Mateo 10:26 - Livulu lya Shukulu Kalunga

²⁶ “Ngecivene, kesi muzivile vanu lyova. Omwo kukwesi cuma cakufwika civakonwa kufukula, nambe cuma cakwendekela mu vushweke kuvanga cikajomboloke.

Mateo 10:26 Iomraidhean Croise

Visimo 10:9

Uje enda mu vushunga ikeye enda mu kwoloka, oloni uje enda mwa kupenga-penga vakamukwata.

Visimo 28:1

Vaka-vuvi vatewa nambe wai avasheka, oloni muka-vushunga wapwa wakusimpa ngwe ndumba.

Visimo 29:25

Kuzivila vanu lyova kunapu kulitela nganjo yove vavenya, oloni nga ukulaela kuli Shukulu Kalunga ukovoka.

Muka-kwambulula 12:14

Njambi akasompa vyuma vyoshe vije tulinakulinga, nambe vyavivwa, nambe vyavivi, nameme vene vyuma vije vyakulingila mu vushweke.

Isaya 41:10

Kesi muzive lyova, yange njili neni amo! Kesi mujaje, yange Njambi yeni! Njikamitakamesa nakumikwasa, njikaminyunga nakumyamena.

Isaya 41:14

Shukulu Kalunga nendeka ngwendi, “Isalele nameme munapu muvavandondo, kesi muzive lyova. Yange Njambi wakujela wa Isalele, njikamyamena nakumyovola.

Njelemiya 1:8

Kesi uvazivile lyova embwe, omwo yange njikakala nove nakukunyunga. Yange Kalunga, njinendekamo!”

Ezekiyele 2:6

“Oloni yove, muna munu, kuwapandele kuvazivila lyova nambe kuziva lyova lya vije vendeka. Vakevo vakakuleulula nakukuyeluwisa, cikapwa ngwe ulinakukala akati ka manyewe. Nameme ngoco, kesi ukazive lyova lya vaje vaka-kunjitengulukila nambe kuziva lyova lya vije vendeka.

Mateo 10:28

Kesi muzivile lyova vaje vatsiya muvila oloni kuvasa kutsiya mwonyo, oloni zivileni lyova Njambi, uje asa kunyongesa vyoshe mwonyo na muvila muje mu mbulu ya tuhya.

Mako 4:22

Omwo kukwesi cuma cakushweka kuvanga cisholoke, co cuma coshe cakufwika kuvanga cifukuke.

Luka 24:47

ngeci kutenguluka nakusambesa kwa vivi vakavyambulule mu lizina lyendi ku mafuti oshe, kushangumukila mu Yelusalema.

Luka 8:17

“Cuma coshe cakushweka kuvanga cisholoke, na cuma coshe cakufwika kuvanga vaciwane nakucifukula.

Vilinga vya Miluwa 1:8

Oloni omo Munzinzime Wakujela akaija ali yeni, mukashula na nzili, co mukapwa vakaleo vange mu Yelusalema na mu Yundeya na mu Samaliya mwoshe, na ku mamaneselelo a asi.”

Vilinga vya Miluwa 4:13

Vaka-Munga vakomokele omo vamwene kusimpa kwa Petulu na Yowano nomu vavamwene ngeci vapwile vanu vangoco vakujeneka kulilongesa. Co vavanongonwene ngeci vakevo vakele amo na Yesu.

Vilinga vya Miluwa 4:19

Oloni Petulu na Yowano vavakumbulwile ngwavo, “Yeni vavenya waneni cuma muka cacivwa ku mesho a Njambi, kwononoka yeni nambe kwononoka Njambi.

1 Kolinte 4:5

Ngecivene, kesi musompe munu omwo simbu kanda yete. Kusompa kwakumanesela kunavandamena noo Mwene akaija, ikeye akaka a litanya vyuma vyakushweka mu lisusulungu nakusholola vizango vya mu vimbunge vya vanu. Asinoni voshe vakatambula kushangala kuli Njambi kuje kunavapande.

1 Petulu 3:14

Oloni nambe nga muyanda mukulinga vije vya vushunga, co vwaeleleni! Kesi muzivile lyova munu umo, co kesi mulishoshomwene.