Njwele 2:3 - Livulu lya Shukulu Kalunga

³ Vakevo vakalya vimena ngwe likuna. Lifuti eli lyapwile ngwe Lihya lya Endeni simbu te kanda vaciije, oloni omo vanalifungulula linapu oni ngwe mambo yangoco, nacimo cai civasezeleo.

Njwele 2:3 Iomraidhean Croise

Kushangumuka 13:10

Lote wakengele ku mutambela wa Zowale, co wamwene Cana ca Yondau coshe cakele na mema amangi, cafwile ngwe Lihya lya Shukulu Kalunga nambe Ingito. Simbu eyi te Shukulu Kalunga kanda acinyongese vinganda vya Sondoma na Ngomola.

Kushangumuka 2:8

Asinoni Shukulu Kalunga Njambi watombekele miti mu Endeni mu ngangela, co waakelemo munu uje yatangele.

Myaso 50:3

Njambi yetu aija, oloni kaija noloka kuluu embwe, tuhya twakunyongesa tuli kulutwe lwendi, na lihunzi lyakama linamuzengeleka.

Myaso 97:3

Tuhya tulinakutunda ku litanda lyendi, nakwenyeka vitozi vendi vaje vanamuzengeleka.

Kutuuka 10:15

Co vimbimba vashulile asi oshe noo azivalele na vakevo, co valile vyuma vyoshe vije vyasalele ku nyonzi ya mamanya, na vyoshe vije vyamenene mu mahya kuwezelelako na vushuka vwa ku miti. Kukwakele cuma cimo cakuzivuluka casalele ku muti nambe vyakumena mu lifuti lyoshe lya Ingito.

Kutuuka 10:5

Co vakevo vakapwa vavangi manene vakashula asi oshe. Vakalya vyoshe vije vyasaleleo kukuziluka ku nyonzi ya mamanya, nameme ku miti ije yasalele mu mahya eni.

Isaya 14:17

Kuma ou ikeye uje munalume wanyongesele vinganda nakutengulula kaye kupwa vimambo ndi? Kuma ou ikeye uje munalume katavele kwecela vinzinda vendi ngeci vaye ku membo avo ndi?

Isaya 15:6

Muna ndonga Nimelime nomu cau, mwila wamwo wajujwama, kukwesi wakuzivuluka unasalamo wai.

Isaya 33:4

Vufuko vwavo vakavupukula vwasi-vwasi nakuvwambata.

Isaya 51:3

“Njikazivila mema ku mbunge Yelusalema, na voshe vaje valinakuyoya mu ngundu yendi. Nameme lifuti lyavo linapu mambo, njikalipwisa ngwe citungu ca Endeni cije cinjakunine. Yelusalema ikajolela nakuvwaelela, ikaimba myaso yakushangazala nakukandelela kuli yange.

Isaya 9:18

Vuvi vwa vanu vushukuma ngwe tuhya twenyeka mambimbo na mishwena. Vushukuma ngwe likuna lya mu shwata lije lilinakwezoka milangi ya tuhya.

Isaya 9:19

Omwo Shukulu Kalunga Muka-nzili yoshe naluvala, cihiso cendi cilinakushukuma ngwe tuhya mu lifuti mwoshe nakunyongesa vanu, co naumo wai akamena ndolome yendi.

Njelemiya 5:17

Vakalya vimbuto vyeni na vyakulya vyeni, co vakatsiya vana veni va vanalume na ava va vanakazi. Vakatsiya matanga a vimanga veni nakunyongesa mikolovozi ya vushuka vwa vinyu, na miti ya mikuyu. Vinganda vyeni vya mu vimpaka vije mwakulaela vakavisiwula kuli mashwalale vavo.

Ezekiyele 36:35

Munu woshe akasimutwiya a lifuti lije lyapwile mambo yangoco, ololo linemuka kupwa ngwe Lihya lya Endeni, na vinganda vije vyasiwukile nakuvipukula, co vyasalele mupulungwa, oloni ololo vanavikolesa na vimpaka.

Amose 7:4

Njamwene cimona cikwavo lalo cakutunda kuli Shukulu Kalunga wa Akamwa ya Vyoshe. Mu cimona cije njamumwene alivwaesela kunyanyamesa vanu vendi na cihiso ca tuhya. Co tuhya twenyekele nzinga yakama ya mema a kalunga, co twashangumukile kwenyeka lifuti.

Hambakuke 1:6

Njikalingisa vaMbambilone kupwa muyati wa vanu va nzili, na muuka, kulisingimika. Mashwalale vavo valinakuya kwoshe-ikwoshe mu lifuti mwoshe nakufungulula mafuti a vakwavo.

Zakaliya 7:14

Co njavapekumwine ngwe lihunzi nakuvatwala ku mafuti eka ngeci vakayoyeleko. Lifuti eli lyalivwa lyasalele mu ngundu yangoco, naumo wai wayoyelelemo.”