Tito 2:13 - Livulu lya Shukulu Kalunga

¹³ ngwe omo tulinakutumbamena Litangwa lyakuvezika lya cinyangavili cetu, omo vumpau vwa Njambi yetu wakama na Muyoyesi Yesu Kilistu vukasholoka.

Tito 2:13 Iomraidhean Croise

Isaya 25:9

A litangwa lije vanu vakendeka ngwavo, “Mwa vushunga ou wapwa Njambi yetu! Twakulaela muli ikeye, co natwovola. Ou ikeye Shukulu Kalunga! Twakulaela muli ikeye, tujoleleni nakuvwaelela omwo ikeye natwovola.”

Mateo 16:27

Omwo Muna Munu akaija mu vumpau vwa Ishe amo na tungelo twendi, co asinoni akana kuli munu na munu fweto yendi kupwisa ngwe ku vipangi vyendi.

Mateo 25:31

“Omo Muna Munu akaija mu vumpau vwendi amo na tungelo twendi voshe, akatumbama a litanda lyendi lya vumwene.

Mateo 26:64

Yesu wamukumbulwile ngwendi, “Muunendeka mukemwo vene. Oloni njimileka muvavoshe ngwange, tunde a simbu ino mukamona Muna Munu natumbama ku livoko lya cilyo lya Muka-nzili yoshe, alinakwija a mashelwa!”

Mako 14:62

Co Yesu wamukumbulwile ngwendi, “Yange vene, co yeni voshe mukamona Muna Munu natumbama ku livoko lya cilyo lya Muka-nzili yoshe, co alinakwija a mashelwa!”

Mako 8:38

Nga munu akanjizivila shwamwa na vilongesa vyange akati ka cisemwa eci ca vupangala na vuvi, asinoni Muna Munu lalo nendi akamuzivila shwamwa omo akaija mu vumpau vwa Ishe amo na tungelo vakujela.”

Vilinga vya Miluwa 24:15

Njili na cinyangavili muli Njambi ngeci vakevo valinavyo vyuma evi, vikevyo evi, vanu voshe vavavwa na ava vavavi vakasanguka ku vatsi.

Loma 15:13

Co Njambi, nsina ya cinyangavili, amishulise nakuvwaelela kwoshe na kwoloka omwo akukulaela kweni, ngeci cinyangavili ceni cikole mu nzili ya Munzinzime Wakujela.

Loma 5:5

Co cinyangavili eci kucasa kutuzivisa shwamwa, omwo Njambi netila cizemo cendi mu vimbunge vyetu ali Munzinzime Wakujela, ikeye napu vwana vwa Njambi kuli yetu.

Loma 8:18

Yange njinayongola ngwange tuyando otu tulinakuyanda simbu ino kutwasa kutuseteka na vumpau vuje vukasholoka kuli yetu.

1 Kolinte 1:7

ngecivene, kumwonwene kutambula civezikiso cimo, omo mulinakuvandamena kusholoka kwa Mwene yetu Yesu Kilistu.

2 Kolinte 4:4

Vakevo kuvasa kukulaela omwo njambi uje wa vuvi wa kano kaye nazivalesa mana a vaka-kujeneka kukulaela ngeci kesi vamone mutanya uje wa Vin̄anda Vyavivwa vya vumpau vwa Kilisitu, uje vene wafwa cifwa ca Njambi.

2 Kolinte 4:6

Njambi uje wendekele ngwendi, “Mu lisusulungu mukatwa ceke!” Ikeye Njambi uje vene umolika watwisile ceke mu vimbunge vyetu, mukututwisila ceke ca vumpau vwa Njambi vuje vunatu mu cihanga ca Kilistu.

Kolose 1:23

Ngecivene, munapande kutwalao mukukulaela nakwimana mbe a luvula lwaluvwa, co kesi mutave ngeci vamishwenyese kutunda ku cinyangavili cije mwatambwile omo mwazivile muzimbu. Omwo a muzimbu ou ngeci yange Paulu, njapwile ngamba, muzimbu ou valinakwambulwila kuli munu na munu mu kaye mwoshe.

Kolose 1:27

Vutumbe vwa Njambi vunapu kusholola cisin̄iko eci kuli vanu vendi. Cisin̄iko cije cinapu vufuko na vumpau canavwaesela vanu voshe. Co cisin̄iko cikeco eci, Kilistu ali muli yeni, kulumbunuka ngeci yeni mukalipangele vumpau vwa Njambi.

Kolose 1:5

Omwo lijwi lya vushunga, likelyo Vin̄anda Vyavivwa, lyezile kuli yeni akulivanga, mwazivile a cinyangavili cije lyanene. Ngecivene, kukulaela kweni na cizemo ceni vili a vije munakengelela, vije vanamitulikila mwilu.

