Mateo 7:25 - Livulu lya Shukulu Kalunga

²⁵ Nyonzi yanyokele, livazi lyezile, co lihunzi lyakama lyahuwile nakuningangesa ije njuvo. Oloni kuyawile, omwo vaitungilile a limanya.

Mateo 7:25 Iomraidhean Croise

Visimo 10:25

Lihunzi lyakama liija, co vaka-vuvi vakapekumukila kulyala, oloni vaka-kulongwa Njambi akavemanesa mbe.

Malakiya 3:3

Akaija nakusompa ngwe n̄ulungu muka-kufula vikuvo nakujelesa siliva. Akajelesa vaLevi ngwe muka-kufula vikuvo mwakajelesa siliva na ngolinde, ngeci vakanene vin̄ombelo vya vushunga kuli Shukulu Kalunga.

Mateo 16:18

Co yange njikuleka lalo ngwange, yove unapu Petulu, co a limanya eli vene akeo njikatungila cikungulukilo cange, co nzili ya vukalo vwa vatsi kuyikacihyana.

Mateo 7:24

“Ngecivene, woshe aziva majwi ange awa nakuwononoka, napu ngwe munalume uje wakunyanyama watungilile njuvo yendi a limanya.

Mateo 7:26

“Oloni woshe aziva majwi ange awa, co kawononoka, co napu ngwe munalume uje wakweva watungilile njuvo yendi a lishen̄avu.

Mateo 7:27

Co omo nyonzi yanyokele, na livazi lyezile, co lihunzi lyakama lyahuwile nakuningangesa ije njuvo, co yawile, co kuwa kwayo kwapwile kwakuvi manene!”

Vilinga vya Miluwa 14:22

Vakolesele vaka-kukulaela nakuvatakamesa ngeci vapwe vaka-vushunga mukukulaela. Vavalongesele ngwavo, “Tunapande kwita mu tuyando twatungi ngeci tukovele mu Vumwene vwa Njambi.”

Efeso 3:17

co njilomba ngwange Kilistu akale mu vimbunge vyeni akukulaela. Njilomba ngwange mushalave mizi na luvula lweni mu cizemo,

Kolose 2:7

Mizi yeni ishalave manene muli ikeye, tungileni myonyo yeni ali ikeye, co pweni vaka-nzili manene mukukulaela kweni, ngwe muje muvamilongesele. Co shuleni nakukandelela.

Yakomba 1:12

Vanavezika vanu vaje valongwa a simbu ya vyeseko, omwo nga vahyana na kukakateya mu ceseko eci, co vakatambula mwonyo kupwa cikandelela cavo uje wanakulaesa Njambi kuli vaje vaazema.

1 Petulu 1:5

Vinapu vyeni, akukulaela vanaminyungilavyo mwamuvwa na nzili ya Njambi yakwovoka ije inalivwaesela kusholoka a simbu yakukotoka.

1 Petulu 1:7

Vutumbe vwa vyeseko evi vunapu kumwesa vukaleo ngeci kukulaela kweni kunapu kwa vushunga. Nambe ngolinde yasa kunyonga, vakayeseka na tuhya, kukulaela kweni lalo kuje kuli na seo yakama manene kutuvakana ngolinde, vanapande kuceseka ngeci kukakateye. Asinoni mukatambula cishangala na vumpau na kasingimiko a Litangwa lije omo Yesu Kilistu akasholoka.

1 Yowano 2:19

Mwa vushunga vene, vanu ava kuvakundamene ku mbunga yetu, omu mukemwo muvatundilile kuli yetu, nga vakevo vakundamene ku mbunga yetu, nga vali netu amo. Oloni vatusezele ngeci cipwe cakutungukwa ngeci naumo wai wavo wakundamene ku mbunga yetu.