VaHevelu 2:14 - Livulu lya Shukulu Kalunga

¹⁴ Ngecivene, omo vana vanatambula ku situ na maninga, Yesu nendi lalo walipwisile ngwe vakevo watambwile cisemwa cavo ca vunu vwa ano asi. Ikeye walingile eci ngeci a kutsa anyongese uje wakele na nzili ya kutsa, ikeye vene Liyavola.

VaHevelu 2:14 Iomraidhean Croise

Kushangumuka 3:15

Njikaka vutozi akati kove na munakazi, na akati ka mbuto yendi na mbuto yove. Co mbuto yendi ikasanyozola mutwe wove, co yove lalo ukamushuma ku linsinsinye lyendi.”

Isaya 25:8

Shukulu Kalunga wa Akamwa ya Vyoshe akanyongesa nzili ya kutsa nakusikumuna misozi ku mesho a munu na munu, co vanu vendi kuvakazivi shwamwa kwoshe-ikwoshe muno mu kaye mwoshe. Shukulu Kalunga vavenya nendekamo.

Isaya 53:12

Ngecivene, njikamwana mutambela wa kasingimiko, akati ka vanu va vulemu na nzili. Watavele kwana mwonyo wendi nakumulavela amo mu luvinda lwa vaka-vuvi. Vanu vamuyongwele ngwavo muka-vuvi, oloni wayandele omwo vuvi vwavo, co walombelele kuli Njambi ngeci Njambi avasambese.”

Isaya 7:14

Ngecivene, Shukulu Kalunga ikeye vavenya akamyana cimweso, kengeni mumbanda uje kanda alimone na munalume akakala na limo, co akakita mwana wa munalume, vakamuluka lizina lyendi ‘Manuwele.’

Hoziya 13:14

Kunjikasa kwamena vanu ava kutunda ku vukalo vwa vatsi, nameme kuvovola ku nzili ya kutsa. Yove kutsa, nena mishongo yove, yove vukalo vwa vatsi, nena kunyongesa kwove. Kunjikazivila vanu ava mema ku mbunge.

Mateo 16:17

Co Yesu wamukumbulwile ngwendi, “Unavezika ove Simoni muna Yona! Omwo vanu kuvacijombolwele kuli yove, oloni kuvanga Tate uje ali mwilu.

Mateo 25:41

“Asinoni akendeka lalo kuli vaje vali ku livoko lyendi lyacimwoshwe ngwendi, ‘Tundeni kuli yange, yeni vaka-cisingo! Yeni mu tuhya tuje tuvavwaeselele Satana na tungelo twendi!

Yowano 1:14

Co Lijwi lyemukile munu, lyashulile na kutetela navushunga, co lyakele akati ketu. Twamwene vumpau vwendi, vumpau vuje vwaatambwile akupwa mwana umolika wa Ishe.

Yowano 12:24

Mwa vushunga njimileka ngwange, kuvanga nona ya tiliku iwile mu livu na kutsa. Nga itsa, asinoni ima vinona vyavingi.

Loma 14:9

Omwo Kilistu watsile, co wasangukile mukupwa Mwene wa vaka-kuyoya na vatsi.

Loma 8:3

Omwo cije Lishiko kucasele kulinga, omwo vusitu vwapwile vwakuzeya, Njambi wacilingile. Wahisile vuvi mu vusitu akutuma Munendi, uje wezile mu cifwa ngwe cifwa cetu ca vusitu, mukutundisa vuvi.

1 Kolinte 1:28

Ikeye waangwile vije vivashawile vaka-kaye nakuviyeluwisa nakuviyongola ngeci vinapu vyangoco, ngeci anyongese vije vivayongola vaka-kaye ngwavo vinapu vya vulemu.

1 Kolinte 15:50

Eci njilumbununa, vavusamba vange, cikeco eci ngwange cije cinatundu ku situ na maninga kucasa kukovela mu Vumwene vwa Njambi, co cije cakuvola kucasa kuswana cije cakujeneka kuvola.

