1 Samuel 7:3 - Marahay na Bareta Biblia

³ Sinabihan ni Samuel an mga Israelita, “Kun magbalik kamo sa Kagurangnan sa bilog nindong puso, kaipuhan haraleon nindo an mga dayuhan na dios asin an mga ladawan kan diosang si Astarte. Bilog nindong idusay an saindong sadiri sa Kagurangnan; siya sana an saindong paglingkodan, asin ililigtas niya kamo sa kapangyarihan kan mga Filisteo.”

1 Samuel 7:3 Iomraidhean Croise

Genesis 35:2

Kaya sinabihan ni Jacob an saiyang pamilya asin an gabos na kaibahan niya, “Itapok nindo an mga dayuhan na dios na yaon saindo; maglinig kamo kan saindong sadiri asin magsangle kamo kan saindong gubing,

1 Mga Hade 11:33

Gigibohon ko ini huli ta isinikwal ako ni Solomon asin nagsamba siya sa mga dayuhan na dios: ki Astarte, an diosa nin Sidon; ki Kemos, an dios nin Moab; asin ki Molek, an dios nin Ammon. Tinalikodan ako ni Solomon; nagkasala siya asin dai niya inotob an sakong mga togon saka mga pagboot, bakong arog kan gibo kan saiyang ama na si David.

1 Mga Hade 8:48

Kun magsolsol sinda sa bilog na puso asin isip duman sa daga kan saindang mga kaiwal na nagbihag sainda, asin mamibi saimo mantang nakaatubang sa dagang ini na itinao mo sa saindang mga ginikanan, sa syudad na ini na saimong pinili, asin sa Templong ini na itinugdok ko para saimo,

2 Mga Hade 17:39

Kuyogon nindo ako, an Kagurangnan na saindong Dios, asin ililigtas ko kamo sa saindong mga kaiwal.”

2 Mga Hade 23:15

Ipinagaba man niya an lugar na pagsasambahan sa Betel na ginibo ni Hadeng Jeroboam na aking lalaki ni Nebat, na nagpakasala sa Israel. Ipinarumpag niya an altar, ipinapedaso an mga gapo kaini saka ipinabayo nin pino; ipinasulo man niya an ladawan ni Asera.

1 Mga Cronica 22:19

Kaya maglingkod kamo sa Kagurangnan na saindong Dios sa bilog nindong puso asin kalag. Poonan na nindo an pagtugdok kan Templo, tanganing ikabugtak nindo diyan an Kaban nin Tipan nin Kagurangnan saka an banal na mga kagamitan para sa pagsamba saiya.”

1 Mga Cronica 28:9

Dangan sinabihan ni David si Solomon, “Aki ko, midbidon mo an Dios nin saimong ama, asin paglingkodan mo siya sa bilog mong puso asin makinuyog-kuyog na pag-isip, huli ta sinisiyasat nin Kagurangnan an gabos na puso asin naaaraman niya an lambang pag-isip saka pagmawot. Kun hanapon mo siya, makukua mo siya; kun talikodan mo siya papabayaan ka niya sagkod lamang.

2 Mga Cronica 19:3

Alagad maski siring, igwa man nin nakuang karahayan saimo, huli ta hinarale mo an mga simbolo ni Asera asin hiningowa mong magsunod sa kabotan nin Dios.”

2 Mga Cronica 20:33

Alagad dai niya ginaba an paganong mga lugar na pagsasambahan asin an mga tawo bakong bilog sa pusong nagsamba sa Dios nin saindang mga ginikanan.

2 Mga Cronica 30:19

“O Kagurangnan, Dios nin samuyang mga ginikanan, sa saimong pagkamarahayon patawada an mga nagsasamba saimo nin tudok sa puso, maski dai sinda nakapag-otob kan mga pagsusundon manongod sa paglinig.”

Mga Talinhaga 16:1

Nasa tawo an pagplano, alagad nasa Dios an huring tataramon.

Isaias 55:7

Pabayaan na kan tampalasan an maraot nindang pamumuhay asin an biko nindang mga kaisipan. Magbalik na sinda sa Kagurangnan, an satong Dios; maheherakon siya asin madaling magpatawad.

Jeremias 24:7

Itatao ko sainda an pusong mag-aako na ako iyo an Kagurangnan. Dangan magigin banwaan ko sinda, asin ako an magigin Dios ninda, huli ta mabalik sinda sako sa bilog nindang puso.

Jeremias 36:3

tanganing kun madangog kan mga taga Juda an gabos na karatan na boot kong darahon sainda, tibaad magbakle sinda sa mga maraot nindang gawe. Dangan papatawadon ko sinda kan mga karatan asin kasalan ninda.”