Kolose 3:4

Co mwonyo weni mwa vushunga unapu Kilistu, co omo ikeye akasholola, asinoni neni lalo mukasholoka amo nendi mu vumpau!

2 Tesalonika 2:16

Mwene yetu Yesu kilistu vavenya, na Njambi Tatetu, uje watuzemene na mu kutetela kwendi watwanene kutakama kuje kukwesi kutenguluka na cinyangavili cakukola,

2 Tesalonika 2:8

Asinoni uje Muka-vuvi akasholoka, oloni omo Mwene Yesu akaija, akamutsiya na muku wakutunda mu kanwa kendi nakumunyongesa na vumpau vwendi.

1 Timateo 1:1

Mukanda wakutunda kuli yange Paulu muluwa wa Kilistu Yesu ku lishiko lya Njambi Muyoyesi wetu na Kilistu Yesu ikeye cinyangavili cetu.

2 Timateo 1:2

Kuli Timateo, munange injazema. Njambi Tate na Kilistu Yesu Mwene yetu vakwane kutetele na mema ku mbunge na kwoloka.

2 Timateo 4:1

Ku mesho a Njambi na Kilistu Yesu, uje akasompa vaka-kuyoya na vatsi, co omwo alinakwija mukushwana kupwa Mwene, njikushika ngwange

2 Timateo 4:8

Co ololo cilongo ca vushunga cinanjitumbamena, cije Mwene, ikeye lyaako wa vushunga, akanjanaco a Litangwa lije, co kesi kuli yange lika embwe, oloni akacana lalo kuli voshe vaje vamuvandamena na cizemo ngeci asholoke.

Tito 1:2

vuje vunemana a cinyangavili ca mwonyo uje wa myaka yoshe. Njambi uje kesi kukwisa, watukulaesele mwonyo ou simbu kanda vatange kaye,

Tito 1:4

Njilinakusonekela kuli Tito, munange wa vushunga mukukulaela kuje tulinakwo yetu voshe. Njambi Tatetu na Kilistu Yesu Muyoyesi wetu vakwane kutetela na kwoloka.

Tito 3:4

Oloni omo ngozi na cizemo ca Njambi Muyoyesi wetu vyasholokele,

VaHevelu 9:28

Mu cifwa eci vene, Kilistu lalo walyanene mukulikombelela lumo mukutundisa vivi vya vavangi. Akajomboloka simbu yamucivali, kesi lalo akendeka a vuvi embwe, oloni mukwovola vaje vanamuvandamena.

1 Petulu 1:3

Tukandeleleni kuli Njambi na Ishe ya Mwene yetu Yesu Kilistu! Omwo a mema ku mbunge endi akama manene, natwana mwonyo wauha akusangula Yesu Kilistu ku vatsi. Eci cikeco citushulisa na cinyangavili cakuyoya,

1 Petulu 1:7

Vutumbe vwa vyeseko evi vunapu kumwesa vukaleo ngeci kukulaela kweni kunapu kwa vushunga. Nambe ngolinde yasa kunyonga, vakayeseka na tuhya, kukulaela kweni lalo kuje kuli na seo yakama manene kutuvakana ngolinde, vanapande kuceseka ngeci kukakateye. Asinoni mukatambula cishangala na vumpau na kasingimiko a Litangwa lije omo Yesu Kilistu akasholoka.

2 Petulu 1:1

Mukanda wakutunda kuli yange Simoni Petulu, ngamba na muluwa wa Yesu Kilistu. Njilinakusoneka kuli vaje, a vushunga vwa Njambi yetu na Muyoyesi wetu Yesu Kilistu vanavana kukulaela kwa seo yakama manene ngwe yetu vene.

2 Petulu 3:18

Oloni kakateyeni nakukola mu kutetela na mu mana vya Mwene yetu na Muyoyesi wetu Yesu Kilistu. Kuli ikeye kukale vumpau, ololo na ku myaka yoshe! Ewa.

1 Yowano 4:14

Co tunamono nakuleka veka ngwetu Tate natumu Munendi kupwa Muyoyesi wa vaka-kaye.

Yunda 1:21

kaleni mu cizemo ca Njambi, omo muvandamena kwija kwa Mwene yetu Yesu Kilistu a mema ku mbunge endi mukumyana mwonyo wa myaka yoshe.

Kujombolola 1:7

Kengeni, alinakwija a mashelwa! Vanu voshe vakamumona, amolika na vaje vamutivile makunga. Miyati yoshe ya ano asi vakalila mbimbi-mitwe omo vakamumona. Mwa vushunga cikapwa ngacije vene! Ewa.