Daniel 7:8 - Marahay na Bareta Biblia

⁸ Mantang minamaanan ko an mga sungay, nahiling kong nagtunga an sarong sadit na sungay sa kaibahan kan sampolo. Binulnot kan sadit na sungay an tolo sa sampolo. An sungay na ini igwa nin mga matang arog kan sa tawo, asin sarong ngoso na nagtataram nin kapalangkawan.

Daniel 7:8 Iomraidhean Croise

Salmo 12:3

Paontoka an mga dilang putikon, Kagurangnan! Serahan mo an mga ngosong mapaabaw-abaw,

Daniel 11:36

“Gigibohon kan hade nin Siria an anoman na mawoton niya; ipaghahambog niyang mas dakula siya ki sa arin man na dios, orog pa ki sa Kahorahalangkaweng Dios. Magigibo niya iyan sagkod na mag-abot an panahon kan pagpadusa saiya nin Dios; huli ta kun ano an nasa plano nin Dios iyo an mangyayari.

Daniel 7:19

Dangan nagkaigwa ako nin pagmawot na maaraman an katotoohan dapit sa ikaapat na hayop, na napapalaen sa ibang mga hayop—an makatatakot na hayop na nagronot kan saiyang mga biktima sa paagi kan bronseng mga kuku saka lansang na mga ngipon, bago niya sinda timaktimakan.

2 Tesalonica 2:4

Sasalungaton niya an pinagsasabing dios-dios o an mga bagay na pinagsasamba, asin ilalangkaw niya an saiyang sadiri. Lalaogon niya an Templo nin Dios, matukaw duman dangan ipapahayag niya na siya an Dios.

2 Timoteo 3:2

An mga tawo magigin makasadiri, makikwarta, mapaabaw-abaw, mapalangkaw; sinda magigin paramuda, masombikal sa mga magurang, dai tataong magromdom nin utang na boot, saka daing Dios na minimidbid;

2 Pedro 2:18

Halangkaw sindang manaramtaram alagad mayong laog; dinadagka ninda sa paagi kan mga karompotan nin laman an mga dai pa nahaloy na makasuhay sa kaibahan kan tawong sala an pamumuhay.

Judas 1:16

An mga tawong ini danay na naggugumod-gumod saka nagbabasol sa iba; sinusunod ninda an saindang maraot na mga kamawotan; mga mapalangkaw sinda, asin sagin-sagin na inoomaw an mga tawo huli sa pakinabang na makukua ninda.

Kapahayagan 13:1

Dangan nahiling ko an sarong hayop na nagbubutwa sa dagat. May sampolong sungay idto saka pitong payo. Igwa nin korona an lambang sungay; asin sa lambang payo may nakasurat na ngaran na naglalanghad sa Dios.

Kapahayagan 9:7

Kun paghilingon, an mga doron garong mga kabayo na andam sa pakilaban; an saindang mga payo igwa nin garo koronang bulawan; an lalawogon ninda garo sa tawo.

1 Samuel 2:3

Ontoka an saindong kapaabaw-abawan; ontoka an saindong kahambogan. Huli ta an Kagurangnan sarong Dios na nakakaaram, gabos na gibo nin tawo saiyang hinuhukoman.