2 Samuel 9:3 - Marahay na Bareta Biblia

³ Hinapot siya giraray kan hade, “May natatada pa daw sa pamilya ni Saul na pwede kong pahilingan kan pagkaherak nin Dios?” Nagsimbag si Ziba, “Igwa pa nin natada sa mga aki ni Jonatan. Saro siyang pilay.”

2 Samuel 9:3 Iomraidhean Croise

2 Samuel 19:26

Nagsimbag siya, “Mahal na hade, ika nakakaaram na pilay ako. Sinabihan ko an sakong sorogoon na kamaderohan an asno tanganing makasakay ako asin makaiba saimo, alagad dinaya niya ako.

2 Samuel 19:27

Kaputikan an ibinareta niya saimo manongod sako, alagad arog ka sa anghel nin Dios, kaya giboha an pinaghohona mong marahay.

2 Samuel 4:4

Si Jonatan na aking lalaki ni Saul igwa nin aking lalaki na an ngaran Mefiboset. Limang taon pa sana an edad niya kan magadan si Saul asin si Jonatan. Kan an bareta manongod kan saindang pagkagadan mag-abot hale sa syudad nin Jezreel, an aki kinua tolos kan paraataman asin nagdulag; sa kasibotan, nabutasan niya an aki na ikinapilay kaini.

2 Samuel 9:13

Kaya si Mefiboset, na pilay an duwang bitis, nag-erok sa Jerusalem asin nagkakan sa lamesa kan hade.

2 Samuel 9:7

Sinabihan siya ni David, “Dai ka matakot; huli ta maheherakan taka huli ki Jonatan na saimong ama. Ibabalik ko saimo an gabos na daga na dating sadiri kan saimong lolo na si Saul, asin digdi ka magkakakan sa sakong lamesa.”

Lukas 6:36

Magin maheherakon kamo arog kan saindong Ama.

Deuteronomio 10:15

Alagad labi-labi an pagkamoot nin Kagurangnan sa saindong mga ginikanan, kaya pinili niya kamo embes na an ibang mga tawo, asin sagkod ngunyan, kamo an saiyang sadiring banwaan.

Deuteronomio 4:37

Pinili niya kamo huli ta namotan niya an saindong mga ginikanan; huli kan saiyang dakulang kapangyarihan, ilinuwas niya kamo hale sa Egipto.