Jeremias 22:3 - Marahay na Bareta Biblia

³ “Ako, an Kagurangnan, nagboboot saindo na gibohon nindo an matanos asin tama. Iligtas nindo sa madaya an dinadaya. Dai nindo paggibohan nin maraot o pag-apihon an mga dayuhan, mga ilo, asin an mga babaeng balo; dai nindo paggadanon an mga tawong mayong sala sa lugar na ini.

Jeremias 22:3 Iomraidhean Croise

2 Samuel 23:3

Nagtaram an Dios nin Israel; an Gapo nin Israel nagtaram sako: “An hade na nagsasakop na may katanosan, na nagsasakop na may pagkatakot sa Dios,

2 Mga Hade 24:4

asin huli kan paggadan niya sa mga tawong mayo nin kasalan. Huli kaiyan dai pwedeng mapatawad nin Kagurangnan si Manases.

An Libro ni Job 22:9

Isinubol mong mayo nin dara an mga babaeng balo, asin hinabonan saka inapi mo an mga ilo.

An Libro ni Job 24:9

“May mga tawong minaagaw kan mga ilo sa ama sa daghan kan saindang ina; kinukua ninda bilang kabayadan nin utang an mga aki kan mga mayong sukat.

Salmo 68:5

Ama nin mga mayong ama asin parasurog nin mga balo; siring kaiyan an Dios sa saiyang banal na Templo.

Salmo 82:4

Ligtasan an mga dukha asin an mga mayong sukat sa kamot kan mga maraot na tawo.

Salmo 94:21

na nagmamawot nin maraot tumang sa mga matanos na tawo asin minakondenar sa kagadanan sa mga mayo nin kasalan?

Salmo 94:6

Ginagadan ninda an mga balo asin an mga ilo; ginagadan ninda an mga dayuhan na nag-eerok sa samong daga.

Exodo 22:21

“Dai nindo pagpasakitan o pagdaog-daogon an sarong dayuhan; giromdomon nindo na nagin mga dayuhan man kamo sa Egipto.

Exodo 22:22

Dai nindo pagpasakitan an mga babaeng balo o an mga ilo.

Mga Talinhaga 23:10

Dai mo nanggad paghiroon an suanoy na muhon na haloy nang ibinugtak, o pagsakopon an daga kan mga ilo.

Isaias 1:23

An saimong mga lider mga rebelde asin kairiba nin mga parahabon. An gabos namomoot sa suhol asin nagmamawot nin mga regalo. Dai ninda sinusurog an mga ilo asin dai ninda dinadangog an kaso kan mga babaeng balo.

Isaias 58:6

“An pag-ayuno na boot ko iyo ini: Tangkason nindo an kadena nin pang-aapi asin an sakal nin inhustisya, saka talingkasan nindo an mga naaapi.

Isaias 58:7

Hirasan nindo nin pagkakan an mga nagugutom asin pasakaton nindo sa saindong mga harong an mga dukhang mayo nin harong. Tawan nindo nin gubing an mga mayo, asin dai kamo magsayuma sa pagtabang sa saindong mga kadugo.

Jeremias 19:4

Gigibohon ko ini huli ta binayaan ako kan banwaan asin dinigtaan ninda an lugar na ini sa pagdolot ninda digdi nin mga sakripisyo sa ibang mga dios, na dai man ninda midbid, ni kan saindang mga ginikanan asin kan mga hade nin Juda. Pinano ninda an lugar na ini nin dugo kan mga tawong mayo nin sala.

Jeremias 22:17

Alagad mayo ka nin ibang hinihiling kundi an saimong sadiri; ginagadan mo an mayo nin sala asin madahas mong inaapi an saimong banwaan. An Kagurangnan an nagtaram.

Jeremias 26:16

Dangan tinaraman kan mga lider asin kan mga tawo an mga padi saka an mga propeta, “An lalaking ini dai maninigong padusahan nin kagadanan huli ta nagtaram siya sato sa ngaran nin Kagurangnan na satong Dios.”

Jeremias 5:28

nagin mataba saka mabaskog. Mayo nin kataposan an gibo nindang katampalasanan. Dai ninda ginagalangan an deretso kan mga ilo, ni pinapahilingan nin hustisya an mga naaapi.

Jeremias 7:23

Alagad ipinagboot ko sainda na kuyogon ako, tanganing ako an magin Dios ninda asin sinda an magin banwaan ko. Tinaraman ko sinda na mamuhay sosog sa ipinagboot ko, tanganing mapakarhay sinda.

Jeremias 9:24

Kun may boot mag-orgulyo, ipag-orgulyo niya na namimidbidan asin nasasabotan niya ako, huli ta nagdadanay an sakong pagkamoot, saka ginigibo ko an tama asin matanos. Iyan an mga bagay na nawiwilihan ko. Ako, an Kagurangnan, an nagtaram.”

Mga Panambitan 3:36

kun an hustisya binibiko sa hukoman, iyan saiyang naaaraman.

