Njelemiya 32:30 - Livulu lya Shukulu Kalunga

³⁰ Kutunda kukushangumuka kwa vin̄anda vyavo, vanu va mu Isalele na vanu va mu Yunda vanalingi vuvi, co vananjiluvalesa.

Njelemiya 32:30 Iomraidhean Croise

Kushangumuka 8:21

Co omo Shukulu Kalunga wazivile vweko vwavuvwa vwa n̄ombelo eyi, wazivile kuvwaa, walyendekesele ikeye vavenya ngwendi, “Kunjikelukilamo lalo kusinga asi a vilinga vya vanu, omo njazivuka ngwange kutunda ku vwanike vwavo viyongola vya vimbunge vyavo vyapwa vyavivi. Kunjikelukilamo lalo kunyongesa vyakuyoya vyoshe ngwe omu njinalingi a simbu eyi.

Isaya 63:10

oloni vanu vendi vamutengulukilile nakumulwisa nakulingisa vusiwa Munzinzime wendi Wakujela. Ngecivene, Shukulu Kalunga wapwile citozi cavo nakuvalwisa.

Njelemiya 11:17

“Yange Kalunga Muka-nzili yoshe, njakunine Isalele na Yunda, oloni ololo njivatumbwila tuyando. Vakevo vavenya vanalikokela tuyando omwo vanalingi vuvi, vananjiluvalesa akukombelela vin̄ombelo kuli Mbale.”

Njelemiya 2:7

Njaminenele mu lifuti lya vwilo, mukulya vushuka vwamwo na vyuma vyoshe vije vyavivwa. Oloni mwaviisile lifuti lyange nakujwalesa vushwana vuje vunjamyanene.

Njelemiya 22:21

Shukulu Kalunga wendekele neni omo mwakele mwamuvwa, oloni mwavyanene kumutolilila. Eci cikeco cifwa ceni tunde ku vwanike, kumwononokele Shukulu Kalunga.

Njelemiya 25:6

Vamilekele ngeci kesi mulemese nakupangela vinjambi vangoco, co kesi muluvalese Shukulu Kalunga akulemesa tumponya tuje tumunashongo. Nga mwononokele Shukulu Kalunga, nga kaminyanyamesele embwe.

Njelemiya 25:7

Oloni vavenya Shukulu Kalunga nendeka ngwendi mwavyanene kumutolilila. Oloni mwamuluvalesele na tumponya tweni, nakulikokela cihiso yeni vavenya.

Njelemiya 3:25

Tuli na vusiwa, co shwamwa yetu inatufwiki, omwo tunalingi vuvi kuli Shukulu Kalunga Njambi yetu, yetu na vakukulwila vetu kutwononokele mashiko endi.”

Njelemiya 30:14

Vaje vamizemene voshe vanamivala, kuvesi nakumyumba lalo mbunge. Njinamilwisa ngwe citozi, cihiso ceni cinapu cacikalu, omwo vivi vyeni vinapu vyavingi na kupenga-penga kweni kunapu kwakama manene.

Njelemiya 36:2

“Nona livulu usonekemo vyuma vyoshe vinjinakuleke ali Isalele, na a Yunda, na a miyati yoshe. Co soneka vyuma vyoshe vije njakulekele, kutunda ku simbu yakulivanga ije njendekele kuli yove omo Yosiya wapwile mwene, kweta na simbu ino.

Njelemiya 44:3

omwo vanu vamwo valingile vuvi, co vanjiluvalesele. Vanakombelela vin̄ombelo ku vinjambi veka, nakupangela vinjambi vaje nambe vakevo, nambe yeni, nambe vakukulwila veni kuvavalemesele.

Njelemiya 44:8

Omwo vikajo mulinakunjiluvalesa akulemesa tumponya, na a kukombelela ku vinjambi va mu Ingito muje mumunaija nakukala? Kuma mulinakulinga evi ngeci mulinyongese yeni vavenya, ngeci miyati ya vanu voshe va ano asi vamishendumune, co lizina lyeni lipwe cisingo ndi?

Njelemiya 8:19

Tolilileni! Mu lifuti mwoshe njilinakuziva kulila kwa vanu vange ngwavo, “Kuma Shukulu Kalunga waimo mu Siyone ndi? Kuma mwene wa mu Siyone waimo ndi?” Shukulu Kalunga mwene yavo nakumbulula ngwendi, “Omwo vikajo munanjiluvalesa akulemesa tumponya tweni nakutsikamena vinjambi vakujeneka seo?”

Ezekiyele 20:28

Njavanenele ku lifuti lije linjavakulaesele kuvana. Omo vakevo vamwene malundu amalaja na miti yakutonola, co vakombeleleleko vin̄ombelo. Co vanjiluvalesele a vin̄ombelo vije venyekele na a vinyu vije vivanenele kupwa milambu.

Ezekiyele 20:8

Oloni vanjitengulukilile, co kuvanjitolililile. Kuvombilile kuti tumponya twa vunyengwe, nambe kwecela vinjambi va vaka-Ingito. Njalivwaesela cimweja kuvatava ngeci vazive nzili ya vukalu vwange vwoshe muje mu Ingito.

Ezekiyele 23:3

Omo vakele mu Ingito vapwile vambanda, kuvapwile lalo vambanda vaje kanda valimone na vanalume, co vapwile vikwizi.