Njelemiya 29:18 - Livulu lya Shukulu Kalunga

¹⁸ Njikavayandesa na nzita, na njala ya lyangengela, na mushongo, co miyati yoshe ya mu kaye vakalikomokela a vije vakamona. Kwoshe kuje kunjikavashandwela, vanu kakalisimoka nakulikomokela a vije vinalingiwa kuli vakevo. Vanu vakavashendumuna, nakupangesa lizina lyavo kupwa cisingo.

Njelemiya 29:18 Iomraidhean Croise

2 Mizimbu 29:8

Omwo a cuma eci mukemwo Shukulu Kalunga naluvala na Yunda na Yelusalema, co cije calingile kuli vakevo cakasamesele nakuzivisa lyova munu woshe. Yeni mwazivuka mwamuvwa eci.

Myaso 44:11

Yove watavele ngeci vatutsiye ngwe vimanga, co watushandwelele ku mafuti eka.

Isaya 65:15

Vanu vange vakwangula vakapangesa lizina lyove ngwe cisingo. Yange Kalunga wa Akamwa ya Vyoshe, njikamitsiya. Oloni njikana lizina lyaliha kuli vaje vanjononoka.

Njelemiya 15:4

Mukapwa vunyengwe ku vanu voshe va a kaye, omwo a vyuma vyavivi manene vije vyalingile Manase muna Hezekiya mu Yelusalema, omwo wapwile mwene wa mu Yunda.

Njelemiya 18:16

Lifuti lyavo vanalipwisa lyakukomokesa, likapwa lyakushauka ku myaka yoshe. Voshe vaje vaketilamo vakalisimoka a vije vakamonamo, vakaningangesa mitwe yavo nakulikomokela.

Njelemiya 19:8

Co njikaviisa manene Yelusalema ngeci vanu voshe vakaitako vakalikasamena nakuziva lyova.

Njelemiya 24:10

Njikatuma nzita, na njala ya lyangengela, na mushongo ali vakevo ngeci naumo wai akasalao mu lifuti lije linjanene kuli vakevo na kuli vakukulwila vavo.”

Njelemiya 24:9

Njikanena vukalu ali vakevo ngeci miyati yoshe ya mu kaye vakalikomokele. Vanu vakavashendumuna, co vakalinga litangalakazi ali vakevo, nakuvayengula, nakupangesa mazina avo ngwe cisingo kwoshe kuje njavashandwela.

Njelemiya 25:9

‘Njikanena miyati ya vanu voshe vakutunda ku kunto na ngamba yange, Mwene Nevukaneza wa Mbambilone. Njikavanena ngeci vakulwise Yunda na vanu vamwo, nakulwisa miyati ya vaje muvanalyatela. Njikanyongesa muyati ou na vandambo vavo, co kukakala vingundu lika, cikapwa cimweso cakukomokesa nakulisimoka. Yange Kalunga, njinendekamo.

Njelemiya 26:6

Co nga yeni kumunjononoka, njikalinga ku Njuvo yeyi ngwe vije njalingile ku Shilo, co miyati ya vanu voshe va mu kaye vakapangesa lizina lya nganda eyi kupwa cisingo.”

Njelemiya 27:8

“Oloni nga muyati umo nambe vumwene vumo kuvalikeesa ku mashiko endi, co njikanyanyamesa uje muyati na nzita, na njala ya lyangengela, na mushongo noo njikatavesa Nevukaneza kunyongesa uje muyati.

Njelemiya 29:17

Shukulu Kalunga Muka-nzili yoshe alinakwendeka ngwendi, ‘Njilinakunena nzita, na njala ya lyangengela, na mishongo ali vakevo, co njikavapwisa ngwe vushuka vwa mikuyu vuje vwavuvi manene kuvuvwaa kuvulya.

Njelemiya 29:22

Omo vanu vaje vavatwalele mu vunzinda kutunda ku Yelusalema nakuya ku Mbambilone nga vashaka kusinga munu, co vakendeka ngwavo, ‘Shukulu Kalunga amilinge ngwe mwalingile kuli Zendekiya na Ahave, vaje mwene wa Mbambilone wavenyekele oku vayoya!’

Njelemiya 32:24

“VaMbambilone vanalundika mikinya kuzengeleka Yelusalema ngeci vailwise, vanu vali mu vukalu vwa njala ya lyangengela na mishongo, co nganda vakayana ku mavoko a vaMbambilone vaje valinakuyilwisa. Co vyoshe viwendekele vinapu vya vushunga.

Njelemiya 34:17

Ngecivene, yange Kalunga, njinendeka ngwange kumwanjononokele, kumwanene vakweni vaIsalele kupatuka kwavo. Mwamuvwa oni, njikamyana kupatuka, kupatuka kwakutsila mu nzita, na ku mushongo, nakulanduka ku njala ya lyangengela. Njikamiyevanganesa akati ka miyati ya vanu voshe va mu kaye. Co vakakomoka a vije njikalinga ali yeni.

