Mateo 16:13 - Livulu lya Shukulu Kalunga

¹³ Omo Yesu waile ku lifuti lya kuyehi na nganda ya Sesaliya Filipu wehwile vandongisi vendi ngwendi, “Vanu valinakutumbula Muna Munu ngwavo ikeye iya?”

Mateo 16:13 Iomraidhean Croise

Ndanyele 7:13

Mu cimona cange ku simbu ya vutsiki, njamwene umo wakulifwa ngwe munu. Ikeye wakele nakushwenya kuli yange, co mashelwa amuzengelekele, co waile kuli uje wakala ku myaka yoshe.

Mateo 12:32

Co woshe uje endeka lijwi limo lyakushaula Muna Munu vakamusambesa, oloni uje ashaula Munzinzime Wakujela kuvakamusambesa, nambe simbu ino, nambe simbu ya kulutwe.

Mateo 12:40

Omwo ngwe Yona wakele matangwa atatu mutanya na vutsiki mwimo lya liisi lyakama, ngecivene, na Muna Munu lalo akakala matangwa atatu mutanya na vutsiki mwisi ya livu.

Mateo 12:8

Omwo Muna Munu ikeye Mwene wa Litangwa Lyakuhwima.”

Mateo 13:37

Yesu wavakumbulwile ngwendi, “Muka-kukuva vije vimbuto vyavivwa, ikeye Muna Munu.

Mateo 13:41

Muna Munu akatuma tungelo twendi, co vakakungulula vyuma vyoshe vije vikanene vuvi na vaje voshe vaka-kulinga vuvi nakuvatundisa mu Vumwene vwendi.

Mateo 15:21

Co Yesu watundile ku mutambela uje waile ku lifuti lya kuyehi na vinganda vya Tile na Sindone.

Mateo 16:27

Omwo Muna Munu akaija mu vumpau vwa Ishe amo na tungelo twendi, co asinoni akana kuli munu na munu fweto yendi kupwisa ngwe ku vipangi vyendi.

Mateo 16:28

Mwa vushunga njimileka ngwange, kuvali vamo kuno kuvakatsi kuvanga vanamono Muna Munu alinakwija mu vumwene vwendi.”

Mateo 25:31

“Omo Muna Munu akaija mu vumpau vwendi amo na tungelo twendi voshe, akatumbama a litanda lyendi lya vumwene.

Mateo 8:20

Yesu wamukumbulwile ngwendi, “Vimbanje vali na mena, co lalo tuzila vali na mashwa, oloni Muna Munu kesi naa akusatela mutwe wendi.”

Mateo 9:6

Njikamimwesa ngeci muzivuke ngweni kuma Muna Munu ali na moko ano asi yakusambesa vuvi.” Ngecivene, wendekele kuli uje muka-kayekele ngwendi, “Katuka, ambata linala lyove, co uye kwimbo lyove!”

Mako 10:45

Omwo Muna Munu wezile, kezile ngeci vanu vamupangele embwe, oloni wezile mukupanga nakwana mwonyo wendi ngeci apatule vanu vavangi.”

Mako 8:38

Nga munu akanjizivila shwamwa na vilongesa vyange akati ka cisemwa eci ca vupangala na vuvi, asinoni Muna Munu lalo nendi akamuzivila shwamwa omo akaija mu vumpau vwa Ishe amo na tungelo vakujela.”

Yowano 1:51

Co Yesu wendekele kuli vakevo ngwendi, “Mwa vushunga njimileka ngwange, mukamona lilu linashokoloka, co na tungelo va Njambi valonda nakushuluka ali Muna Munu.”

Yowano 12:34

Ije mbunga vakumbulwile ngwavo, “Lishiko lyetu lituleka ngeci Wakuvwavesa akayoya myaka yoshe. Vatijo yove wendeka ngwove Muna Munu vanapande kumujundula? Iyajo ou Muna Munu?”

Yowano 3:14

Co ngwe Mosesa washukikile linyoka wa vunengu a manda mu mambo, ngecivene, mucifwa cimo vakashukika Muna Munu,

Yowano 5:27

Co naana Mwana moko yakusompa, omwo napu Muna Munu.

Vilinga vya Miluwa 10:38

Mwazivuka vya Yesu wa ku Nazaleta na muje Njambi wamuvwavesele Munzinzime Wakujela na nzili. Wendanganene kwoshe-ikwoshe nakulinga vyavivwa nakukangwisa voshe vaje vakele mwisi ya nzili ya Liyavola, omwo Njambi wakele amo nendi.

Vilinga vya Miluwa 7:56

Wendekele ngwendi, “Kengeni! Njinamono lilu linashokoloka na Muna Munu nemana ku livoko lya cilyo lya Njambi!”