo bilang mga padi kan Kagurangnan, an mga sorogoon kan satong Dios. Magkikinabang kamo sa kayamanan kan mga nasyon asin mag-oorgulyo na iyan sadiri nindo.

Mga Panambitan 1:16

“Huli kaini ako naghihibi; mga mata ko nagbubulos nin luha. Mayo nin minaranga sako; mayo nin pwedeng magpakosog kan boot ko. Nagmomondo an sakong kaakian huli ta nadaog ako kan kaiwal.

Mga Panambitan 1:4

Nagmomondo an mga dalan pasiring sa Sion huli ta mayong minadalaw para sa mga talaan na pyesta; mapungaw an saiyang mga trangkahan, nag-aagrangay an saiyang kapadian; ginuyod sa harayo an saiyang mga daraga, asin siya mismo nagtitios nin kapaitan.

Oseas 9:4

Sa mga dayuhan na dagang idto dai sinda makakapagdolot nin arak sa Kagurangnan; dai sinda makakadara saiya nin mga sakripisyo. Madidigtaan an siisay man na magkakan kan saindang kakanon, arog kan kakanon na kinakakan sa harong na may gadan. Huli ta an kakanon ninda panhale sana kan gutom; dai iyan dadarahon bilang dolot sa Templo nin Kagurangnan.

Joel 1:13

Pagsulot nin sako asin pagtangis, kamong mga padi na naglilingkod duman sa altar! Paglaog kamo sa Templo asin pagmondo sa bilog na banggi! Mayo nang trigo o arak na ikakadolot sa saindong Dios.

Joel 1:16

Mayo kitang naginibo mantang rinaraot an satong mga tinanom. Mayo na nin kaogmahan sa Templo kan satong Dios.

Joel 2:14

Tibaad magliwat nin isip an Kagurangnan na saindong Dios asin bendisyonan kamo nin dakulang ani. Dangan madodolotan nindo siya nin trigo saka arak.

Joel 2:17

An mga padi, na naglilingkod sa Kagurangnan sa pagultanan kan altar asin kan pintoan kan Templo, kaipuhan na magtangis saka magpamibi: “Maherak ka sa saimong banwaan, Kagurangnan. Hare pagtugote an ibang nasyon na pagngisihan kami dangan pag-olog-ologon sa pagsabing, ‘Haen an saindong Dios?’”