VaLevi 4:20 - Livulu lya Shukulu Kalunga

²⁰ co akalinge cuma cimo na ngombe wa nkomba ngwe mwalingile na ngombe wa nkomba uje wa mulambu wa a vuvi. Mu ngila eyi muka-kukombelela akavaambesa ku vuvi vwavo, co vakavasambesa.

VaLevi 4:20 Iomraidhean Croise

Kutuuka 32:30

Co alikaki Mosesa wendekele kuli vanu ngwendi, “Munalingi vuvi vwakukomokesa manene. Oloni ololo njilinakulamata lalo ku munkinda kuli Shukulu Kalunga, amo njikasa kuwanako kwambesa vuvi vweni.”

Ndanyele 9:24

“Visimbu vitanu na vivali vya myaka makumi atanu na avali inapu simbu yanemika Njambi yakupatula vanu vove na nganda yove yakujela ku vuvi na ku kupenga-penga. Ngecivene, vuvi vakavusambesa, co vushunga vukakala ku myaka yoshe, co cimona na vuka-kwimanena vikapwa vya vushunga, na Njuvo ya Shukulu Kalunga yakujela vakayikundika lalo.

VaLevi 1:4

Co akakambeke livoko lyendi a mutwe wa uje cimuna ngeci vakamutambule kupwa n̄ombelo ya kumwambesa ku vuvi vwendi.

VaLevi 12:8

“Nga munakazi kasa kunena muna manga, co akanene mayembe vavali nambe tutela vavali, umo apwe wa n̄ombelo ya kwenyeka mukwavo apwe wa n̄ombelo ya a vuvi, co muka-kukombelela akamwambesa kumutundisa vulikazi vwendi, co ikeye akajela.”

VaLevi 14:18

Co akaake aje mazi oshe anasala mu mbanda ya livoko lyendi a mutwe wa uje munu ivakajelesa. Co mu ngila eyi muka-kukombelela akamwambesa ku mesho a Shukulu Kalunga.

VaLevi 15:15

Co muka-kukombelela akakombelelao kazila umo kupwa n̄ombelo ya a vuvi, na kazila mukwavo kupwa n̄ombelo ya kwenyeka. Mu ngila eyi muka-kukombelela akajelesa uje munu ku mesho a Shukulu Kalunga.

VaLevi 19:22

Co muka-kukombelela akajelesa uje munalume ku mesho a Shukulu Kalunga a vuvi vuje vwalingile. Co Njambi akamusambesavwo.

VaLevi 4:21

Asinoni akatwale uje ngombe wa nkomba anja ya cilombo nakumwenyeka, ngwe mwanenyekele uje ngombe wa nkomba yakombelelele a vuvi vwendi vavenya. Ou ukewo mulambu wakutundisa vuvi vwa mbunga.

VaLevi 4:26

Asinoni akenyekele mazi oshe a cimuna a mutula, ngwe mwakenyeka mazi a vimuna vakutsiila a milambu ya kulitombola. Co mu ngila eyi muka-kukombelela akaambesa uje ntwama ku vuvi vwendi, co vakamusambesa.

VaLevi 4:35

Asinoni akatundise mazi oshe a cimuna, ngwe muje akatundisa mazi a vimanga vakutsiila a milambu ya kulitombola, co akawenyekele a mutula akamwa ya milambu ya vyakulya vyakulambula kuli Shukulu Kalunga. Mu ngila eyi muka-kukombelela akaambesa uje munu ku vuvi vwendi, co vakamusambesa.

VaLevi 4:8

Co a ngombe wa nkomba uje akatundiseo mazi oshe, na mazi a vya mwimo,

VaLevi 5:10

Asinoni akalambule kazila wamucivali kupwa mulambu wa kwenyeka, ngwe ku mashiko. Co mu ngila eyi muka-kukombelela akaambesa uje munu ku vuvi vwendi, co vakamusambesa.

VaLevi 5:13

Co mu ngila eyi muka-kukombelela akaambesa uje munu ku vuvi vwendi, co vakamusambesa. Vuje vunga vunasalao vukapwa vwa muka-kukombelela, ngwe mulambu wa vimbuto vya vinona.”

