Zefaniya 1:14 - Livulu lya Shukulu Kalunga

¹⁴ Litangwa lije omo Shukulu Kalunga akasompa vanu lili muyehi-yehi, lilinakwija vwasi-vwasi! Litangwa lije likapwa lya vusiwa manene, nameme mashwalale vakusimpa vakalila nakutendeka cinyangavili cakutambula vukwasi!

Zefaniya 1:14 Iomraidhean Croise

Isaya 15:4

Vanu va ku Heshevone na ava va ku Eleale vakalila, co kulila kwavo vakaciziva kulyala ku Njahaze. Nameme mashwalale va Mowavi vakatambeka nakulila oku valijajela.

Isaya 33:7

Mashwalale vakusimpa valinakutambeka ngeci vavakwase. Miluwa vaje vashakele kunena kwoloka ololo valinakulila manene.

Isaya 66:6

Tolilileni muyoyo wakama uje uli mu nganda, na cililimo cije cili mu Njuvo ya Shukulu Kalunga, cinapu cililimo ca Shukulu Kalunga ahisa vitozi vendi!

Isaya 8:22

nakukenga lalo asi, oloni vyai vakamona, vakamona lika tuyando na lisusulungu, lisusulungu lyakuzivisa lyova muje muvakavombila.

Njelemiya 25:36

Tolilileni tunyungi muvali nakulila, vakulunu va tunyungi valinakulinyenga, omwo Shukulu Kalunga alinakunyongesa vulilo vwa vimuna vavo.

Njelemiya 30:7

Litangwa lyalikalu lilinakwija, kukwesi lalo litangwa lyeka lyakulifwa nalyo, ikapwa simbu yaikalu kuli vanu vange, oloni vakovoka.”

Njelemiya 46:5

Shukulu Kalunga alinakwihula ngwendi, “Vika vije vinjamono? Mashwalale vavo vanavafungulula, lyova linavakwata, co valinakutewa lumbisi manene, kuvasa kukenga kunima lalo.

Njelemiya 48:41

co vinganda na vimpaka vakavifungulula. A litangwa lije mashwalale va Mowavi vakalijajela ngwe munakazi ashaka kukita.

Ezekiyele 12:23

Ololo valeke vije yange Kalunga wa Akamwa ya Vyoshe, njilinakwendeka a vyuma evi. Yange njikamanesa cisimo cije. Co kuvakaciilukila-ilukila lalo mu Isalele embwe. Valeke ngwove, ‘Simbu inete, co vuka-kwimanena vukapwa vwa vushunga!’

Ezekiyele 30:3

Litangwa lili muyehi, omo Shukulu Kalunga akapanga, likapwa litangwa lya mashelwa nakunyonga kwa miyati.

Ezekiyele 7:12

Simbu ilinakwija. Litangwa lili muyehi, omo kulanda nakulandulula kuvikakala lalo na seo, omwo Njambi akanyanyamesa vanu voshe mu cifwa cimo.

Ezekiyele 7:16

Vamo vakatewela ku minkinda ngwe tutela vaje vanatewa mu vyana. Voshe vakaziva vusiwa omwo vuvi vwavo.

Njwele 1:15

Litangwa lya Shukulu Kalunga lili muyehi, litangwa lije omo Muka-nzili yoshe akanena kunyonga. Litangwa lije likapwa lyakujujwisa!

Njwele 2:1

Imbeni lupembo, co imbeni mwondo a Siyone, lilundu lya Njambi lyakujela. Jajeni, yeni vanu va mu Yunda! Litangwa lya Shukulu Kalunga lili muyehi.

Njwele 2:11

Shukulu Kalunga ashika mashwalale vendi na lijwi lyakama ngwe cililimo. Mashwalale vaje vamwononoka vapwa vavangi, co lalo vakala na nzili. Litangwa lya Shukulu Kalunga likapwa lya vukalu manene! Naumo wai akasa kuputumuka.

Njwele 2:31

Litangwa likazivala, na ngonde ikavenga ngengu ngwe maninga, omo litangwa lyakama lyakukomokesa lya Shukulu Kalunga kanda lyete.

Njwele 3:14

Vanu vavangi-vangi vali mu Cana Cakusompela, omwo litangwa lya Shukulu Kalunga lili muyehi.

Njwele 3:16

Shukulu Kalunga alinakwaana ngwe ndumba ku Munkinda wa Siyone, lijwi lyendi lilinakuluma ku Yelusalema, asi na lilu vilinakujaja. Oloni akaamena vanu vendi.

Amose 8:2

Shukulu Kalunga wanjihwile ngwendi, “Amose, vika unamono?” Co njamukumbulwile ngwange, “Njamono mutonga wa vushuka.” Co Shukulu Kalunga wendekele kuli yange ngwendi, “Kukotoka kwa vanu vange va Isalele kunete. Kunjikatengulula lalo viyongola vyange vyakuvanyanyamesa.

Zefaniya 1:10

“A litangwa lije mukaziva muyoyo wakulila ku Cikolo ca Visi ca Yelusalema. Mukaziva kutendeka kwakama mu mutambela wamucivali wa mu nganda na muyoyo wa vinjuvo vilundumuka akamwa ya malundu a Yelusalema.

Zefaniya 1:7

Litangwa lili muyehi omo Shukulu Kalunga akatumbama nakusompa vanu ngecivene, olokeni kuluu ku mesho endi. Shukulu Kalunga nalivwaesela cimweja kukombelela vanu vendi, nalanya vitozi mukupukula Yunda.

Malakiya 4:5

“Kengeni, njikamitumina Elinja muka-kwimanena simbu kanda litangwa lyakama lya Shukulu Kalunga lya vukalu lyete.

Vilinga vya Miluwa 2:20

litangwa likazivala, co ngonde ikavenga ngengu ngwe maninga, omo Litangwa lya Shukulu Kalunga lije lyakama lya vumpau kanda lyete.

Filipu 4:5

Mweseni kalemeso kuli vanu voshe. Mwene alinakwija ololo.

1 Tesalonika 4:16

Kukakala mutambi wa lijwi lyakama lyakushika, lijwi lya kangelo wakama, nakwoya kwa lupembo lwa Njambi, co Mwene ikeye vavenya akashuluka kutunda mwilu. Co vaje vatsile mukukulaela kuli Kilistu vakasangukila ku mwonyo akulivanga,

VaHevelu 12:26

Lijwi lyendi lyajajesele kaye a simbu ije, oloni ololo ikeye natukulaesa ngwendi, “Njikajajesa lalo asi, oloni kesi asi lika na lilu lalo.”

Yakomba 5:9

Kesi mulinyenge umo na mukwavo, vasamba vange, ngeci Njambi kesi akamisompe. Lyaako ali kuyehi, ololo vene asholoka.

2 Petulu 2:3

Co mu cipululu cavo, ava valongisi va makuli vakawana nganyo akumileka tusimilili. Omwo a simbu yakama ololo Lyaako wavo nalivwaesela cimweja, co Muka-kunyongesa wavo ali laja mu mesho!