VaHevelu 8:9 - Livulu lya Shukulu Kalunga

⁹ Co kunjikalingi lalo cikumiiyo ngwe muje njalingile kuli vakukulwila vavo a litangwa lije njavatundisile mu lifuti lya Ingito nakuvatwamenena na livoko lyange. Kuvapwile vaka-kulongwa ku cikumiiyo cije njalingile navo, ngeci kunjakeleko mbunge kuli vakevo lalo.

VaHevelu 8:9 Iomraidhean Croise

Kushangumuka 19:16

Akulivanga Lote wemanene lika nevi vyalinga vyai, oloni Shukulu Kalunga washakele kumwovola. Ngecivene, vaje vanalume vavali vakwatele Lote, na munakazi wendi, na vana vendi vavali ku mavoko nakuvatuwisa anja ya nganda.

Yombi 8:20

“Kenga, Njambi kakavyana muka- mulonga, co ikeye kakakwasa vanu vaka-vuvi.

Myaso 105:43

Ngecivene, Njambi watuwisile vanu vendi vakwangula mu Ingito, co vembile nakulisamba nakujolela.

Myaso 77:20

Watwamenenene vanu vove ngwe kanyungi, waangwile Mosesa na Alone kupwa vantwama vavo.

Myaso 78:57

Oloni vapwile vaka-kujeneka kulongwa nakujeneka kukulaela ngwe vakukulwila vavo, kuvapwile va vushunga, vapwile ngwe mukili wa kupenga-penga.

Kutuuka 32:8

Lajoko vanaseza ngila ije njavashikile kuyikava, vakevo vanamungu ngolinde kuyipwisa muna ngombe wa nkomba, co ikeye valinakulemesa nakukombelelako vin̄ombelo. Co valinakwendeka ngwavo ikeye njambi yavo, uje wavatwamenenene nakuvatundisa mu Ingito.

Kutuuka 34:10

Co Shukulu Kalunga wendekele kuli Mosesa ngwendi, “Kenga, ololo njilinakulikumiiya cikumiiyo na vanu va Isalele. Njikalinga vikomokeso vije kanda njivilinge akati ka miyati yoshe ano asi. Vanu voshe vakamona vyuma vyakujujwisa, vije vinjikalinga yange Kalunga, omwo njikalinga cuma cakumikomokesa manene.

Myaso ya Solomoni 8:5

Iyajo ou alinakwija kutunda mu mambo, najendamena ali muka-cizemo cendi? Mwisi ya muti wa apulu njakwindwile, mu mutambela uje muwasemukilile.

Isaya 40:11

Akanyunga vutanga vwendi mwamuvwa ngwe kanyungi, akakungulwila amolika vana va vimanga, nakuvambata mu mavoko endi, co akatwamenena vainavo kamandondo-kamandondo.

Isaya 41:13

Yange Kalunga Njambi yeni, njikamikolesa nakumileka ngwange, ‘Kesi muzive lyova, njikamikwasa.’ ”

Isaya 51:18

Kukwesi akamitwamenena lalo wai, naumo wai akati ka vanu vove akakukwata ku livoko.

Isaya 63:9

ku tuyando twavo twoshe. Kesi kangelo embwe, oloni Shukulu Kalunga vavenya wavamenene. Mu cizemo cendi na mukutetela kwendi ngeci wavapatwile. Simbu ya kunima wakele nakuvanyunga,

Njelemiya 31:32

Cikeco kucikapu ngwe cikumiiyo cije calaja cinjalikumiiye na vakukulwila vavo, omo njavambatele na livoko lyange kuvatundisa mu Ingito. Nameme njapwile nji munalume wavo, oloni kuvanyungile cikumiiyo cije.

Mbimbi 4:16

Shukulu Kalunga kombileko mbunge lalo kuli vakevo, ikeye vavenya wavashandwele. Kasingimikile nameme vaka-kukombelela vetu, nambe vantwama vetu.

Ezekiyele 16:59

Shukulu Kalunga wa Akamwa ya Vyoshe alinakwendeka ngwendi, “Yange njikakupangesa ngwe mu ngila ije inakupande, omwo kuwombile mbunge ku vikulaeso vyove, co wapokwele cikumiiyo.

Ezekiyele 16:8

“Co omo njetile kuli yove lalo, njamwene ngeci simbu yove inete yakukala na cizemo. Njakufwikile na kazaku kange, co njakulaesele kukuzema. Eyo, njalikumiiye nove cikumiiyo ca vulo, co yove wapwile u wange.” Evi vikevyo vyanendeka Shukulu Kalunga wa Akamwa ya Vyoshe.

Amose 5:22

Nameme munjikombelela vin̄ombelo vyeni vya kwenyeka, na milambu ya vimbuto vya vinona, kunjikavitambula, nambe mukombelela vin̄ombelo vya kulitombola vya vimuna veni vakununa, kunjikavitambula.

Malakiya 2:13

Cuma cikwavo lalo cimukalingi eci. Mujulisa mutula wa Shukulu Kalunga na misozi, kulila nakumbolozoka omwo kesi nakutambula vin̄ombelo vije mulinakumunenela.

Mako 8:23

Co Yesu wakwatele uje munalume wa kapuputwa a livoko, co wamutwalele anja ya limbo. Co wamujekwilile mate ku mesho endi, co Yesu waakele mavoko endi ali ikeye, wamwihwile ngwendi, “Wasa kumona cuma cimo ndi?”

Vilinga vya Miluwa 13:11

Co livoko lya Mwene likashuluka ali yove ololo vene, co ukapwa kapuputwa kuukasa kumona ceke ca litangwa a simbu imo.” Aje vene Elyamase wazivile mbundu yakuzivala ifwika ku mesho endi, co wendanganene noku-noku kweseka kuwana umo ngeci amukwate ku livoko nakumutwamenena.

Vilinga vya Miluwa 7:36

Ikeye watundisile vanu mu Ingito, co walingile vizivukiso na vikomokeso mu Ingito na ku Lishali Lyakuvenga na mu mambo lalo a myaka makumi awana.

Vilinga vya Miluwa 9:8

Ngecivene, Saulu wakatukile asi watonene mu mesho, oloni kasele kumona cuma. Ngecivene, vamukwatele ku livoko nakumutwala ku Ndamasiku.

Ngalatiya 4:24

Vyuma evi twasa kuvizivuka ngwe cisimo, vanakazi vavali vanemanena mazivasano avali. Uje wakele na mwana ivakitilile mu vundungo ikeye Hangale, co nemanena lizivasano lije livalingile ku Munkinda wa Sinai.

Kwituluka mu Mashiko 29:1

Awa akewo majwi a cikumiiyo cije cashikile Shukulu Kalunga Mosesa kulinga na vana va Isalele mu lifuti lya Mowavi, mukuwezelela ku cikumiiyo cije calikumiiye Shukulu Kalunga na vakevo a Munkinda wa Sinai.

Kwituluka mu Mashiko 29:12

Munemana kuno ku litangwa lya lelo mukulikumiiya cikumiiyo na Shukulu Kalunga Njambi yeni, cikumiiyo cije cakusatesa na cisingo,

Kwituluka mu Mashiko 29:25

Co vakakumbulula ngwavo, ‘Omwo vanu va Shukulu Kalunga kuvanyungile cikumiiyo, cije Shukulu Kalunga Njambi ya vakukulwila vavo, walikumiiye navo omo wavatundisile mu Ingito.