VaLevi 5:16

Co ikeye napande kwingisamo vyuma vije vyanavulumwine vyakujela, nakwakelako litambelo makumi avali. Ikeye akavyane kuli muka-kukombelela, co muka-kukombelela akakombelela cimuna uje wa a vuvi vwa uje munu mukumwambesa, co vakamusambesa.

VaLevi 5:18

Napande kunena lijamba lya manga nambe membe wakujeneka kapenga kuli muka-kukombelela kupwa mulambu wa kuliilwisila. Co ndando ya uje cimuna inapande kupwa ngwe ndando ije vemika ya mulambu wa kuliilwisila. Muka-kukombelela akakombelele n̄ombelo mukumwambesa ku vuvi vuje vwalingile kujeneka kuzivuka, co vakamusambesa.

VaLevi 5:6

napande kunena mulambu wa mulonga wendi kuli Shukulu Kalunga, manga nambe membe wa lwavo ngeci upwe mulambu wa a vuvi. Co muka-kukombelela akamwambesa ku vuvi vwendi.

VaLevi 6:7

Muka-kukombelela akaambesa uje munu ku mesho a Shukulu Kalunga, co vakamusambesa.”

Kulava 15:25

Co muka-kukombelela akaambesa mbunga ya vanu va Isalele nakuvasambesa omwo mulonga unapwile wa ku nzimba, co vakevo vanatwala n̄ombelo yavo ya a vuvi ngwe n̄ombelo ya vyakulya kuli Shukulu Kalunga omwo nzimba yavo.

Kulava 15:28

Co kuje ku mutula muka-kukombelela akajelesa uje munu navulumuna mulonga wa ku nzimba, co vakamusambesa.

Loma 5:11

Oloni kesi evi lika embwe, tujolela omwo a vije vyanalingi Njambi ali Mwene yetu Yesu Kilistu, uje ololo natupwisa vasamba va Njambi.

Ngalatiya 3:13

Oloni omwo Kilistu vamupwisile cisingo omwo watupatwile ku cisingo cije majwi a Lishiko acinenele, omwo visoneka vyendeka ngwavyo, “Munu woshe uje vashukika a muti ali mwisi ya cisingo ca Njambi.”

VaHevelu 1:3

Ikeye kutwa kwa ceke ca vumpau vwa Njambi, ikeye vene cifwa ca Njambi vavenya, akukolesa vyoshe mu kaye koshe na lijwi lyendi lya nzili. Omo nashokolola laja ngila ngeci vivi vya vanu voshe vavisambese, co watumbamene mwilu ku livoko lya cilyo lya Njambi, Muka-nzili yoshe.

VaHevelu 2:17

Ngecivene, camupandele mu vyoshe alipwise mumolika na vakwavo, ngeci apwe Muka-kukombelela Wakama wa kulongwa na kutetela mu vipangi vyendi ku mesho a Njambi, ngecivene, vuvi vwa vanu vakavusambese.

VaHevelu 9:14

Omwo eci capwa ca vushunga, maninga a Kilistu anapanga manene! Ali Munzinzime wa myaka yoshe walyanene ikeye vavenya kupwa n̄ombelo yakujela kuli Njambi. Maninga endi anatujelesa ku citaku-taku ca futisi yetu yangoco ngeci tupangele Njambi wakuyoya.

1 Yowano 1:7

Oloni nga tuyoya mu ceke, ngwe ikeye ali mu ceke, asinoni tulitombola umo na mukwavo, co maninga a Yesu, munendi, atujelesa ku vuvi vwoshe.

1 Yowano 2:2

Co Kilistu ikeye vavenya napu n̄ombelo ya vivi vyetu ngeci vavisambese, co kesi vivi vyetu lika embwe, oloni na vivi vya vanu voshe lalo.

Kujombolola 1:5

na kuli Yesu Kilistu, mukaleo wa vushunga, mushoke wakulivanga kusanguka ku kutsa, co uje lalo muka-kushwana vimyene va ano a kaye. Watuzema, co a n̄ombelo ya kutsa kwendi natupatula ku vivi vyetu,