Loma 5:17 - Livulu lya Shukulu Kalunga

¹⁷ Mwa vushunga a vuvi vwa munu umolika kutsa kwashwanene omwo uje munu umolika. Oloni vyuma vije vinasholoka vyanalingi uje munu umolika, ikeye Yesu Kilistu vinahyana manene! Voshe vaje vanatambula kutetela kwa Njambi kwa myaka yoshe vanavapwisa vaka-vushunga ku mesho endi vakashwana mu mwonyo ali Kilistu.

Loma 5:17 Iomraidhean Croise

Kushangumuka 2:17

oloni ku vushuka vwa muti wa mana akuzivuka vuvwa na vuvi, kesi ukalyeko. Omwo nga ukalyako, co ukatsa ku litangwa lije vene.”

Kushangumuka 3:19

Ukapanga nakuundangana manene nakutukuta akupanga mu livu, ngeci likamenese vyakulya, noo ukeluka ku livu kuje kuwatundile. Omwo yove watundile ku livu, co ukeluka lalo ku livu.”

Kushangumuka 3:6

Omo munakazi wamwene vuvwa vwa uje muti na sholovya ya vushuka vwawo, co lalo ukewo wasa kutengulwisa munu akale na mana, wapotwele vushuka vwawo, walile. Co waaneneko vumo munalume wendi, nendi lalo walile.

Isaya 61:10

Yelusalema ijolela omwo vije vyanalingi Shukulu Kalunga. Shukulu Kalunga nafu ngwe shombolwa nazala vuzalo vwa vushombolwa. Njambi namwamena nakumuhyanesa.

Mateo 25:34

Asinoni mwene akendeka kuli vaje vali ku livoko lyendi lya cilyo ngwendi, ‘Ijeni, yeni vaanavezikisa Tate! Shwaneni vumwene vuje vamivwaeselele tunde kukutanga kwa kaye.

Yowano 10:10

Mwizi akaija nakwiva lika nakutsiya nakunyongesa. Njinaija ngeci mukale na mwonyo, mwonyo waungi.

Loma 5:12

Ngecivene, vuvi vwezile ano a kaye ali munu umolika, co vuvi vwendi vunanene kutsa. Co kutsa kunete ku miyati yoshe ya vanu omwo voshe vanalingi vuvi.

Loma 5:15

Oloni vwana vuje kuvwafwile ngwe kuvulumuna, omwo vwana vwa Njambi kuvwalifwile ngwe vuvi vwa Andama embwe. Mwa vushunga vene vanu vavangi vanatsi omwo vuvi vwa munu umolika. Oloni kutetela kwa Njambi kwakama manene, co na vwana vwendi vwakujeneka kupangela vuje vwanaana kuli vanu vavangi mu kutetela kwa munu uje umolika, ikeye Yesu Kilistu vunapu lalo vwakama manene.

Loma 5:20

Lishiko lyasholokele ngeci vilinga vya kupenga-penga vitume, oloni kuje vuvi vwatumine, kutetela kwa Njambi kwatumine manene.

Loma 6:14

Omwo vuvi kuvwapandele kumishwana embwe, omwo kumwesi nakuyoya ku lishiko embwe oloni mu kutetela kwa Njambi.

Loma 6:23

Omwo fweto ya vuvi inapu kutsa, oloni vwana vwa Njambi vunapu mwonyo wa myaka yoshe muli Kilistu Yesu Mwene yetu.

Loma 8:39

nambe cuma cili mwilu, nambe cuma cili mwisi, nacimo cai cakutanga casa kututundisa ku cizemo ca Njambi cije cinapu cetu muli Kilistu Yesu Mwene yetu.

1 Kolinte 15:49

Ngwe omo tuli na cifwa ca uje munalume watundile ku livu, ngecivene, mutukalifwa na cifwa cimo ca uje Munalume watundile mwilu.

1 Kolinte 4:8

Muli na vyuma vyoshe vimushaka ndi? Munafuku laja ndi? Munapu mu vimyene nameme yetu kanda tufwemo ndi? Oloni njashakele ngeci mupwe mu vimyene, ngeci netu tupwe tu vimyene amo neni.

Filipu 3:9

ngeci njikale muli ikeye. Yange kunjesi na vushunga vwange vavenya vwai, vuje vasa kuwana akwononoka Lishiko. Ololo njili na vushunga vuje vananjana akukulaela lika kuli Kilistu, vushunga vuje vutunda kuli Njambi, co nsina yavwo inapu kukulaela.

1 Timateo 1:14

Co Mwene yetu wetilile ngozi yendi yakama ali yange nakunjana kukulaela na cizemo vije vinapu vyetu muli Kilistu Yesu.

2 Timateo 2:12

Nga tutwalao na lukakateya, co tukashwana lalo amo nendi. Nga tumuvyana, co na ikeye lalo akatuvyana.

Yakomba 2:5

Tolilileni, vasamba vange vanjazema! Njambi waangwile tuutu mu kaye kano ngeci vapwe vaka-kufuka mukukulaela, co vakashwane vumwene vuje vwakulaesele kuli vaje vamuzema.

1 Petulu 2:9

Oloni yeni munapu muyati wakwangula, vaka-kukombelela va Mwene, muyati wakujela, vanu va Njambi vavenya, vanamyangula mukwambulula vikomokeso vya vilinga vya Njambi, uje wamisanene kumitundisa mu lisusulungu kuminena ku ceke cendi cakukomokesa.

Kujombolola 1:6

co natupwisa vumwene vwa vaka-kukombelela mukupangela Njambi na Ishe. Kuli Yesu Kilistu kukale vumpau na nzili ku myaka yoshe! Ewa.

Kujombolola 20:4

Asinoni njamwene matanda, co vaje vatumbameneo vavaanene nzili yakusompa. Co njamwene myonyo ya vaje vavatsiile omwo vambulwile vushunga vuje vwasholwele Yesu amo na lijwi lya Njambi. Kuvalemesele uje cikashama nambe kamponya kendi, nambe vakevo kuvatambwile cizivukiso ca uje cikashama a maholo avo nambe a mavoko avo. Vasangukilile ku mwonyo nakushwana ngwe vimyene amo na Kilistu myaka 1,000.

Kujombolola 20:6

Kuvwaelela nakuvezika kwakama kuli vaje vakasanguka a cisangukilo cakulivanga. Kutsa kwamucivali kucesi na nzili ali vakevo, vakapwa vaka-kukombelela va Njambi na Kilistu, co vakashwana amo nendi myaka 1,000.

Kujombolola 22:5

Kumukakala lalo vutsiki muje, co kumukakala lalo ndeya nambe litangwa, omwo Shukulu Kalunga Njambi akapwa ceke cavo, co vakashwana ngwe vimyene ku myaka na myaka.

Kujombolola 3:21

Kuli vaje vahyana, njikavana moko yakutumbama kuyehi nange a litanda lyange, ngwe omo yange njahyanene, co ololo njinatumbama kuyehi na Tate a litanda lyendi.