Njelemiya 2:28 - Livulu lya Shukulu Kalunga

²⁸ “Vali kulijo vinjambi vaje mwalishongelele? Vanapande kumyamena, omo muli mu tuyando! Yunda, yove uli na vinjambi vavangi ngwe muuli na vinganda vyavingi.

Njelemiya 2:28 Iomraidhean Croise

2 Vimyene 3:13

Co Elisha wendekele kuli mwene wa mu Isalele ngwendi, “Omwo vikajo njikukwasela? Ya ukehule vaka-kwimanena vaje vaakele nakwihula isho na vanyoko.” Njolame wamukumbulwile ngwendi, “Embwe, Shukulu Kalunga natukundika mu mavoko a mwene wa Mowavi yetu vimyene vatatu.”

Isaya 45:20

Shukulu Kalunga alinakwendeka ngwendi, “Likungululeni amo, yeni vanu va mu mafuti, voshe vaje vanasalao ku miyati ijeni ngeci vamisompe! Vanu vaje valemesa tumponya twavo twa viti, co valombela kuli vinjambi vaje kuvasa kuvovola, vanu ava kuvesi na mana!

Isaya 46:2

Tumponya kutwasa kulyamena tuketwo vavenya, vanatufungulula nakututwala kweka. Awa akewo mamaneselelo a vinjambi va Mbambilone!

Isaya 46:7

Uje kamponya vamwambata a vitsili vyavo, vamwaka mu mutambela umo, co kemana aje vene, kukasa kutunda aje vanakaka. Nga munu alombela ku kamponya, kukasa kumukumbulula, nambe kumwamena ku tuyando.

Isaya 57:13

Omo mutambeka ngeci vamikwase, eceleni tumponya tweni tumyamene! Lihunzi likavapekumuna! Oloni vaje vakulaela muli yange vakayoya mu lifuti, co vakanjilemesa mu Njuvo yange.”

Njelemiya 1:16

Co njikahisa vanu vange omwo vanalingi vuvi akunjiseza, vanakombelela vin̄ombelo ku vinjambi veka, co vanashongo tumponya nakutulemesa.

Njelemiya 11:12

Asinoni vanu va mu Yunda na vanu va mu Yelusalema vakatambeka ku vinjambi vaje vavanakala nakukombelela. Oloni vinjambi vaje kuvakavamena omo vali mu vukalu.

Njelemiya 11:13

Vanu va mu Yunda muli na vinjambi vavangi manene kutuvakana vinganda vyeni, muli na mitula yaingi mu Yelusalema yakukombelela kuli Mbale njambi wa vunyengwe kutuvakana vitapalo vya mu Yelusalema.

Njelemiya 30:7

Litangwa lyalikalu lilinakwija, kukwesi lalo litangwa lyeka lyakulifwa nalyo, ikapwa simbu yaikalu kuli vanu vange, oloni vakovoka.”

Njelemiya 37:19

Vikajo vyalingiwa kuli vaka-kwimanena vove vaje vakulekele ngwavo mwene wa Mbambilone kakaija nakukulwisa, nambe kulwisa lifuti lyove?

Hoziya 10:1

Vanu va mu Isalele vapwile ngwe mukolovozi wa vushuka vwa vinyu uje wakele na vushuka vwavungi. Omo vakele mwamuvwa manene, co lalo vatungile mitula yaingi manene. Omo lifuti lyavo lyakele na vwilo manene, co lalo valingile vimanda vyavivwa manene vyakujela vije valinakulemesa.

Hambakuke 2:18

Seo mukajo ili a kamponya? Capwa lika cuma cakupanga ku munu, kakendeka lika vyuma vya makuli. Vuvwa mukajo kakalingi kuli uje wakapangele ngeci akakulaele, njambi uje wakwonwa kwendeka?

Hambakuke 2:19

Munavindama! Yeni mukendeka ku citi nambe ku limanya ngweni, “Induka!” Kuma kamponya kasa kumisholwela cuma cimo ndi? Nameme vanu vanakafwiki siliva na ngolinde, oloni kukesi na mwonyo.

Kwituluka mu Mashiko 32:37

Asinoni Shukulu Kalunga akehula vanu vendi ngwendi, ‘Vali kulijo vaje vinjambi va nzili vamwakulaelele?

Maako 10:14

Yeni mukalilile kuli vinjambi vaje munaangula. Vakevo vamyamene omo muli mu tuyando.”