Ezekiel 18:12

Dinadaya niya an mga dukha, nanghahabon siya asin dai niya ipinupuli an isinangra kan nag-utang saiya. Nagduduman siya sa mga paganong altar asin nagsasamba sa makauuyam na mga dios-dios,

Ezekiel 18:7

Dai siya nandadaya o nanghahabon sa kiisay man. Ipinupuli niya an bagay na isinangra kan nag-utang saiya; pinapakakan niya an nagugutom asin ginugubingan an mga huba.

Ezekiel 22:7

Mayo nin siisay man sa syudad na minagalang sa saiyang mga magurang. Dinadaya nindo an mga dayuhan asin inaabuso an mga babaeng balo saka mga ilo.

Ezekiel 45:9

Nagtaram an Kagurangnan Dios, “Nagkasala kamo sa haloy nang panahon, mga pamayo nin Israel! Ontoka nindo an kadahasan asin an pang-aapi. Giboha nindo an matanos asin tama. Dai na nanggad nindo pagpahaleon sa saindang daga an sakuyang banwaan. Ako, an Kagurangnan Dios, an nagtataram saindo kaini.

Joel 3:19

“An Egipto magigin sarong desyerto, asin mayo nang mag-eerok sa Edom, huli ta sinalakay ninda an daga nin Juda asin ginaradan an mga tawong mayo nin sala.

Levitico 19:15

“Dai kamo maghukom na bakong matanos; dai kamo magpahiling nin pagsurog sa mga dukha o pagkatakot sa mga mayaman, alagad sa katanosan, hukoman nindo an saindong kapwa.

Amos 5:15

Kaongisan nindo an maraot, kamotan an tama, asin papagdanayon an hustisya sa mga hukoman; tibaad pa maherakan nin Kagurangnan an mga tawo sa nasyon na ini na nagkakaburuhay pa.

Amos 5:24

Embes kaiyan, pabulosa nindo an hustisya siring sa pagbulos kan salog, asin an katanosan siring sa sapa na dai nagmamara.

Mikas 3:11

An mga pamayo nagpapasuhol bago maghukom, nagpapatandan an mga padi bago magtukdo, asin an mga propeta naghuhula huli sa kwarta—asin gabos sinda nagsasabi na yaon sainda an Kagurangnan. Nagsasabi sinda, “Mayong maraot na maabot sa samo. Yaon sa samo an Kagurangnan.”

Mikas 6:8

Dai, sinabihan na kita nin Kagurangnan kun ano an marahay. An hinahagad niya sato iyo ini: an paggibo kan matanos, an danay na mamoot, asin an mamuhay na mapakumbaba sa kaibahan nin satong Dios.

Malakias 3:5

Nagsasabi an Kagurangnan nin mga hukbo, “Madatong ako sa tahaw nindo sa paghukom, asin ako an masaksi laban sa mga parakulam, sa parasambay, sa mga nagsasaksi nin putik, sa mga nagdadaya kan bayad kan mga parapatandan, asin sa mga nang-aapi sa mga babaeng balo, mga ilo, asin mga dayuhan—sa gabos na dai minagalang sako.

Mateo 23:23

“Herak man saindo, mga paratukdo kan Katogonan asin mga Fariseo! Mga parasagin-sagin! Nagtatao kamo sa Dios nin himoloan maski kan tinanom na panrekado siring kan anis, pamyenta asin komino. Alagad dai nindo kinukuyog an mas mahalagang katukdoan sa Katogonan arog kan katanosan, pagkaherak asin pagtubod. Ini an dapat nindong gibohon, dangan dai man nindo pagpabayaan an iba.

Deuteronomio 10:18

Tinatawan niya nin katanosan an mga ilo saka mga babaeng balo; namomotan niya an mga dayuhan na nakikihimanwa sa satong banwaan asin tinatawan niya sinda nin pagkakan saka gubing.

Deuteronomio 24:17

“Dai nindo paghalean nin katanosan an mga dayuhan asin an mga ilo; dai nindo pagkuahon bilang sangra sa utang an gubing nin sarong babaeng balo.

Deuteronomio 24:7

“An siisay man na mangidnap nin kapwa Israelita tanganing oriponon o tanganing ipabakal bilang oripon, kaipuhan gadanon. Sa siring na paagi, mahahale saindo an karatan na ini.

Deuteronomio 25:1

“Halimbawa nag-iwal an duwang lalaki asin nag-atubang sinda sa hukoman, dangan ibinaba kan hukom an desisyon na pagpatalingkas kan mayong sala asin pagkondenar kan nagkasala.

Deuteronomio 27:19

“‘Maldisyonon an siisay man na magbiko kan katanosan nin sarong nakikihimanwa, ilo, asin babaeng balo.’ “Dangan an bilog na banwaan masimbag, ‘Amen!’

Santiago 1:27

Sa Dios Ama, an malinig saka mayong digtang pagkamaki-Dios iyo ini: an pagtabang sa mga ilo asin sa mga babaeng balo sa saindang kasakitan, dangan an pag-ingat sa sadiri na dai madigtaan kan kinaban.