Ngalatiya 4:4

Oloni omo simbu yaivwa yetele, Njambi watumine Munendi, wakusemuka ku munakazi, wakusemuka ku majwi a Lishiko,

Kolose 2:15

Co a cilindakano cije Kilistu walipatwile ikeye vavenya kutunda ku nzili ya minzinzime ije ilinakushwana na moko ya vaka-kushika, walingile eci mutanya mwelu kuli vakevo akuvatwamenena ngwe vinzinda mukuhyana kwendi.

1 Timateo 3:16

Naumo wai asa kuvyana a vukama vwa cisin̄iko ca vu Njambi vwetu! Uje washolokele mu cifwa ca vunu, Munzinzime wamusholwele kupwa wa vushunga, na tungelo vamumwene. Vamwambulwile akati ka miyati, vamukulaelele mu kaye mwoshe, co vamutwalele mwilu.

2 Timateo 1:10

oloni ololo vanacisholola kuli yetu akwija kwa Muyoyesi wetu, Kilistu Yesu. Ikeye namanesa nzili ya kutsa, co a muzimbu nasholola mwonyo uje kuwesi kutsa.

VaHevelu 10:10

Omwo Yesu Kilistu walingile vije vyashakele Njambi ngeci avilinge, yetu voshe tunajele ku vuvi a n̄ombelo ije yalingile ya muvila wendi vavenya, wailingile lumo lika.

VaHevelu 10:5

A cuma eci, omo Kilistu wezile a kaye, wendekele kuli Njambi ngwendi, “Yove kuushaka vin̄ombelo na milambu ya tusitu, oloni unanjivwaesela muvila.

VaHevelu 2:17

Ngecivene, camupandele mu vyoshe alipwise mumolika na vakwavo, ngeci apwe Muka-kukombelela Wakama wa kulongwa na kutetela mu vipangi vyendi ku mesho a Njambi, ngecivene, vuvi vwa vanu vakavusambese.

VaHevelu 2:18

Omwo wayandele, co wamwene vyeseko, ikeye lalo asa kukwasa vaje valinakumona vyeseko.

VaHevelu 4:15

Omwo kutwesi na Muka-kukombelela Wakama uje kasa kututetela kukuzeya kwetu, oloni a cuma eci vene, tuli na Muka-kukombelela Wakama uje ivesekele mu vingila vyoshe ngwe yetu lalo, oloni kalingile vuvi.

VaHevelu 9:15

Omwo cuma eci Kilistu ikeye navwaesa cikumiiyo caliha, ngeci vaje vanasana Njambi vakatambule vivezikiso vya myaka yoshe vije vyanavakulaesa Njambi. Eci casa kulingiwa omwo a kutsa kuje vemikile kwakupatula vanu vatunde ku kupenga-penga kuje valingile omo vakele mu cikumiiyo cakulivanga.

1 Petulu 1:20

Njambi wamwangwile simbu kanda vatange kaye, co vamusholwele mu matangwa ano akukotoka omwo yeni.

Kujombolola 1:18

Yange muka-kuyoya! Njatsile, oloni kenga, njilinakuyoya ku myaka yoshe. Njili na moko yakutuvakana kutsa na vukalo vwa vatsi.

Kujombolola 12:9

Co uje canza-ngombe wakama vamumbilile asi, uje linyoka wa ku san̄ulu vatumbula ngwavo Liyavola, uje wakwisile kaye koshe. Vamumbilile asi amo na tungelo twendi voshe.

Kujombolola 2:10

Kesi ulishoshomwene a n̄avava ije ukamona. Tolilila! Liyavola akamyaka mu ceseko mukwaka vamo veni mu kamenga, co tuyando tweni tukapwa twa matangwa likumi. Ngecivene, pwa muka-kulongwa kuli yange noo kutsa, co njikakwana cilongo ca mwonyo.

Kujombolola 20:2

Co wakwatele canza-ngombe, linyoka wa ku san̄ulu, ikeye Liyavola nambe Satana, co wamukutile malyenge myaka 1,000.