Njelemiya 42:18

“Shukulu Kalunga, Njambi ya Isalele alinakwendeka ngwendi, ‘Ngwe muje njaluvalele na vanu va Yelusalema, ngecivene, njikaluvala lalo neni nga yeni muya ku Ingito. Mukakala mu vukalu vwakama manene, co vanu vakamishendumuna, nakupangesa lizina lyeni kupwa cisingo. Nalumo lwai lalo mukamona mutambela uno.’ ”

Njelemiya 44:12

Ngwe ali vanu va mu Yunda vaje vanasala, vaje vali na cizango cakuya nakukakala ku Ingito, voshe njikavanyongesa, vanike na vakulunu voshe, vakatsila mu Ingito, mu nzita, nambe ku njala ya lyangengela. Vakapwa vanu va vunyengwe, vanu va mafuti eka vakavashendumuna, co lizina lyavo likapwa cisingo.

Njelemiya 44:22

Ku litangwa lya lelo vene, lifuti lyeni linapu vingundu, naumo wai alimo. Linapu lya vunyengwe, vanu vapangesa lizina lyamwo kupwa cisingo, omwo Shukulu Kalunga kasimpile a vilinga vyeni vya vuvi.

Ezekiyele 12:15

“Omo njikavashandwela akati ka miyati ya vanu veka na mu mafuti eka, co vakazivuka ngeci kuma yange Kalunga.

Ezekiyele 22:15

Njikashandwela vanu vove ku mafuti oshe na ku miyati yoshe, co njikamanesa vilinga vyove vya kupenga-penga.

Ezekiyele 23:46

Evi vikevyo vyalinakwendeka Shukulu Kalunga wa Akamwa ya Vyoshe ngwendi, “Njikanena munga ya vanu vavavi mu kuvahisa nakuvevila.

Ezekiyele 36:19

Njavahisile omwo akuyoya kwavo kwakuvi, na vilinga vyavo vyavivi, co njavashandwelele akati ka miyati yeka.

Ezekiyele 5:15

“Omo njiluvala na litoto lyakama nakuminyanyamesa, co miyati yoshe vaje vanamizengeleka vakalishoshomwena. Vakamikenga na vunyengwe nakumishendumuna.

Ezekiyele 6:8

“Oloni njikecela vamo vakayoye, co njikavashandwela akati ka miyati,

VaLevi 26:33

Co nzita ikaija akati keni yakumishandwela ku mafuti eka. Mu lifuti lyeni mukapwa mwangoco, na membo akapwa vingundu.

Amose 9:9

“Njikashika lishiko, co vanu va mu Isalele vakavasala ngwe munu asala vimbuto mu musalo. Njikavasala akati ka miyati nakutundisa vaje voshe vangoco.

Mika 6:16

Eci cikalingiwa omwo munakavangeya vilinga vyavivi vya Mwene Omeli, na munendi Mwene Ahave. Munakavangeya mashiko avo, ngecivene, njikaminyongesa. Co vanu voshe vakamishaula. Vanu vange vakamishaula kwoshe-ikwoshe.”

Zakaliya 7:14

Co njavapekumwine ngwe lihunzi nakuvatwala ku mafuti eka ngeci vakayoyeleko. Lifuti eli lyalivwa lyasalele mu ngundu yangoco, naumo wai wayoyelelemo.”

Zakaliya 8:13

Vanu va mu Yunda na vanu va mu Isalele! Ku san̄ulu vaka-kwija valisingile umo na mukwavo nakwendeka ngwavo, ‘N̄avava ije vene yawililile a Yunda na a Isalele iwile ali yeni.’ Oloni njikamyamena, co vaka-kwija vaje vakendeka kuli umo na mukwavo ngwavo, ‘Tambuleni vivezikiso vya cifwa cimo vije vyakele a Yunda na a Isalele!’ Ngecivene, simpeni kesi muzive lyova.”

Kulava 5:27

Nga ikeye nalingi vupangala, co aje mema a cisingo akamuvinjisa manene, co uje munakazi akapwa muka-kujombwesa limbo nameme shivu yendi ikashoka, na lizina lyendi likapwa lyakusinga akati ka vavushoko vwendi.

Luka 21:24

Vamo vakavatsiya na mukwale, co vakwavo vakavatwala vunzinda ku mafuti eka, co vaka-kujeneka kukulaela vakalyatangela Yelusalema noo simbu yavo inete.

Kwituluka mu Mashiko 28:25

“Shukulu Kalunga akamyecelela vitozi veni ngeci vamifungulule. Co yeni mukavalwisila ku mutambela umo, oloni mukatewela mu mitambela mwoshe. Vanu voshe va ano asi vakalikomokela manene omo vakamona vije vikalingiwa kuli yeni.

Kwituluka mu Mashiko 28:37

Ku mafuti kuje kwakamishandwela Shukulu Kalunga, vanu vakalisimoka akumona vije vyalingiwa kuli yeni, co vakamishendumuna nakumijola.

Kwituluka mu Mashiko 28:64

“Shukulu Kalunga akamishandwela akati ka miyati yoshe ya ano asi, co kuje mukapangela vinjambi vakushonga va viti na mamanya, vinjambi vaje nambe yeni nambe vakukulwila veni kumwavazivukile.