Yowano 9:39 - Livulu lya Shukulu Kalunga

³⁹ Yesu wendekele ngwendi, “Omwo njinaija ano a kaye mukusompa, ngecivene, tupuputwa vase kumona, co vaje valinakumona vapwe tupuputwa.”

Yowano 9:39 Iomraidhean Croise

Isaya 29:10

Shukulu Kalunga namilalesa manene mu tulo. Vaka-kwimanena vakevo mesho a vanu, oloni Njambi nazivalesa mesho avo.

Isaya 44:18

Vanu va cifwa cangacije vapwa vilema manene, kuvazivuka vije valinakulinga. Vanashoko mesho avo na viyongola vyavo ku vyuma vya vushunga.

Isaya 6:9

Ngecivene, wanjilekele kuya nakuleka vanu lijwi eli, “Kuziva mukaziva, oloni kumukazivisisa. Yeni kumona mukamona, oloni kumukamonesesa.”

Ezekiyele 12:2

“Muna munu, yove uli akati ka vanu vaka-kutengulukila. Vali na mesho, oloni nacimo cai vamona, vali na matwi, oloni nacimo cai vaziva, omwo vapwa vanu vaka-kutengulukila.

Mateo 11:5

tupuputwa vatona, vilema venda, vaka-mbumba vajela, tusinda-matwi vaziva, vatsi vasanguka, tuutu vavambulwila Vin̄anda Vyavivwa.

Mateo 15:14

Veceleni, kesi mulinyenge ali vakevo! Vakevo vanapu vantwama va tupuputwa vatwamenena tupuputwa vakwavo. Co nga kapuputwa atwamenena kapuputwa mukwavo, voshe vavali vakawila mu mbulu.”

Mateo 6:23

Oloni nga mesho ove anapu akutsitsivala, muvila wove woshe uli mu lisusulungu. Ngecivene, nga ceke cili muli yove citenguluka kupwa lisusulungu, co lisusulungu muli yove likapwa lyakukomokesa manene.

Luka 1:79

ceke ca mwilu kutwila voshe vaje vanatumbama mu munzinze wa lisusulungu lya kutsa, nakutwamenena mendi etu mu ngila ya kwoloka.”

Luka 13:30

Oloni vaka-kulivanga vavangi vakapwa vaka-kukotokela, co vaka-kukotokela vavangi vakapwa vaka-kulivanga.”

Luka 2:34

Co Simyoni wavavezikisile wendekele kuli Maliya ngwendi, “Mwanike ou vamwangwile kuli Njambi mukunyongesa nakwamena vavangi mu Isalele. Akapwa cizivukiso cakutunda kuli Njambi cije vanu vavangi vakendeka nakucilwisa,

Luka 4:18

“Munzinzime wa Shukulu Kalunga ali muli yange, omwo nanjangula kwambulula Vin̄anda Vyavivwa kuli tuutu. Nanjitumu kwambulula kupatuka kuli vinzinda, nakutonesa tupuputwa ngeci vamone, nakupatula vaje vavalinakuyandesa,

Luka 7:21

A simbu ije vene Yesu wakangwisile vanu vavangi ku kuvinja kwavo, na ku mishongo yavo, na ku minzinzime yakujwala, co watonesele mesho a vanu vavangi.

Yowano 12:31

Ololo simbu yakusompa inaija kuli vaka-kaye, ololo muka-kushwana kano kaye vakamusheka.

Yowano 12:46

Yange njinaija ano a kaye kupwa ceke, ngeci woshe akulaela kuli yange kesi akale mu lisusulungu.

Yowano 3:17

Omwo Njambi katumine Munendi ano a kaye nakuhisa vaka-kaye embwe, oloni apwe Muyoyesi wavo.

Yowano 3:19

Co omu mukemwo mucikapanga cihiso, ceke cinaija ano a kaye, oloni vanu vazema lisusulungu kutuvakana ceke, omwo vilinga vyavo vyapwa vyavivi.

Yowano 8:12

Yesu wendekele lalo kuli vaFaliseo ngwendi, “Yange ceke ca vaka-kaye. Woshe anjikava akakala na ceke ca mwonyo, co kakende lalo mu lisusulungu.”

Yowano 8:15

Yeni mukasompo vyuma mu ngila ya vunu, yange kunjesi kusompa munu.

Yowano 9:25

Wakumbulwile ngwendi, “Kunjizivuka nga ikeye muka-vuvi nambe embwe. Cuma cimo lika cinjizivuka ngwange, nameme njapwile kapuputwa, co ololo njitona.”

Vilinga vya Miluwa 26:18

Ukatonesa mesho avo nakuvatundisa ku lisusulungu nakuvatwala ku ceke nakuvatundisa ku nzili ya Satana nakuvatwala kuli Njambi, ngeci akukulaela kwavo kuli yange vakavasambese ku vivi vyavo nakutambula mwela wavo akati ka vanu vaje vanaangula Njambi.’

2 Kolinte 2:16

Co kuli vaje vananyongo tunapu lwengo lwakutunda ku kutsa lutwala ku kutsa, oloni kuli vaje vanovoka, lunapu lwengo lwaluvwa lwakutwala ku mwonyo, ngecivene, iyajo muka-mana asa kuzivuka vipangi evi?

Efeso 5:14

omwo cuma coshe cije cisholoka cipwa ceke. Omu mukemwo vakendeka ngwavo, “Tona, yove walala, co induka ku kutsa, Kilistu akakutwila ceke.”

2 Tesalonika 2:10

co akapangesa miyati yoshe ya kupenga-penga ya makuli ali vaje vakanyonga. Vakevo vakanyonga omwo kuvatambwile nakuzema vushunga ngeci vovoke.

1 Petulu 2:9

Oloni yeni munapu muyati wakwangula, vaka-kukombelela va Mwene, muyati wakujela, vanu va Njambi vavenya, vanamyangula mukwambulula vikomokeso vya vilinga vya Njambi, uje wamisanene kumitundisa mu lisusulungu kuminena ku ceke cendi cakukomokesa.

1 Yowano 2:11

Oloni nga tuzinda vakwetu, tuli mu lisusulungu, tucili nakwendamo, co kutuzivuka oku tulinakuya, omwo lisusulungu linatupwisa tupuputwa.