Yowano 3:29 - Livulu lya Shukulu Kalunga

²⁹ Uje ali na shombolwa ikeye vavenya vulo, oloni musamba wa vavenya vulo, uje nemana nakumutolilila, avwaelela omo aziva lijwi lya vavenya vulo. Ngecivene, mukemwo mukunapu kuvwaelela kwange.

Yowano 3:29 Iomraidhean Croise

Myaso ya Solomoni 3:11

Yeni vanakazi va mu Siyone, ijeni mumone Mwene Solomoni. Mwene Solomoni nazala cilongo cije civamuzikile vaina ku mutwe wendi, a litangwa lya vulo vwendi, a litangwa lyakuvwaelela nakujolela kwendi.

Myaso ya Solomoni 5:1

Njinaija mu citungu cange, ndokazi yange, shombolwa yange. Njilinakukungulula miila na malimangango, njinali vuki vwange, na ngenga yange ya vuki, njinanu vinyu vyange na mavele ange. Vaka-cizemo, lyeni nakunwa noo munapwisamo na cizemo!

Isaya 54:5

Ishamatanga wove akapwa ngwe munalume wove, ikeye Shukulu Kalunga Muka-nzili yoshe, Njambi wakujela wa Isalele, ikeye muka-kushika a kaye koshe, co akakwamena.

Isaya 66:11

Mukavwaelela akuvezika kwayo, ngwe mwanike avwaelela ku mavele a vaina.

Njelemiya 2:2

“Ya ku Yelusalema ukambulwile vanu voshe, ngwove Shukulu Kalunga nendeka ngwendi, ‘Njanuka kulongwa kwove omo wapwile u mwanike, na cizemo cove omo njakwambatele, na muje wanjikavele mu mambo, mukati ka lifuti lije kuvalimine.

Ezekiyele 16:8

“Co omo njetile kuli yove lalo, njamwene ngeci simbu yove inete yakukala na cizemo. Njakufwikile na kazaku kange, co njakulaesele kukuzema. Eyo, njalikumiiye nove cikumiiyo ca vulo, co yove wapwile u wange.” Evi vikevyo vyanendeka Shukulu Kalunga wa Akamwa ya Vyoshe.

Hoziya 2:19

Isalele, njikakupwisa u munakazi wange, njikapwa wa vushunga na kulongwa, co njikakumwesa cizemo cije kucesi kutenguluka na mema ku mbunge nakukupwisa u wange ku myaka yoshe.

Mateo 22:2

“Vumwene vwa mwilu vunalifu ngwe mwene walingile ciwano ca vulo vwa munendi wa munalume.

Mateo 25:1

“Asinoni Vumwene vwa mwilu vukafwa ngwe vambanda likumi, vaje vambatele mazi mu vindeya vyavo vaile nakushesha vavenya vulo.

Mateo 9:15

Yesu wavakumbulwile ngwendi, “Kuma yeni mukengelela vangenzi ku ciwano ca vulo ngeci vaye na njala ndi? Mwa vushunga vene embwe! Omo vavenya vulo acili navo kuvapandele kulinga ngacije. Oloni litangwa likaija omo vakatundisa vavenya vulo akati kavo, asinoni vakalikela kulya.

Luka 15:6

nakumutwala kwimbo. Co asana vasamba vendi na vandambo vendi amo avaleka ngwendi, ‘Njinavwaelela akuwana manga yange uje wazimbalele. Tujoleleni!’

Yowano 15:11

“Njamileka vyuma evi ngeci kuvwaelela kwange kukale muli yeni, co kuvwaelela kweni kupwe kwamutunu.

Yowano 16:24

Tunde aje nakweta ku lelo kanda mulombe cuma cimo mu lizina lyange, lombeni, co mukatambula, ngeci kuvwaelela kweni kukapwemo.

Yowano 17:13

Oloni ololo njilinakwija kuli yove, co njilinakwendeka vyuma evi ano a kaye ngeci kuvwaelela kwange kukale mu vimbunge vyavo.

Yowano 3:30

Ikeye napande kupwa wakama, oloni yange njipande kupwa wamundondo.”

2 Kolinte 11:2

Njili na lifuwa ali yeni ngwe lije lyakala nalyo Njambi, omwo munapu ngwe mumbanda uje kanda alimone na munalume uje njinakulaesa kumushombwesa kuli munalume umolika, ikeye Kilistu.

Filipu 2:2

Ngecivene, njimilambelela munjivwaelelese akukala na viyongola vimo nakulipangela cizemo cimo, nakupwa cuma cimo mu mwonyo na mu mana.

1 Yowano 1:4

Tulinakusoneka evi ngeci kujolela kwetu kukapwe kwamutunu.

2 Yowano 1:12

Njili na vyavingi vyakumileka, oloni kunjasa kuvisoneka a lipapelo na tinta, oloni njili na cinyangavili cakwija kuli yeni nakusimutwiya neni mesho na mesho, ngeci kuvwaelela kwetu kukapwe kwamutunu.

Kujombolola 21:9

Co kangelo umo wa vaje vatanu na vavali vaje vakele na malonga atanu na avali akushula na tuyando tutanu na tuvali twakumanesela wezile kuli yange wendekele ngwendi, “Ija kuno, co njikakumwesa Shombolwa, munakazi wa Muna Manga.”