Njelemiya 23:3 - Livulu lya Shukulu Kalunga

³ Njikatundisa vanu vange vaje vanasalao ku mafuti kuje kunjavashandwelelele, co njikavelwisa mu lifuti lyavo. Vakakala na vana vavangi, co vakatuma manene.

Njelemiya 23:3 Iomraidhean Croise

Myaso 106:47

Shukulu Kalunga Njambi yetu twamene, tutundise akati ka miyati ya vanu, ngeci tukandelele nakushangazala lizina lyove.

Njelemiya 16:15

Oloni vakalisinga nakwendeka ngwavo njapwa Njambi wakuyoya, uje watundisile vanu va Isalele ku lifuti lya ku kunto na ku mafuti oshe aje njavashandwelele, co njikavelwisila mu lifuti lyavo, lifuti lije linjanene kuli vakukulwila vavo. Yange Kalunga, njinendekamo.”

Njelemiya 29:14

Eyo, njendeka ngwange, mukanjiwana, co njikamiilwisila mu lifuti lyeni lalo. Njikamikungulula kutunda mu mafuti oshe, nakutunda mu mitambela yoshe muje munjamishandwelele, co njikamiilwisa nakuminena mu lifuti muje mumwatundile, omo njamitwalele mu vunzinda. Yange Kalunga, njinendekamo.’

Njelemiya 30:10

Yeni vanu vange, kesi muzive lyova, yeni vanu va Isalele kesi mujaje embwe. Njikamyovola ku lifuti lije lya kulyala, ku lifuti lije ku muli mu vunzinda. Mukeluka kwimbo, co mukayoya mu kwoloka, mukakala mwamuvwa, naumo wai akamizivisa lyova.

Njelemiya 30:3

omwo simbu ilinakwija omo njikelwisa vanu vange, Isalele na Yunda. Njikavelwisila ku lifuti lije njaanene vakukulwila vavo, co likapwa lyavo lalo. Yange Kalunga, njinendekamo.”

Njelemiya 31:7

Shukulu Kalunga alinakwendeka ngwendi, “Imbileni Isalele nakujolela, muyati wa vanu wakama kutuvakana miyati ya vanu voshe. Imbeni mwaso weni wakushangazala ngweni, ‘Shukulu Kalunga namena vanu vendi, napatula voshe vaje vasaleleo.’

Njelemiya 31:8

Njikavatundisa ku lifuti lya ku kunto, nakuvakungulula kutunda ku mitambela ya ku shongo na shongo ya kaye. Tupuputwa na vilema vakaija amo navo, na tufumbakazi, na vaje vali kuyehi nakukita. Vakeluka ngeci vapwe muyati wakama.

Njelemiya 32:37

Njikakungulwila vanu amolika kutunda ku mafuti oshe kuje njavashandwelele omwo njaluvalele navo manene, co yange njikavelwisa ku mutambela uno, nakuvecela ngeci vakale muno mu kwoloka.

Njelemiya 46:27

“Vanu vange kesi muzive lyova, vanu va Isalele kesi mujaje embwe. Njikamipatula mu lifuti lije lya kulyala, mu lifuti lije mwakele mu vunzinda. Mukeluka lalo kwimbo nakukala mu kwoloka, mukakala mwamuvwa, co naumo wai akamizivisa lyova.

Njelemiya 50:19

Njikelwisila vanu va Isalele ku lifuti lyavo. Co vakalya vyakulya vije vilinakumena a Munkinda wa Kalemele mu lifuti lya Mbashane, co vakalya vyoshe vije vivashaka ku vimbuto vije vilinakumena mu mafuti a Efalime na Ngilyande.

Njelemiya 8:3

Co vanu va muyati ou wa vuvi vaje vanasalao njikavatwala ku mafuti eka, vakaangula kutsa kutuvakana kuyoya. Yange Kalunga Muka-nzili yoshe, njinendekamo.”

Ezekiyele 11:17

“Ngecivene, valeke evi yange Kalunga wa Akamwa ya Vyoshe, njendeka. Njikavakungulula kuvatundisa ku mafuti aje njavashandwelele, co njikavana lifuti lya Isalele.

Ezekiyele 36:11

Njikawezelela ku vanu na ku vingombe. Co mukatuma manene kutuvakana mumwapwile akulivanga, co mukakala na vana vavangi. Njikamitava kuyoyela kuje ngwe muje mumwayoyele laja, co njikamitumisa nakukala mu kwoloka kutuvakana akulivanga. Asinoni mukazivuka ngeci yange njapwa Kalunga.

Ezekiyele 36:24

Njikamiilwisa kumitundisa ku miyati yoshe na ku mafuti oshe nakumiilwisila ku lifuti lyeni lalo.

Ezekiyele 36:37

Shukulu Kalunga wa Akamwa ya Vyoshe alinakwendeka ngwendi, “Yange njikatava lalo vaIsalele kulomba vukwasi kuli yange, co njikavatava lalo vaIsalele vakatume manene ngwe matanga a vimanga.

VaLevi 26:9

Njikamivezikisa nakumyana vana vavangi, co njikanyunga cikumiiyo cije njalikumiiye neni,

Mika 2:12

“Oloni njikamikungulwila amolika, yeni vanu voshe va mu Isalele vaje vanasalao. Njikamikungulwila amolika ngwe vimanga veluka ku vutanga. Ngwe vulilo vunashulu na vimanga, lifuti lyeni likakala na vanu vavangi.”

Mika 7:12

Vanu vove vakeluka kuli yove kutunda ku mitambela yoshe, ku Asilya mu ngangela, na ku Ingito mu mbwela, na mu lifuti lya Yufuleti, na kulyala ku mema a kalunga na ku minkinda.