Loma 4:20 - Livulu lya Shukulu Kalunga

²⁰ Kapelyangelele mukukulaela kwendi, co kakele na vimata a cikulaeso ca Njambi, oloni wakulaelele manene, co washangazalele Njambi.

Loma 4:20 Iomraidhean Croise

Kushangumuka 15:6

Avilama wakulaelele kuli Shukulu Kalunga, co omwo a cuma eci, Shukulu Kalunga wamulaveleleco kupwa vushunga.

2 Vimyene 7:19

co uje mwata wakumbulwile ngwendi, “Eci kucikalingiwa embwe, nameme vene nga Shukulu Kalunga atuma nyonzi a simbu ino!” Co Elisha wamukumbulwile ngwendi, “Ukacimona omo cikalingiwa, oloni yove kuukaliko vimo ku vyakulya vije.”

2 Vimyene 7:2

Co uje katumwa ka mwene wendekele kuli Elisha ngwendi, “Eci kucikalingiwa embwe, nameme vene nga Shukulu Kalunga atuma nyonzi yakama a simbu ino!” Co Elisha wamukumbulwile ngwendi, “Ukacimona omo cikalingiwa, oloni yove kuukaliko vimo ku vyakulya vije.”

Isaya 35:4

Endekeni kuli vaje vanalijujukila ngweni, “Koleseni kesi muzive lyova! Njambi yeni alinakwija. Aija nakulinga shambandinga vitozi veni.”

Isaya 7:9

Isalele kuyesi na nzili yakutuvakana Samaliya nganda yayo yakama, co samaliya kuyesi na nzili yakutuvakana Mwene Peka. “Nga kukulaela kweni kucikakolesa, co kumukakolesa embwe.”

Ndanyele 10:19

Co wendekele lalo ngwendi, “Njambi wakuzema, ngecivene, cuma cimo kesi cikupese nambe kukuzivisa lyova embwe.” Omo wendekele evi, njazivile nzili yakama manene, co njendekele ngwange, “Shukulu, njileke viwushaka kwendeka. Ololo njili na nzili oni.”

Ndanyele 11:32

Mwene akapangesa makuli mukuwana nzili kuli vanu vaje vanaseza kulemesa kwavo, oloni vanu vaje vakakavangeya Njambi vakakala na nzili yakumuvyana.

Hangai 2:4

Oloni ololo kesi muzeye yeni voshe, pangeni vipangi, yange njili amo neni.

Zakaliya 8:13

Vanu va mu Yunda na vanu va mu Isalele! Ku san̄ulu vaka-kwija valisingile umo na mukwavo nakwendeka ngwavo, ‘N̄avava ije vene yawililile a Yunda na a Isalele iwile ali yeni.’ Oloni njikamyamena, co vaka-kwija vaje vakendeka kuli umo na mukwavo ngwavo, ‘Tambuleni vivezikiso vya cifwa cimo vije vyakele a Yunda na a Isalele!’ Ngecivene, simpeni kesi muzive lyova.”

Zakaliya 8:9

“Simpeni! Ololo mulinakuziva majwi a cifwa cimo ngwe aje vendekele vaka-kwimanena a simbu ije vajalele luvula lwakutungulula Njuvo yange.

Mateo 9:8

Omo vanu vacimwene, vakele na lyova, co vashangazalele Njambi uje waanene vanu moko yakufwa ngacije.

Luka 1:18

Co Zakaliya wendekele kuli kangelo ngwendi, “Njikazivuka vatijo nga cuma eci mucikafwa? Omwo yange njinakulu laja, co lalo munakazi wange nakuluvala.”

Luka 1:45

Yove unavezika akukulaela ngeci lijwi lya Shukulu Kalunga kuli yove likapwa lya vushunga!”

1 Kolinte 16:13

Kengeleleni, imaneni mbe mukukulaela, pweni vaka-kusimpa, pweni vaka-nzili.

2 Kolinte 12:10

Yange njinahwimi mu mbunge akuzeya, mukunjishaula na mukukalekeya na mu mapakeso na mukukaluwa omwo lizina lya Kilistu. Omwo njinazeye, asinoni njikale na nzili.

Efeso 6:10

Akukotoka, koleseniko muli Mwene na mu nzili ya vukama vwendi.

2 Timateo 2:1

Ngeci mwove munange, kolesa mu kutetela kuje kuli muli Kilistu Yesu.

1 Samwele 30:6

Co Ndaviti wakele mu vukalu vwakama manene, omwo vanu vendi voshe vazivile ku vimbunge kuvavala manene a vana vavo va vanalume na ava va vanakazi, co vashungwiiye kumwasha mamanya, oloni Ndaviti walitakamesele muli Shukulu Kalunga Njambi yendi.