Jeremias 4:1

An Kagurangnan nagtataram, “Banwaan nin Israel, kun kamo mabalik, magbalik kamo sako. Kun haleon nindo an mga ladawan na kinakaongisan ko saka maogmang magmaimbod kamo sako,

Ezekiel 14:6

“Kaya ngunyan sabihan mo an mga Israelita kan itinataram ko, an Kagurangnan Dios: Magbakle kamo asin bayae nindo an makauuyam nindong mga dios-dios.

Ezekiel 18:31

Bayaan nindo an gabos na kasalan na naginibo nindo tumang sako, asin magkua kamo para saindo nin bagong puso saka bagong espiritu! Kamong mga Israelita, tadaw ta boot nindong magadan?

Oseas 14:1

Magbalik kamo sa Kagurangnan na saindong Dios, O banwaan nin Israel. An saindong kasalan iyo an nakapatumba saindo.

Mateo 15:8

‘Inoomaw ako kan mga tawong ini kan saindang ngoso, alagad harayo sako an saindang mga puso.

Mateo 4:10

Sinimbag siya ni Jesus, “Humale ka, Satanas! Huli ta nasusurat, ‘Sambahon mo an Kagurangnan mong Dios, asin siya sana an saimong paglingkodan.’”

Mateo 6:24

“Mayong makakapaglingkod sa duwang kagurangnan, huli ta ikakaongis niya an saro asin mamomotan an saro; magigin maimbod siya sa saro asin pag-oolog-ologon an saro. Dai kamo makakapaglingkod sa Dios asin sa kayamanan.

Lukas 4:8

Nagsimbag si Jesus, “Nasusurat, ‘Sambahon mo an Kagurangnan mong Dios asin siya sana an saimong paglingkodan!’”

Juan 4:24

An Dios Espiritu, kaya an mga nagsasamba saiya dapat na magsamba sa espiritu asin sa katotoohan.”

Deuteronomio 10:20

Matakot kamo sa Kagurangnan na saindong Dios asin siya sana an saindong pagsambahon. Magmaimbod kamo saiya asin magsumpa kamo sa saiya sanang ngaran.

Deuteronomio 13:4

Magsunod kamo sa Kagurangnan na saindong Dios asin matakot kamo saiya; kuyogon nindo siya asin otobon an saiyang mga pagboot; sambahon nindo siya asin magmaimbod kamo sa saiya.

Deuteronomio 4:29

Hihidawon nindo duman an Kagurangnan na saindong Dios, asin kun hahanapon nindo siya sa bilog nindong puso, makukua nindo siya.

Deuteronomio 6:13

Matakot kamo sa Kagurangnan na saindong Dios; maglingkod kamo saiya asin magsumpa kamo sa saiya sanang ngaran.

Josue 13:31

Napasainda an kabanga kan Gilead, siring man an Astarot saka Edrei, an duwang pangenot na syudad kan kahadean ni Og sa Basan. Ini gabos itinao sa kabanga kan mga pamilyang gikan ki Makir na aki ni Manases.

Josue 24:14

“Kaya ngunyan matakot kamo sa Kagurangnan,” an olay ni Josue. “Tunay asin maimbod nindo siyang paglingkodan. Halea nindo an mga dios-dios na dating sinasamba kan saindong mga ginikanan sa Mesopotamia saka sa Egipto; an Kagurangnan sana an saindong paglingkodan.

Josue 24:23

“Kun siring, halea nindo an dayuhan na mga dios na yaon saindo asin manumpa kamo na magigin maimbod kamo sa Kagurangnan, an Dios nin Israel,” an olay ni Josue sa mga tawo.

Hukom 10:16

Kaya hinarale ninda an saindang dayuhan na mga dios asin nagsamba sa Kagurangnan. Huli kaini, naherak giraray an Kagurangnan sa kamugtakan nin Israel.

Hukom 10:6

Nagkasala giraray sa Kagurangnan an mga Israelita. Nagsaramba sinda sa mga Baal asin sa mga Astarte, patin sa mga dios-dios kan Siria, Sidon, Moab, Ammon asin Filistia. Binayaan ninda an Kagurangnan asin dai na nagsamba saiya.

Hukom 2:11

Dangan nagkasala sa Kagurangnan an banwaan nin Israel asin nagpoon sindang magsamba sa mga Baal.

Hukom 2:13

Nag-ontok sinda sa pagsamba sa Kagurangnan asin naglingkod sa mga Baal sagkod sa mga Astarte.

1 Samuel 31:10

Ibinugtak ninda an mga armas ni Saul sa templo kan diosa nindang si Astarte, asin ipinako ninda an bangkay ni Saul sa kudal kan syudad nin Bet-san.